ZEREMI 46 - Bible en langue guiziga

¹ Hana i mingiɓi Bumbulvuŋ miɓa ɗaˀ le da Zeremi vur sukwi ngi mizli mekelemey.

Buy ngi Babiloŋ mikiɗa Eziptehey a Karkemis

² Ɓi ngi Ezipte ati ngi soje ngi Neko buy madiɗa ngi Ezipte. Ar vi mumufaɗ naŋ ngi Zoˀakim mangal ngi Zoziyas mazum buy a ruwuy Zuda na, Nabukodonozor buy madiɗa ngi Babiloŋ a kiɗa buy ngi Ezipte, naɓa buy Ezipte vuna a ro zleˀe a Karkemis, a mi mizaw Efrat.

³ Buy ngi sojehey a tilam mi: «Cinjahaka misi mbaray madiɗa ati memeɗeheye! Zlukum vurumo!

⁴ Juwaka piliseye! Jiɗam ar piliseye! Misi jiiku ngi gandafay, cinjaham! Wam vu ti ziwiteye! Kaka libitiheye!»

⁵ «I mi magi ka? Mi ma ska? Zluwun a hurɓo taŋ le, ara mam murdirba! Mizli miwirwir haɗa ngisi taŋhaya, i minguma taŋ le wurasl wurasl, meɗ meɗe, a kilam taˀ dibiɗ lambaˀ, hiri keɗ le murdirba anta! Zluwuno ɓaˀ li, I ya Bumbulvuŋ maɓi.»

⁶ «Mbur minjer njer muwãˀ naŋ, a sumuɗ gu ta, ko mbur miwirwir muwãˀ naŋ, a lih gu ta. Tir vay muŋ, a mi mizaw Efrata, sar a ba taŋ, a ndilam saɓaɓaɓa.

⁷ Mibam vu ati mizaw Nil mazuɓo i waka? Misi kaɓa mizaw madiɗahay mazuɓamavra avra i waka?

⁸ Mibam vu ati mizaw Nil mazuɓo i Ezipte, misi kaɓa mizaw madiɗahay mazuɓamavra avra i waka? Ezipte a ɓi na: «I sa zuɓ, i nda hirwuyo cek, i sa ziza walahaya jom ti mizli ngi raˀahaya kap kap.

⁹ Misi pilisey, zlaka kiɗa vu! Misi mota ngi vurumoy, ɗuvam dibiɗ taˀ! Anja mizli miwirwir muwãˀhay a bam: mizli Kusoy ati mizli Putoy, misinaka ji mbaray le, mizli Lutoy misinaka ji lek ati ngi leke le!»

¹⁰ Amma hin hana i hin ngi Bumbulvuŋ Buymisemuŋ misi gidaŋ wãˀa, hin ngi cuwal, ɓa ngi pula cuwal avu mizli mazliram ti naŋ tahay. Maslalama, kaɓa lungum, a sa humbuɗa taŋ, hã a mbi, a sa pumbus taŋ hã a waŋ duwlak. Kayya, angi hirwuy vay muŋ, yo a mi mizaw Efrata, i muguzlum madiɗa avu Bumbulvuŋ Buymisemuŋ misi gidaŋ wãˀa!

¹¹ Ka diili Ezipte, aru nga Galaˀat a wuɗa urdi mihindirik hindirik ngi puy da waˀa. Slalak ɗik mihaɗahay na gar i ngataraŋ, ko gwat makufuw waˀa ɗik anta.

¹² Sukwi ngi mizli a cinaka ɓi ngi pi mesem ɗik na le, asi widi ɗik mufuk fuk na, a cin le asi ruwuy keɗeɗe. Mbur miwirwire, a diɗ ar mbur miwirwir, a ndilam prisl cuw taŋ arleˀeŋ.

Nabukodonozor mitiɓa Ezipte

¹³ Mingiɓi ngi Bumbulvuŋ miɓa ɗaˀ le da mijiviɗ Zeremi, ɓa a ɓa mizli ani: Nabukodonozor buy madiɗa ngi Babiloŋ, a sa so nga kiɗa hirwuy Ezipte.

¹⁴ Ɓaka mingiɓi hana a Ezipte, ɓaka a Mikdol, ɓaka a Memfi waɗ a Tapanes. Ɓaka taŋ: ‹Slikiɗam ng'ar li kumoy! Hilaka gwat ngi vurum kumoyo! Maslalam ara zuma mizli ngi ciki ɗikeye si.

