ZEREMI 8 - Bible en langue guiziga

¹ Tapasa, a sa gudohoko tesl ngi buy Zudahay ati ngi mizli madiɗa ngi slraˀahaya, ngi masayay ati ngi mijiviɗey waɗ ngi mizli Zeruzalemeye. I ya Bumbulvuŋ maɓi na.

² A sa njikaka taŋ ar pas, ar kiya waɗ wurzlaŋhay taŋ muwuɗam taŋ zleˀe, mihuruk hurukam a mbuŋ taŋ, misipaka taŋ, mucufuɗam ɓihey avu taŋ, waɗ taŋ muhurkom a mbuŋ taŋ zleˀe na. Anta sa guɗumaka tesl tayna, ɓa a dikaka taŋ a muŋ ta, a sa ndiram ɓaˀ ɓaˀ avra ngi zãˀã li ngi guva.

³ Sukwi ngi mizli malambaˀ tayna, masa ndiram ti siifa, ko amaka gar, ya mizliɗa taŋ hirnga na, a sa ɓam: bonoy titiri, wuya ar vigiɗi. I ya Bumbulvuŋ misi gidaŋ wãˀ maɓi.

Joˀ ngi mizli mufuna wuluk ngi mbur

⁴ «Ki sa ɓa taŋ: Bumbulvuŋ a ɓi na: ‹Da mbur a diɗ le na, a slikiɗ mata kwa? Mbur mizizi le avu jiviɗe na, a mo nga dirba mata kwa?

⁵ Mizli Zeruzalem hanayna, a roko zizam avu jiviɗe, t'anta cicaka wuluk taŋ dar purla ta wãˀ vur mike? A ra cicam zlak gidaŋ gidaŋ ar ɓi maga taŋ gilaw na si, anta ngumam moko nga dirba ta.

⁶ I cine mingiɓi taŋ le kuy kuy: wuluk taŋ i wuluk miheɓel heɓel lambaˀa. Ko mbur pal mapula moˀore naŋ anta, ɓa a ɓi: ‹I gi vuna i mike› na, anta! Mbur gar a zuɓ jiviɗ naŋ muwuɗ le, kaɓa pilis makukur taˀ dibiɗ ar vurum.

⁷ Ko membese mbese maslikiɗ a muŋ kwana, a si na hin ngi cuh naŋ ng'ar li mekeleme le. Gonok, mezlezleŋ waɗ denguryeke, a sinaka hin ngi bo taŋ le. Amma mizli ɗuwoyo, anta kam slimiɗ ar ɓi ya Bumbulvuŋ miɓa le ta.›»

Sinmijileŋ mikasl ta

⁸ Ki ɓam: «Ndrˀada ti sinmijileŋ, asi ɓimujuwa ngi Bumbulvuŋ i ngi ndra.» Haˀaw ɓula, na ɓimujuwa nah vuna, a tiri le i ɓimujuwa mijeŋ mata, asi mutuh naŋhay anta boko ti mbiɗeˀvra naŋ jeŋŋe ta mayse.

⁹ Misi sinmijileŋheye, a roko ti mesem, a sinaka a gam kini ta, a jaka taŋ le ar kwar, ara burɗaka mingiɓi ngi Bumbulvuŋ, taŋ maɓam i misi sinmijileŋhey vuna, ama ani ska?

Mizli mawaka kaɓa ɓi anta neˀ le ta

¹⁰ Na mbak ɗagay so, yi vula ngwas taŋhaya da mizli mekelemey, guva taŋhaya, da mizli masa tiɓaka taŋ avu taŋ. Asi taŋ gar taŋ, ziri ati mizli micawwahaya, may gwat avu taŋ haɗa. Taŋ gar, mijiviɗey ati masayaya, gwat ngi gi taŋ naŋ kaslsla ta.

