ZEREMI 42 - Bible en langue guiziga

Mizli milahamay mira puraka Zeremi

¹ Madiɗa ngi sojehey gar, ngay taŋ taˀ taˀ mufaɗa, wãˀ naŋ na, ti: Yohanaŋ mangal ngi Kareya, Yezaniya mangal ngi Hosaya, waɗ mizli gar, ziri ati mizli madiɗahay, a ram ng'avi

² mijiviɗ Zeremi, a ɓakaŋ na: «Inga tiɓa tumbul ndra na takwa! Tumbulo Bumbulvuŋ Buymisemuŋ ɗik ar deɗe ndra mindiram njireˀ hana takwa. Haˀaw ndra zleˀe haɗi, ani i ndiram ti siifa njireˀ kini! Ka vuna ki si na le kuy kuy.

³ Da i zuɓam jiviɗ wana, yo i gam mike na, anja Bumbulvuŋ Buymisemuŋ ɗike, a biga ndra di takwa.»

⁴ Mijiviɗ Zeremi a ɓa taŋ: «I cine le! I ra tumbulo Bumbulvuŋ Buymisemuŋ kumo ar deɗe kumo, kaɓa kum mucufuɗikiy, yo ɓi Bumbulvuŋ masa mbuɗukum di gar na, i sa ɓukum di, ko y'anta sa ɗumukum ɓi neˀ le ta.»

⁵ Taŋ a ɓaka Zeremi njah: «Ɓi Bumbulvuŋ Buymisemuŋ ɗik masa ɓo ndra di ti balam ɗik gar na, i sa gaka tiɗeˀe, anja Bumbulvuŋ a gi sedewo mikaslsla, migisiŋ a hirnga ndra.

⁶ Da ko ɓi naŋ, a cira ndra hiri le, ko a cira ndra hiri ta kwana, i sa cinaka mi ngi Bumbulvuŋ Buymisemuŋ ndra, ndra mislinukuw ng'ava na, gwat gar a sa cuh kuy avu ndra, asi ndra micinaka mi ngi Bumbulvuŋ Buymisemuŋ ndra na.

⁷ Hin kuruˀ a dirba nah na, Bumbulvuŋ a ɓa mingiɓi naŋ da Zeremi.

⁸ Zeremi kwana, a zilo Yohanaŋ mangal ngi Kareya waɗ madiɗa ngi soje ngi seˀehey ati mizli gar, ziri ati mizli madiɗahaya,

⁹ dar a ɓa taŋ: «Bumbulvuŋ Buymisemuŋ kumo ngi Israyel, kum mislinikiy ng'ava, ɓa i raŋ ti ɓi ngi tumbul kum tuwa, a ɓi na:

¹⁰ ‹Da ki ngumam le ngi cifi asi ruwuy hana na, naɓa i sa cucukum gidaŋ gidaŋ, y'anta sa zuzukum mata, yi sa cifi ti kum hǝɗ hǝɗ kuy kuy, y'anta sa hizigiɗukum mata wãˀ, i sa wulka malambaˀ ya mugukum di na.

¹¹ Buy Babiloŋ, kum majijikam di na, ki zluwunam di mata, asi y'ada ati kum, ɓa ngi lih kumo, ɓa ngi tuɓo kum tisi haŋ naŋ. I ya Bumbulvuŋ maɓi.

¹² I sa purukum ircece: buy madiɗa ngi Babiloŋ vuna masa purukum ircece ya na, a sa pulukum angi hirwuy kumo.

¹³ «Amma da ki ɓam le: ‹Ndr'anta ngumam cifi asi ruwuy hana ta,› ki slam himaˀ le kahana ngi cine mi ngi Bumbulvuŋ Buymisemuŋ kumo,

¹⁴ yo da ki ra ɓam: ‹Ĩˀĩ! I wuɗam ru nga Ezipte, Ndr'anta sa puram hiri ngi vurum a diga mata, Ndr'anta sa cinam tulum ngi bi ng'ar vurumo mata wãˀ, ndr'anta sa gam bonoy ngi ɗaf makice mata wãˀ, yo i wuɗam i ra pam a diga› na,

¹⁵ yo mbak ɗagay so! Kum mizli Zudahay mindiram ti siifa na, cinaka mingiɓi ngi Bumbulvuŋ so. Bumbulvuŋ misi gidaŋ wãˀ, Buymisemuŋ ngi Israyele, a ɓi na: ‹Da ki zuɓam jiviɗ le gisiŋ nga Ezipte, ɓa ki ra ɗumom a diga na,

¹⁶ naɓa maslalam kum mazluwunam di vuna, ara lumukum asi ruwuy Ezipte a diga. May mazluwunukum haɗa na, a sa ra lumukum sesẽŋ a Ezipte a diga vuna, dar kisa micam a diga.

¹⁷ Mizli masa zuɓaka jiviɗ nga ɗum a Ezipte na, a sa micam ti kiɗ ti maslalam, ti may waɗ ti jiji mozorbono. Bonoy ya masa po di ng'ar kumo, ko mbur masa lih ava anta, ko mbur masa ndir ti siifa ava anta.

¹⁸ Haˀaw, Bumbulvuŋ misi gidaŋ wãˀ, Buymisemuŋ ngi Israyele, a ɓi na: ‹Ya muzuɓ mevel, himaˀ fõh fõh ng'ar mizli Zeruzalemey na, kum misa ndilam le a Ezipte na, i sa zuɓ himaˀ fõh fõh ng'ar kumo kanah ya: kisa tiram mizli mihirsahay le putuk wãˀ, a sa zuwulam vu, a sa nisam vu waɗ a sa zam vu ti slimiɗ kumo. Ko kum anta sa puraka hirwuy hana mata wãˀ.›»

¹⁹ Kum mizli Zudahay mindiram ti siifa, Bumbulvuŋ a ɓukum na: ‹Ki ram nga Ezipte ta! Dana, sinaka sin le, i ra ɓukum di njah wãˀ!

²⁰ Kum vuna tihaŋ kumo, kum mislinikiy ng'avu Bumbulvuŋ Buymisemuŋ kumo na, ki vulam di i vu kum taˀ da mucu, ki ɓikiy na: ‹Inga tumbulo Bumbulvuŋ Buymisemuŋ ar deɗe ndra takwa, ɓi Bumbulvuŋ Buymisemuŋ ndra maɓa gar na, ɓa ndra di tiɗeˀe, ɓa i gakaŋ!›

²¹ I ɓukum di le wureˀ ani ngbaŋ, amma ko ki cinaka mi ngi Bumbulvuŋ Buymisemuŋ kumo ta na si. Ɓi naŋ miɓiy taŋ ɓa i ɓukum di na, ko ki cinam loŋ le ta!›

²² Wurenna, a bigi le njah muduba, kisa micam ti kiɗ ti maslalam, ti may waɗ ti jiji mozorbono ar li kum mawuɗam ki ra ɗumom ara vuna.»