ZEREMI 39 - Bible en langue guiziga

Babiloŋhoy mitiɓaka Zeruzalem

¹ Angi kiya mukuruˀ ngi vi mungoltir naŋ, Sedekiyas mazum buy asi ruwuy Zuda na, Nabukodonozor buy madiɗa ngi Babiloŋ, a ndiloko ati soje naŋhay gar, walahay Zeruzaleme ndah.

² Angi hin ngoltir ngi kiya mumufaɗ naŋ, ngi vi mukuruˀ ngaŋ kaˀ naŋ na, a slinam li le ɓoŋ avu mohol mugun walahaya.

³ Dar madiɗa ngi soje ngi buy Babiloŋhoy a cam, ara cifam a mizlingre ngi wuzla. Soje tayna i ti: Nergal-Sareser, mbur Sin-Magir, Samgar-Nebo, madiɗa ngi soje ngi wazlarayay, Sar-Sekim, mbur ngisi mevel ngi buy waɗ soje madiɗa mekelemey ngi buyoyo cek.

⁴ Sedekiyas, buy Zuda ati migi vurum naŋhaya gar, a puraka taŋ le, dar a kilam ngi duvuɗo, a bam tir jarne ngi buy, gweˀ avu mizlingre misi ar wala ngi moholoy cuw, a cohom kileŋ kini ngir ti Araba.

⁵ Amma soje Babiloŋhoy tuwa, a gidiɗaka taŋ, ara jaka is da Sedekiyas ar li micay a Zeriko. A joko di, a soko di da Nabukodonozor buy madiɗa ngi Babiloŋ a Ribla, hirwuy Hamat, joˀ Nabukodonozor a gaŋ kiita.

⁶ Buy Babiloŋ a ɓi mizli, a slaka ˀay ngi ziri daˀ a mihiri ngi cine taŋ Sedekiyas vuna, a Ribla. Yo buy madiɗa ngi Babiloŋ a ɓi mizli, a slaka ˀay ngi misi zlili ngi Zudahaya cek ma.

⁷ A dirba nah, a nduzoko hiri ngi Sedekiyasa cuw cuw taŋ, a juwaka ngiriɗ ngiriɗ ti celelu ngi ɓiri gaza zlaɓ cuw, a ram di nga Babiloŋ.

⁸ Hay ngi buy ati hay ngi mizli misi zliliheye gar na, Babiloŋhoy a ɗuvaka taŋ vu a wuram, a mbizlaka mohol ngi Zeruzaleme ma.

⁹ Nebuzaradaŋ, buy ngi mijigina hayaya, a ja mizli misi zlilihey mindiram a Zeruzaleme ati mizli mizizam hirnga, mira lumakaŋ, na zle misi zlilihey mindiram na gar si.

¹⁰ Amma sey a pul misi murgahay cah asi ruwuy Zuda, mizli misi gwat taŋ anta neˀ ta, dar a vula taŋ guva ngi widis ngi zumoy ati guva ngi huvoy.

Mupulaka Zeremi

¹¹ Nebuzaradaŋ, buy ngi mijigina hayaya, Nabukodonozor buy madiɗa ngi Babiloŋ a ɓaŋ ɗaˀ le ani vur Zeremi:

¹² «Zuɓa ɓi ngi Zeremi, ki slimiɗ ara, ko ki gaŋ malambaˀ neˀ ta, gwat naŋ mucufuɗ le na, kiɗaŋ may naŋ jaka.»

¹³ Nebuzaradaŋ, buy ngi mijigina hayaya, Nebusasbaŋ madiɗa ngi mizli ngi wazlarayay, Nergal-Sareser madiɗa ngi soje Babiloŋhoy cek, waɗ soje madiɗa mekelemey ngi buy Babiloŋhoy cek ma,

¹⁴ a slinam nga supo Zeremi a wazlaray mijigina hayaya, ɓa a pulaka asi haŋ ngi Gedaliya, mangal ngi Ahikam, i dideˀ ngi Safaŋ, ɓa Gedaliya a pulaŋ jiviɗ aru silaŋ ngi hay naŋ. Naŋ kine, Zeremi micifi a wuzla mizli.

Bumbulvuŋ miɓa Ebet-Melek

¹⁵ Ti di Zeremi muro giceˀ a wazlaray mijigina hayay zleˀe na, Bumbulvuŋ a ɓa Zeremi ani:

¹⁶ «A ra ɓa mingiɓi ani da Ebet-Melek, mbur Etiyopi: ‹Bumbulvuŋ misi gidaŋ wãˀ, Buymisemuŋ ngi Israyel a ɓi na: I wuɗ i ra luuma walahay hana tris ti ɓi ya miɓa taŋ tuwa, anta ngi gaŋ mezle ta, amma ngi gaŋ malambaˀa, kisa pura tapasa ti hiri ɗiki.

¹⁷ Tapasa, i sa cukuw tir bonoyo, yo mizli ka mazluwun ti taŋ na, y'anta sa puluw asi haŋ taŋ ta. I ya Bumbulvuŋ maɓi.

¹⁸ I sa lihuw gisiŋ gisiŋ, anta sa kuɗukuw ti maslalam ta. Ki sa laha hutuŋ ɗike na, asi ki puliy vu ɗike le mbak da ya. I ya Bumbulvuŋ maɓi.›»