ZEREMI 49 - Bible en langue guiziga

Mingiɓi ngi Bumbulvuŋ vur mizli Amoŋhoy

¹ Bumbulvuŋ a ɓi vur Amoŋhoyo na: Israyele naŋ anta ti ziri mizileheye mata kwa? Mbur ngi zuma hay naŋ anta kwa? Na i kuli Milkom mazuma hirwuy Gata vur mike? Yo i mizli naŋhay macifam ar walahay naŋhaya vur mike?

² Bumbulvuŋ a ɓi: «Yo mbak ɗagay so! Hin ara ndilawa, tapasa, i sa ga ɓa a cinam widi ngi vurum a Raba, walahay ngi Amoŋhoyo. Walahay Raba a sa tiri daŋ daŋ, a sa ɗuvaka vu div div da walahay migweˀ gweˀ ngi cikeˀehey a wuram. Israyele, mizli muzumaka hay naŋ zleˀe na, dar a sa zuma taŋ avu taŋ a muŋ. I ya Bumbulvuŋ maɓi.

³ Mizli Heseboŋhoy, kuɗumam tuwuy! Walahay Ay i mihirya le! Walahay migweˀ gweˀ ngi ciki Rabahay, wudam fuk fuku! Kam zana ngi vagay! Tuwam irslik irslik! Kilam ti ka ti ka a ciki moholoyo! A ra ram ti kuli Milkomo nga hirwuy mulak, jom ati masay naŋhay waɗ buy naŋhaya cek!

⁴ Ka mahuhum vu asi gidaŋ ɗik na vur mike? Gidaŋ ɗik anta mata so, ka Raba miziza le, ki pula vu ɗike mbak vur zlili ɗike, ki ɓi na: «Mazliy gu i waka?»

⁵ Yo mbak ɗagay so! I sa ga ɓa walahay midigwi ɗikey gar a yukuw zluwun cak cak, Ki sa waham hirnga, mbur gar a kil cirre a mbuŋ naŋ, mizli makilama, ko mbur ngi sa cikila hirnga taŋ anta. I ya Bumbulvuŋ misi gidaŋ wãˀ maɓi.

⁶ A dirba nah, i sa ɗiya mizli Amoŋhoyo hiri taŋ a muŋ. I ya Bumbulvuŋ maɓi.

Mingiɓi ngi Bumbulvuŋ vur walahay Edom

⁷ Bumbulvuŋ misi gidaŋ wãˀ a ɓi vur Edomo na: «Misi sinmijileŋ anta a Temana mata kwa? Misi lesleye, t'anta ti mingiɓi ngi kuti vuhoyo mata kwa? Sin taŋ mijileŋ tuwa, a hiryi le wãˀ kwa?

⁸ Mizli Dedaŋhay, mbiɗam duba, kilam, ara ɗumom ar vigiɗey! Asi i ra so ti hiryi ng'ar Esawa, hana i hin ɓa a slufa gwat ngi gi naŋ muduba.

⁹ Da mingila yi ngi gudubunoy a sa soko le a hay kumo na, anta sa pulam yi naŋ doc ko purla le ta. Da muhuloy a soko le ti duvuɗ na, gwat zliv taŋ mahiryaka gu gar na, a sa hiryakaŋ.

¹⁰ I ya vuna ti haŋ ɗu masa tiɓa gwat ngi Esawaya, zlili naŋhay muɗum ɗum na gar, i sa bugo taŋ ngbay ar li babara. N'anta sa ɗum gu ta. A sa zumaka tizer naŋ, sukum naŋhay waɗ midigwi naŋhaya kap, mbur masa ɓi ka misi ani na anta:

¹¹ «Ki lika mutuhu ɗikeye ta, masa gila taŋ i ya. Yo wudiga ɗikeye, a njaham hiri asi ya gu.»

¹² Haˀaw, Bumbulvuŋ a ɓi na: «Mizli, misi anja a sam ar sikiɗ ngi bonoyo zleˀe ta na, kiita a ja taŋ le ɓa a sam na, ɓaka kisa bi njiraŋ zleˀe sukwa? Ndiɗaˀ, ko k'anta sa bi njiraŋ ta: kisa sa cummo na si.

