ZEREMI 5 - Bible en langue guiziga

Walahay mihirya le wãˀ Buymisemuŋ aɓi:

¹ «Inga bulam bal bal ar buwal madiɗa ngi Zeruzalemeye gar, puram kuy kuy, yo cufuɗam mizli ɗi, sipam mbur ar li ngi lumahaya: zliv ki lumam mbur loŋ gu kwa? Mbur macik vu asi ɓimujuwa mitaˀ gar, malla mbur masipi jiviɗ ngi gi kaslsla na, zliv ki lumam gu kwa? Da ki lumam le na, naɓa mungra ngi walahay Zeruzaleme, i sa pula teˀe.»

Zeremi a ɓi:

² «Ko da mizli ara hudumom, a ɓam: «I hudum le ti Bumbulvuŋ misi ti siifa» na, i ngataraŋ.

³ Bumbulvuŋ, ka ki hiyĩ di i mbur magi teŋteŋ takwa? Ki kiɗa taŋ ti kiɗ kwana, amma ko a ga taŋ gwat ta, ki ra ngizla taŋ kwana, amma ko anta ngumam tiɓa mi ɗike ta si. ara gaka hirnga taŋ gidaŋ fineˀ ɗuguro, t'anta ngumam moko ng'avi ka ta.

⁴ Dar ya Zeremi, i ɓi ti kwacay ɗu: «Taŋ i mizli mizlewey ngataraŋ, a wulkam geˀ preˀe, a sinaka gwat Bumbulvuŋ mawuɗo ta, a sinaka gwat Buymisemuŋ taŋ macufuɗo ta.

⁵ I sa ru ng'avi mizli madiɗa taŋhaya, ɓa i ɓam ɓi ati taŋ. Ko mbri na, taŋ a sinaka gwat Bumbulvuŋ mawuɗo le, a sinaka gwat Buymisemuŋ taŋ macufuɗo le.» Amma taŋ gar i magayak purla, a ngumam cine mi ta, a slam himaˀ le.

⁶ Yawwa! moboroy a sa boko tisi dum, a jaka taŋ, Kiriɓuhoy, a sa jaka taŋ. Dirlengehey a sa ndahaka walahay taŋhaya, da mbur mubo le put si na, a puwaka njeɗek, asi ara gam mungra ti vendeke, taŋ mapulaka sipi jiviɗ tuwa, ara bigi ko mbak le anta.»

Buymisemuŋ a ɓi:

⁷ «Zeruzalem, da ka kahana na, i puluw mungra ɗike mbri mbrike? Ziri mizile ɗikey a pulikiy le mbaka. A hudumom ti gwat lambaˀhay. I kiɗa taŋ maya le ngbaŋ, gar ti nah kwana, ara gam madama na si, a roko ngiraɓ ngiraɓ a hay ngwas sulomehey.

⁸ Taŋ kaɓa pilis muzlumbura, misi may cifi maga taŋ zer zer! Ko wa gar na, a slurup slirap ti ngwas ngi cala.

⁹ Na sey i mbiɗa taŋ hirnga takwa? I ya Bumbulvuŋ maɓi. Na sey i pula cuwal ɗu avu sukwi ngi mizli misi kahana na takwa?

¹⁰ Tuwuɗaka mohol mugun walahaya, ngurfoko gwataya, amma ki musukuɗoko taŋ tur wãˀ ta ɓula. Turoko zuwal ngi gudubunoyo, asi t'anta inga ya Bumbulvuŋ ta.

¹¹ Mizli Israyeley ati Zudahaya, kay, a njikikiy le, t'anta teŋteŋ avu ya ta. I ya Bumbulvuŋ maɓi.

Mbur magi teŋteŋ ta na, a luuma gwat nah

¹² A jam mi vur ya Bumbulvuŋ, a ɓam na: ‹Buymisemuŋ, naŋ anta kini. Ko hiryi anta sa gi avu ndra ta wãˀ, ko vurum malla may anta sa gi avu ndra ta.

¹³ Mijiviɗeye, taŋ kaɓa himiɗ magi fir fir lambaˀ, mingiɓi nga ya Buymisemuŋ anta a balam taŋ ta. Anja ɓi taŋ matilam di mi vuna, a mbiɗi nga hirnga taŋ tehhe a muŋ!›

¹⁴ Vurˀe, ya Bumbulvuŋ misi gidaŋ wãˀa, i ɓi na: «Da ki ra ɓam kanah na, mingiɓi ɗu misi a balam ɗik, ka Zeremi na, i sa tiri di vu, yo mizli tayna, i sa tiri taŋ dum, vu a sa zuma taŋ kap.

¹⁵ Kum mizli Israyeley, i sa slino sukwi ngi mizli mikileŋhey ɓa a soko lumukum. I ya Bumbulvuŋ maɓi. I sukwi ngi mizli matik ˀay ta, sukwi ngi mizli misi t'ada diga zlezle, sukwi ngi mizli kum misinaka mi taŋ ta, yo i sukwi ngi mizli kum maslaka wala ngi ɓi taŋ ta.