¹¹ Bonoy muluma mizli ɗuwoy na, a ɗiyaka ɓi nah ti sar ngi dirba, a ɓam: ‹Ɓi anta! Ɓi anta!› Dambalaka ɓi loŋ macuh kuy kuy anta ngbaŋ.

¹² Ya Bumbulvuŋ i ɓi na: «Mesem a ja taŋ le, asi taŋ migam gwat malambaˀ mukuy ta naŋ wãˀ na, amma ko mesem vuna anta ga taŋ neˀ le ta. Busukum ngi vi dangwal taŋ midiɗ na, ko a si na ka ta Yo mbak ɗagay so, a sa ndilam saɓaɓa a ruwuy kaɓa mizli gar, ya masa cufuɗa taŋ ɓa a slufikiy gwat taŋ migaka na, a sa ndilam kros kros a ruwuy.»

Njaha hiri ngi Buymisemuŋ anta, ngi mizli anta Buymisemuŋ a ɓi:

¹³ I juwa le a mevel ɗu, ɓa i wunkam ati taŋ, Gudubuno, yi anta ava ta, yo ˀurufo, yi anta ava ta! Kalaf taŋhay kwana, a ɓutom le. I ra vula taŋ da mizli masa cohom tir taŋ na. I ya Bumbulvuŋ maɓi.

Mizli a ɓam:

¹⁴ Ndra deŋ ar li purla vur mike? Kusukum hirnga kos! Cukum ng'ar walahay mugunohoy le ti mohol, ko i wusam ta, asi Bumbulvuŋ Buymisemuŋ ndra, a tika ndra le, anja i wusam ta, a vula ndra yam ngi si ti slalak araŋ. Gisiŋ i zluɓam ɓi le avu Bumbulvuŋ.

¹⁵ I roko hiri njah ngi luuma zuy zleˀe, amma ko gwat mezle neˀ anta, i roko kutukom hin ngi mbul ndra zleˀe so, amma zluwun a ndilo ndra kpis.

¹⁶ Musuwun ngi pilis taŋhay, a cino kal kal a Daŋ, huhum ngi pilis taŋ macifamaya, a jijika hirwuyo gar. A ra soko, a musukuɗoko hirwuyo jom ti gwat ngi raˀahaya cek, waɗ walahay ati mizli ngi raˀahaya.

Bumbulvuŋ a ɓi:

¹⁷ I sa slino kum kaway, kwecesley, misi matay ngi tik taŋ anta, a sa humbuɗukum. I ya Bumbulvuŋ maɓi.

Ndurɓo hiri ngi Zeremi Zeremi a ɓi:

¹⁸ Slalak ngi tika lik ɗu anta, ara giriy a mevele haɗa.

¹⁹ Mizli ɗuwoy, misi njaha hiri taŋ anta mata, taŋ maziloko vu zle angi hirwuy mikileŋ na, i ra cina. A ɓam: ‹Bumbulvuŋ naŋ anta a Siyoŋ mata kwa gawlay? Buy anta a diga mata kwa?› «A jikiy mevel asi mi, ti kuli taŋhay, waɗ ti gwat lambaˀ ngi mulakay naka?»

Bumbulvuŋ a ɓi: Zeremi a ɓi:

²⁰ Sifi a cuh le, hinpas a cuh le, ko i laham t'aruŋ na si!

²¹ Mevel ɗu kucoˀosl kucoˀosl, asi hiryi muluma mizli ɗuwoy na. Y'anta i pur gu mata, bonoy madiɗa a jiy le!

²² Urdi mihindirik hindirike, anta Galaˀata mata sukwa? Mumbulo vuhoy anta a diga ta kwa? Na mizli ɗuwoy na, a mbulom ta si mbrike?

²³ Eyˀeh! hirnga ɗu na, da a tirikiy di vigiɗ ngi yam treˀ, yo hiri ɗu, miviɗiviɗi ngi tuwuy treˀ na, anja ani i tuwa vagay ngi mizli ɗuwoy na, hiipas hiipas ati duvuɗ duvuɗ takwa?