¹³ Haˀ aw, hadam ti slimiɗ ɗu vuna a muŋ, walahay Bosra a sa ndir daŋ daŋ, diŋ hilgim, joˀ mizli a sa zam vu ti naŋ, yo a nisam vu ti naŋ. Prok naŋhay gar, a sa ndiram i diŋhey hilgim hilgim ngi set. I ya Bumbulvuŋ maɓi

¹⁴ mingiɓi ani i cine le, i mi muso ti vu Bumbulvuŋ, a slinam di mbur bugawla le ng'avu sukwi ngi mizli, a ɓaka taŋ na: Kusom! A ra lumakaŋ! Slikiɗam ngi kiɗa vu!

¹⁵ Haˀaw Edom, i wuɗ i tiri ti ka sukwi mikic le a wuzla sukwi ngi mizli, i vuluw ɓa mizli a purukuw hiris le.

¹⁶ Ki ra ga zluwun da mizli gar, ki wakaɓa ki funa mizli le ceke, dambalaka ki gi gilaw le, ka mujoˀ ti hay ar butum a muwã na, yo ka muro gilaˀ a hirnga muwã musuburoy tuwa. Da ko ki ɗiya hay ɗike le a hirnga muwã kaɓa kilkandaŋ kwana, i sa po haŋ ɗike baɗ a diga.» I ya Bumbulvuŋ maɓi.

¹⁷ Edom a tiri le cay daŋ daŋ. Mizli macohom a cikeˀe gar na, a zuma taŋ hirnga: a puraka gwat mihiryahaya le keɗ keɗ na, a hizigaka widi ngi zluwun fuk fuk.

¹⁸ Bumbulvuŋ a ɓi: «A sa gi i gwat ngi mendere madiɗa, kaɓa naŋ migi zleˀe a Gomor, a Sodom waɗ ar walahay ngi midigwi taŋhay na ya. Ko mbur masa cifi hay a diga anta mata, ko mbur titra masa cifi moholoy a diga anta mata.»

¹⁹ «I sa so kaɓa mobor mabo tisi kalaf mingiriɗ a mi mizaw Zurdeŋ, ɓa ngi ru ng'ar li ngi yam mivi: naŋ kanah, gurjik si na, i ɓula taŋ ti Edomo, i slin ti gawla migi vurumoy kutum ɓa ara lumakaŋ. Asi misi kaɓa ya i waka? Masa ziliy gu ng'ar kiita i waka? Mijigin ngi mizli, masa cici gu a mbuŋ ɗu i waka?

²⁰ Gwat Bumbulvuŋ ɓi micica ngi gi vur Edomo, cinaka ɓi nah, slra naŋ mujuwa ngi gi vur mizli ngi Temaŋhay. A sa ɗiɗaka taŋ gisiŋ gisiŋ kaɓa ginewey, hã avu memeɗe taŋhay wãˀ. A sa waha hirwuy taŋ gisiŋ gisiŋ vur taŋ.

²¹ Hurum ngi diɗ taŋ na, a jijika hirwuyo ngbir ngbir, widi taŋ a cin sesẽŋ a mubuliy lavaɗa.

²² Naŋ kaɓa kilkandaŋ maslikiɗ, a ki makapal, kirpasl cay cay angi Bosra. Tapasa, soje miwirwir ngi Edomoy a sa zluwunam a mevel taŋ, kaɓa ngwas mayi mazluwun.

Mingiɓi ngi Bumbulvuŋ vur walahay Damas

²³ Ɓi vur Damas: Walahay Hamat ati Arpata, mesem a kiɗa taŋ le ɓaˀ: asi na, a cinam labara le. A wusam haɓay haɓay kaɓa yam ar mubuliy: i zluwun mukuyta wãˀ! A cicam teˀ teˀe gu ta ndiɗaˀ!

²⁴ Mizli Damasay a ndilam le ndirɗaɗ ndirɗaɗ. A ra mbuɗam duba le ngi kil, zluwun ara jijika taŋ. Muɗa didak ati gir ngi vu a diɗo le ar taŋ, kaɓa ngwas mayi.

²⁵ Ĩˀĩ, ka walahay hirnga, ka walahay mavuliy mumul tuwa, ki mupula le fuku!

