ZEREMI 41 - Bible en langue guiziga

¹ Ar kiya mitarnaˀ naŋ ngi vi na, Ismayel mangal ngi Nataniya, dideˀ ngi Elisama, muy ngi buy, mbur ngi si mizli madiɗa ngi slra ngi buyoyo, a so luuma Gedaliya mangal ngi Ahikam a Mispa, mizli kuruˀ aseˀeŋ. Taŋ misi a Mispa na, a zumam ati Gedaliya bummoˀ.

² Gurjik si na, Ismayel a slikiɗam wuw ati mizli mukuruˀ ngi seˀehey tuwa, a kiɗaka Gedaliya vagay ti maslalam. A kiɗaka mbur buy madiɗa ngi Babiloŋ mucufaŋ ngi wi li tuwa, kahana.

³ Akẽh na, Ismayel a kiɗa Yudehey misi ati Gedaliya a Mispa cek, waɗ soje ngi Babiloŋhoy misi a Mispa cek ma.

Ismayel mikiɗ muzuɓa mulakay kukur dangafaɗa

⁴ A gam hin cuw a dirba mikiɗaka Gedaliya na, ko mbur micina ɓi nah fẽt anta.

⁵ Dar mizli a ndiloko ti Sikem, ti Silo waɗ ti Samari, taŋ mizli kukur dangafaɗa, mazlamay mihicahay le, zana mingirahay le, vuhoyo car car, taŋ ti gwat ngi vul ati mukuturɓuy mazĩˀĩ ndum, ɓa ngi zlum ar hay ngi Bumbulvuŋ.

⁶ Ismayel mangal ngi Netaniya, a bo ti Mispa nga ji ti taŋ hirnga, ara ru bal ti tuwuy, naŋ mindil avu taŋ na, a ɓa taŋ: «Soko puraka Gedaliya ayɗi!»

⁷ Taŋ micam nga hur walahay muduba na, Ismayel mangal ngi Netaniya ati mizli ngi seˀehey tuwa, a ngizlaka taŋ kap, waɗ vagay taŋhaya fuk fuk ng'ar vigiɗi.

⁸ Mizli kuruˀ a wuzla mizli tayna, a ɓaka Ismayele le zleˀe: «Ki kiɗa ndra ta, i wam vu le ti gwatay ɗum ɗum haɗi a ɓuh: alkamari, daw giziŋ, mal waɗ mam.» Vurˀe, Ismayel a pula taŋ, a kiɗa taŋ ati sukum taŋhaya ta.

⁹ Vigiɗ misi Ismayel mingizla mizli, naŋ mizliɗa vagay taŋhay ng'ara na, i vigiɗ Gedaliya, buy Asa milaŋ, ti taŋ magam vurum ati Basa buy Israyel. Ismayel a naha mbaf ti vagay ngi mizli.

¹⁰ Akẽh na, is ngi mizli Mispahaya, Ismayel a ja taŋ cek, aru taŋ: maˀãyay ati is ngi mizli mindiram ti siifa a Mispa gar, mizli, Nebuzaradaŋ madiɗa ngi mijigina buy, mupula taŋ asi haŋ ngi Gedaliya. Joˀ Ismayel aru ti mizli mijahaya ng'avi Amoŋhoy.

Mupulaka mizli dangay ngi Ismayeley

¹¹ Mungra madiɗa Ismayel mangal ngi Netaniya miga tuwa, Yohanaŋ mangal ngi Kareya ati madiɗa ngi sojehey gar micinaka ɓi naŋ na,

¹² a kusoko mizli taŋhaya gar, a bam nga kiɗa vu ati Ismayel mangal ngi Netaniya. A ra lumakaŋ a mi yam madiɗa a Gabaˀoŋ.

¹³ Mizli Ismayel mija taŋ tuwa gar, taŋ mupuraka Yohanaŋ mangal ngi Kareya ati madiɗa ngi sojeheye aseˀe na, ara mumulom.

¹⁴ Mizli mijahay le, Ismayel muru taŋ ti Mispa tuwa gar, a mbiɗam duba avu Ismayele, a mam ng'avi Yohanaŋ mangal ngi Kareya.

¹⁵ Amma Ismayel mangal ngi Netaniya, a kil ti mizli dangafaɗ a mbuŋ Yohanaŋ mangal ngi Kareya, a ram nga wuzla mizli Amoŋhoy.

¹⁶ A dirba nah na, Yohanaŋ mangal ngi Kareya ati madiɗa ngi sojehey misi aseˀe, a tiɓaka is ngi mizli mindiram na cek. I mizli Ismayel mangal ngi Netaniya mujo taŋ a Mispa, a dirba naŋ mikiɗa Gedaliya mangal ngi Ahikam tuwa: mizli mizile ngi vurumoy, ngwasay, ziri ati mizli ngi mamay buyoy, naŋ muso taŋ ti Gabaˀoŋ.

¹⁷ A zuɓaka jiviɗe, ara cicam ar li pi sar ngi mulakay a Kimeham, prok ngi Betelyem, may taŋ ngi ru nga Ezipte.

¹⁸ A kilam ti Babiloŋhoy, taŋ mazluwunam ti taŋ, asi Ismayel mangal ngi Netaniya mikiɗa Gedaliya mangal ngi Ahikam, buy madiɗa ngi Babiloŋ mucufaŋ buy miwi li tuwa.