ZEREMI 40 - Bible en langue guiziga

Zeremi micifi a Mispa

¹ Nebuzaradaŋ, madiɗa ngi mijigina wazlarayay, mupula Zeremi ɓa a cuh baɗ ti Rama na, Bumbulvuŋ a ɓaŋ ɓi le. Nebuzaradaŋ muzuɓa ɓi ngi Zeremi na, naɓa i mujuwa le zleˀe ti celelu a wuzla mizli dangay ngi Zeruzalemey ati ngi Zudahay mijaka taŋ gar nga Babiloŋ na.

² Buy ngi mijigina hayay a zuɓa ɓi ngi Zeremi le da naŋ, a ɓaŋ na: «Micico ɓi ngi bonoy ng'ar li misenna, i Bumbulvuŋ, Buymisemuŋ ɗiki.

³ Bumbulvuŋ a so ti bonoyo le, a gi di i gwat mikaslsla kaɓa naŋ ɓi micica ɓi naŋ. Gwat mindilo kahana na, asi ki zluɓaka le, ki cinaka mi da Bumbulvuŋ ta.

⁴ Amma wurenna, dana dana vuna si na, i cukuw tir celelu ɗik avra. Da ki wuɗ kis ɗu le nga Babiloŋ na, sawa, i sa ki slimiɗ ar ka, amma da may ɗik anta ya kwana, ki so ta. Hirwuyo n'ani a mbuŋ ɗike, ka ru ng'ar li ka muwuɗ le.

⁵ Da ki ngum cifi ati ya ta na, mi a muŋ ng'avi Gedaliya mangal ngi Ahikam, dideˀ ngi Safaŋ, buy madiɗa ngi Babiloŋ a cifaŋ le i buy miwi walahay Zudahay. A ra cifam ava a wuzla mizli vuna, malla ta na, aru ng'ar li ka muwuɗ le gar.» Dar buy ngi mijigina hayay, a vula gwat ngi zum da Zeremi waɗ gwatay, a pulaŋ a ru.

⁶ Akẽh na, Zeremi aru nga Mispa a ciki Gedaliya mangal ngi Ahikam, a ndir a cikeˀe a wuzla mizli mindiram asi ruwuyo.

Yudehey mikisoko nga ciki Gedaliya

⁷ Dambalaka madiɗa ngi sojehey ada zleˀe ti soje taŋhay silaŋ pal taŋ a ɓuh aruŋ. Madiɗa ngi sojehey ati mizli taŋhaya, a cinaka na, buy madiɗa ngi Babiloŋ a vula madiɗa le da Gedaliya mangal ngi Ahikama, i buy asi ruwuyo. Mizli ziley, ngwasay ati ziri waɗ misi murgahay cah mindiram manja a jaka taŋ nga Babiloŋ na, buy a vula taŋ le asi haŋ ngi Gedaliya.

⁸ Madiɗa ngi sojehey tuwa, a soko lumaka Gedaliya a Mispa, i ti: Ismayel mangal ngi Netaniya, Yohanaŋ waɗ Yonataŋ, i ziri ngi Kareyahay cuw taŋ, yo Seraya mangal ngi Tanehumet ati ziri ngi Efayay mbur Netofa waɗ Yazaniya mbur Maˀaka.

⁹ Gedaliya mangal ngi Ahikam, dideˀ ngi Safaŋ, a ɓa taŋ ti hudum da taŋ jom ati mizli taŋhaya: «Ki zluwunam ngi tiɓa gwat ngi gi ngi Babiloŋhoy na ta. Cifam asi ruwuyo, hinam hirnga a mbuŋ buy madiɗa ngi Babiloŋ si na, naɓa gwat gar a sa cuh ti zuy si.

¹⁰ Ya i cifi a Mispa, ar deɗe kum a mbuŋ Babiloŋhoy masoko ngi hay ndra na. Amma kumo na, kum slaka yi ngi gudubun kumoy ati ngi widis ngi zumoy waɗ yi ngi widis ngi malaya, wam taŋ vu, kum cifam ar walahayay kum misi ar taŋ na.»

¹¹ Naŋ kanah ma, mizli Yudehey gar misi a Moˀap, a wuzla Amoŋhoy a Edom waɗ misi asi ruwuy gara, a cinam na, buy madiɗa ngi Babiloŋ a pul mizli Zudahaya le cah asi ruwuyo, yo a cifa taŋ buy le, i Gedaliya mangal ngi Ahikam, dideˀ ngi Safaŋ.

¹² A zlaka a moko tir lihey taŋ mizliɗam hirnga zleˀe mber mber nga diga na. Taŋ mindiloko asi ruwuy Zuda, a ciki Gedaliya a Mispa na, a ngilam yi ngi gudubun ati ngi widisey, hã sifi a gi le kuy kuy wãˀ.

Mikiɗaka Gedaliya vagay

¹³ Taŋ mindilam a ciki Gedaliya a Mispa na, Yohanaŋ mangal ngi Kareya waɗ buy ngi soje mitaˀ taˀ ti ngay taŋhay a ɓuh tuwa,

¹⁴ a ɓakaŋ: «Baˀal i buy ngi Amoŋhoy, a slino Ismayel mangal ngi Netaniya le, ɓa a kiɗuw vagay na, ki si na le ya?» Amma Gedaliya mangal ngi Ahikama a tiɓa ɓi taŋ ta.

¹⁵ Dar Yohanaŋ mangal ngi Kareya, aru yaŋ yaŋ ng'avi Gedaliya a Mispa, a cufuɗaŋ: «Inga puliy jiviɗ ɓa i ra kiɗa Mikayel mangal ngi Netaniya na vagay, manja mbur a sinaŋ. Ki wuɗ le gisiŋ ɓa a kuɗuw vagay kwa? Da a kuɗuw le vagay na, naɓa Yudehey muturpus a ciki ɗik na, a sa ndiram zlaɗ lambaˀ si ma, yo Zudahay mindiram na, a sa zizam.»

¹⁶ Gedaliya mangal ngi Ahikam a mbiɗa da Yohanaŋ mangal ngi Kareya na: «Ki ga kanah ta! Ɓi ka maslufa vur Mikayel na, i slir.»