²⁶ Haˀaw, tapasa na, gawla migi vurum naŋhay a sa ndilam ɓaˀ ɓaˀ ar li ngi luma, soje naŋhaya gar i muguco taŋ mi le. I ya Bumbulvuŋ misi gidaŋ wãˀ maɓi.

²⁷ I ka vu ɓaˀ ɓaˀ da mohol ngi walahay Damasa, ara wura hay ngi buy Ben-Hadata.

Mingiɓi ngi Bumbulvuŋ vur sukwi Arapay

²⁸ Arap ngi Kedaray waɗ zumabuy vay Hasor, Nabukodonozor buy madiɗa ngi Babiloŋ mipa taŋ hirnga tuwa na, Bumbulvuŋ a ɓi vur taŋ na: Slikiɗam! Akum nga kiɗa vu ati Kedar! Mizli ngi wuzlaɓuhoy na, hiryaka taŋ gwataya cek!

²⁹ Tuɓukum guɗuk taŋhay ati ginew taŋhaya, zlavaɗ ngi zana taŋhay waɗ gwat taŋhay gar. Akum ti zlogomo taŋhaya, i wudam ar taŋ, i ɓam: «Zluwuno ɓaˀ li!»

³⁰ Mizli Hasoroy, kilam! Kilam kutum! Ɗumom ar butumoy! Asi Nabukodonozor buy madiɗa ngi Babiloŋ, a juw ɓi le vur kumo, a mbizi ɓi le a kwacay vur kumo. I ya Bumbulvuŋ maɓi.

³¹ Slikiɗam! A ra kiɗam vu ati sukwi ngi mizli malikam ta wãˀ, yo misi t'anta zluwunam neˀ ta tayna. Asi t'anta ti miviŋ ta, t'anta ti magandaŋ ta ma, a pam le baˀ pal taŋ! I ya Bumbulvuŋ maɓi.

³² Mesene taŋhay a sa tiɓaka zlogomo taŋhaya, yo a sa tiɓaka ginew taŋhay muˀurnok urnoko ar vurum. Mizli mufuca li tinik tayna, i sa zliɗa taŋ hirnga suɓulak si li gar, i so ti hiryi nga hirnga taŋ tika tika gar, I ya Bumbulvuŋ maɓi.

³³ Walahay Hasor a sa tiri hay ngi biigaɗay, li midaŋ daŋ cay ngi sete. Ko mbur masa pi ara anta mata, mbur titira masa cifi moholoy ara anta.

Mingiɓi ngi Bumbulvuŋ vur walahay Elam

³⁴ Ar ɗuva virzi ngi zumabuy ngi Sedekiyas buy Zuda na, Bumbulvuŋ a ɓa mijiviɗ Zeremi vur mizli Elamaya na:

³⁵ Ya Bumbulvuŋ misi gidaŋ wãˀ i ɓi na: «I sa ngila lek ngi mizli Elamaya, taŋ malumam gidaŋ na, aseˀeŋ.

³⁶ Tir vay muŋ, yo tir vay ruwuy, tisi pas ngi miprik, yo tisi pas ngi pastaˀa, i sa go himiɗ mumufaɗay na ng'ar Elama, i sa zliɗa taŋ hirnga suɓulak si li gar, mizli Elamay mizliɗam hirnga na, a sa ndilam angi sukwi gar, sukwi masa ndir manja a ndilam a diga na anta.

³⁷ I sa guco mi da Elamay a mbuŋ mesene taŋhaya, a mbuŋ mizli mawuɗam zizaka taŋ hutuŋ na. I sa so ti hiryi nga hirnga mizli Elamaya: ji mevel ɗu ka vu, i sa sipa taŋ ɓaˀ ti maslalam, hã i ngizla taŋ teleleˀ wãˀ. I ya Bumbulvuŋ maɓi.

³⁸ I sa ɗuva janga ɗu ngi buy a Elama, yo i sa susuymo buy ati mizli madiɗa ngi slraˀahaya. I ya Bumbulvuŋ maɓi.

³⁹ Amma nga mbuŋ na, i sa ɗiya Elamahiri naŋ a muŋ. I ya Bumbulvuŋ maɓi.