¹⁵ Mbri! Kuli Apis ara kil! Gusoŋ ɗik tuwa, a cici zlak gu mata! Bumbulvuŋ a zlumbura le a ruwuy.

¹⁶ A ra ndilam kuyta wãˀ. Mizli mizilehey kwana ara ndilam ng'ar cala ng'ar cala. A ɓam na: ‹Slikiɗukum! Mukum ng'avi mizli ndrahay, nga hirwuy ndra miyam ndra ara, ɓa i laham avu maslalam mangizla ndra na!»

¹⁷ Cukum slimiɗ ani ti migal da buy madiɗa ngi Ezipte: ‹Mi wuwwo lambaˀ.›

¹⁸ Buy mazilaka Bumbulvuŋ, misi gidaŋ wãˀ a ɓi na: ya ti siifa! Kaɓa muwã Tabor mufuna muwãhay, yo kaɓa muwã Karmel mudum hirnga mubuliy na, mesene kum masa lumukum na, kanah ya.

¹⁹ Mizli Eziptehey, juwaka gwat kumoyo, ɓa ki kilam nga ɗum a hirwuy mulak, asi walahay Memfi a sa tiri li midaŋ daŋ cay lambaˀ, muwura le war war, ko mbur loŋ anta diga ta.

²⁰ Ezipte i bulkoŋ mezleŋ! Amma bibirey ara soko tir vay muŋ, nga saŋ pumbuso.

²¹ A Ezipte, ko migi slra ngi dalahay kwana, taŋ kaɓa ziri sla muzlumbrahay. Taŋ vuna kwana, a mbiɗam duba le, a kilam le gar taŋ. Tˀanta cicam zlak gu ta. Haˀaw, hin ngi ngizla vu ara ndilawa avu taŋ, i hin ya masa cufuɗa taŋ ɓa a slufukiy slra taŋ migakaŋ.

²² Soje Eziptehey a kilam le, kaɓa kaw masumuɗ le sulululu. Asi mesene taŋhay ara soko ti gidaŋ ng'ar taŋ, a soko ng'ar taŋ ti zlimbe a haŋ a haŋ, kaɓa munguma dumoy.

²³ Dum naŋ mingiriɗ na, ko da mbur a ci ng'ara gu ta tekeɗe kwana, ngumaka! Sojeheye taŋ sirgiɗim sirgiɗim ka jaray, a slufam ta. i ya Bumbulvuŋ maɓi.

²⁴ Ezipte hirwuy mezle tuwa, mesem a kiɗaŋ le, a vulakaŋ le asi haŋ ngi mizli vay muŋhoy.

²⁵ Bumbulvuŋ misi gidaŋ wãˀ, Buymisemuŋ ngi Israyel a ɓi na: «I wuɗ i ra luuma Amoŋ, kuli Tebese, buy madiɗa ngi Ezipte, yo i ra luuma kulihey ati buy ngi raˀahaya, buy ngi Ezipte ati mizli manjaham hiri vurˀe gar na.

²⁶ I vula taŋ asi haŋ ngi mizli mawuɗam zizaka hutuŋ taŋ: asi haŋ ngi Nabukodonozor, buy madiɗa ngi Babiloŋ waɗ asi haŋ ngi gawla naŋhay. A dirba nah so na, Ezipte a sa cif nga naŋ nga naŋ kaɓa misi zleˀe a muŋ. I ya Bumbulvuŋ maɓi.»

Bumbulvuŋ a sa laha Israyeleye

²⁷ Naka, gawla ɗu Zakopo, ki zluwun ta, Israyel, ki pula vu ɗike da hĩhĩy ta! I sa lihuw avu mizli mikileŋheye. I sa laha dideˀ ɗikey misi a ruwuy taŋ muɗumom a diga. Zakop ara mawa hirnga kaˀ a muŋ, naŋ zuy zuy, ko mbur magaŋ zluwun anta mata.

²⁸ Ka gawla ɗu Zakopo, ki zluwun ta, asi y'ada ati ka. mizli, ya muzliɗukum hirnga ngi hay taŋ na, i ra ngizla taŋ kuɗup. Amma kumo, y'anta sa ngizlukum ta. I guw kiita da ka ar kaslsla naŋ, ɓa i puluw teˀ, kaɓa ki gi gwat ta na, a gi ta ɓula!» I ya Bumbulvuŋ maɓi.