¹⁶ Gulum taŋhaya kiɓiŋ kiɓiŋ kaɓa zivi mubaŋ, taŋ gar taŋ i bugawlahay cek.

¹⁷ A sa zumaka gwat ngi migam kumoy ati ɗaf kumoyo ziri kum mizilehey ati mongosohoyo, tumuŋhoy ati ˀaway waɗ sla kumoyo, gudubun ati uruf kumoyo. Walahay mugunohoy le ti mohol, kum mapuraka kaɓa ki roko zuy zuy ar taŋ na, vurum a sa waha taŋ kiɓac kiɓac.

¹⁸ Ko ar tapas nah vuna kwana, y'anta ngizlukum pay ta. I ya Bumbulvuŋ maɓi.

¹⁹ Ti kum misa ɓam le: ‹Bumbulvuŋ Buymisemuŋ ndra vuna, a ga ndra di kahana vur mike?› na, ka Zeremi, kisa mbiɗa taŋ di: ‹Kum mupulikiy ya Buymisemuŋ mbak, ɓa ki gam mezegwel da kuli mulakay misi asi ruwuy kum na, naŋ kanah ya, kisa gam gawla ngi mulakay angi hirwuy misi i ngi kum ta na ya.›»

Da mizli a sinaka gidaŋ ngi Buymisemuŋ mata

²⁰ Buymisemuŋ a ɓi: «Tilam mi ti ɓi hana da mizli ngi Zakopoy, ɓaka da mizli Zudahaya, ɓa a cinakaŋ.

²¹ Cinaka ɓi ani so, kum mizli gilaw, manja lesley, hiri ada ngbaŋ, amma kum anta puram ta, slimiɗ ada ngbaŋ, amma kum anta cinam ta.

²² Bumbulvuŋ a ɓi na: Ki zluwunam ti ya ta mbrike? Ki jijikam a mbuŋ ɗu ta mbrike? Mipa muyuŋ ar deɗe ngi maakway da mubuliy, maakway naŋ ngi set, ɓa a tuwuɗ ta na, i ya takwa? Yam a slikiɗ jirif jirif, amma naŋ anta lum gidaŋ ta, naŋ mangi diɓel na, a hurum cufuyoh cufuyoh, amma ko a tuwuɗa ta.

²³ Amma kum mizli hanahay na, lesl kumo gidaŋ haɗa, yo kum i mizli mislikiɗa ɓihey. Ki mbuɗam duba, joˀ ki cohom gwat kum.

²⁴ «Bumbulvuŋ Buymisemuŋ ndra, i naŋ mavula ndra vuŋ angi hin naŋ kasl kasla, vuŋ ngi mohor ati ngi sifi, yo i naŋ maɗuva ndra hin ngi lumahay hĩˀĩ ngi gi sifi. Inga hunukum hirnga a mbuŋ naŋ sini» na, ko kum anta ɓam a kwacay kumo kahana ta.

²⁵ Ɓi miɓa le ɗaˀ le maga loɗiy loɗiy na, i mungra kum madiɗa na, yo i malambaˀ kum matika gwat mezle tayna.

²⁶ Asi a wuzla mizli ɗuwoyo muzluɓa ɓihey ada, a roko weˀ weˀ vu kaɓa micikiɗa ɗiyuwoy, ara pam mazaɓay, dar a jam di mizli.

²⁷ Hay taŋhaya, ndeŋ ndeŋ ti gwat muhulohoy, kaɓa hay ngi ɗiyuw mindeŋ ndeŋ ti ɗiyuwoy. A tiram mizli madiɗahay, misi zlilihey na vueˀe,

²⁸ i muzlumburahay, a wucuɗam deŋ. Taŋ i bugawla ngi gi malambaˀa, t'anta cikam vu asi ɓimujuwa mitaˀ gara mata, ɓimujuwa vur mutuhuhoyo, gwat taŋ muwuɗam gi naŋ le gar na, a gi. Tˀanta cikam vu neˀ le asi misi murgahaya ta.

²⁹ Na sey i mbiɗa taŋ hirnga takwa? I ya Bumbulvuŋ maɓi. Na sey i pula cuwal ɗu avu sukwi ngi mizli misi kahanayna takwa?

³⁰ Gwat ngi ndurɓo hiri, ngi gi zluwun ara gi asi ruwuyo:

³¹ Mijiviɗey a njikaka ɓi ngi gwat masa gi tumbuŋ jeŋŋe ta, gwat ngi lum gar na, masayay ara paka ng'ar jiiba taŋ, mizli ɗuwoyo kwana, ara puraka kuy. Na a dirba gwat tayna, kisa gam mike? kisa gam mike?