ZEREMI 37 - Bible en langue guiziga

Sedekiyas mislin ng'avi Zeremi

¹ Sedekiyas a cifi buy ar li ngi Koniya, mangal ngi Zoˀakim. Nabukodonozor buy madiɗa ngi Babiloŋ a cifaŋ ɓa a zum buy asi ruwuy Zuda.

² Ɓi ngi Bumbulvuŋ matil di mi ti balam Zeremi na, buy vuna malla ko gawla naŋhay, ko mizli ngisi ruwuyoy kwana, anta cinakaŋ di ta.

³ Akẽh na, Yukal mangal ngi Selemiya waɗ Sefaniyas masay, mangal ngi Maˀaseya, buy Sedekiyas a slina taŋ nga cufuɗa mijiviɗ Zeremi, ɓa a ɓakaŋ: «Ambuh! Tumbulo ndra Bumbulvuŋ Buymisemuŋ ndra na takwa!»

⁴ Ti nah na, Zeremi ara liˀi a wuzla mizli ka naŋ muwuɗ, naɓa a cakaŋ ar dangay t'aruŋ.

⁵ Soje ngi buy madiɗa ngi Ezipteheye, a pulaka hirwuy Ezipte le zleˀe. Mizli Babiloŋhoy mindahaka walahay Zeruzaleme, taŋ micinaka ɓi nah na, a kursam, mbak Zeruzaleme daŋ.

⁶ Akẽh na, Bumbulvuŋ a ɓa mijiviɗ Zeremi na:

⁷ «Bumbulvuŋ Buymisemuŋ ngi Israyel a ɓi na: Buy Zuda mislino kum nga cufuɗ ɗu na, ara ɓakaŋ: da kine na, soje ngi buy madiɗa ngi Eziptehey mupulaka Ezipte, ɓa ara jinukum zleˀe na, a sa mam murdirba a muŋ ng'ar li pi sar taŋ a Ezipte.

⁸ Babiloŋhoy a sa soko, a sa zlaka kiɗa vu ati walahay Zeruzaleme, a sa tiɓakaŋ, a sa ɗuvakaŋ vu div a wur.

⁹ Bumbulvuŋ a ɓi na: Anja ki gam gilaw ta, ki waka kaɓa Babiloŋhoy a cohom le wãˀ ta. A cohom ta.

¹⁰ Ko da ki ngizlaka mizli Babiloŋhoy magam vurum ati kum na le, mindirama sey i mizli misi waˀa ngi luvutoy tekeɗe kwana, mizli tayna, a sa cicoko zlak zlak tir guɗuk taŋhaya, a sa soko, a ɗuvaka vu da walahay hana a wur na si.

Mijaka Zeremi ng'ar dangay

¹¹ Ti soje ngi Babiloŋhoy mukursam kileŋ avu Zeruzaleme vur soje ngi buy madiɗa ngi Eziptehey tuwa na,

¹² Zeremi a wuɗ a slikiɗ baɗ ar walahay Zeruzaleme zleˀe, ɓa aru ngasi ruwuy Benjameŋ, nur ɓi ngi zuma hay a wuzla mizli naŋhay a diga.

¹³ Naŋ mindil a mizlingre ngi ruwuy Benjameŋ na, a zlir ti mbur ada, i migi slra, a zilaka Iriya, i mangal ngi Selemiya, i dideˀ ngi Hananiya. Iriya tuwa, a cica mijiviɗ Zeremi, a ɓaŋ: «Ki ra ci nga wuzla Babiloŋhoy.»

¹⁴ Zeremi a mbiɗaŋ di: «Kanah ta, ko y'anta ci nga wuzla Babiloŋhoyo ta.» Amma ko Iriya a ngum cinaŋ di neˀ ta, a ja Zeremi tuwa, aru di nga mbuŋ mizli madiɗa ngi buyoy.

¹⁵ Mizli madiɗa ngi buyoy a jam mevel angi Zeremi, a kiɗakaŋ, dar ara gicaka ar viŋ ngi Yonataŋ, mbur mutoho gwata, asi a ndiram hay ngi dangay le a hay naŋ.

¹⁶ A kaka Zeremi ng'ar vigiɗ, asi hay ada huɓulummo ka viŋ. Zeremi a zik anga haɗi.

¹⁷ A dirba nah, buy Sedekiyas a slin ɓa ara boko di. Buy tuwa, a cufuɗaŋ ti miyaŋ yaŋ a hay naŋ, a ɓaŋ na: «Bumbulvuŋ a ɓuw ɓi le vur ya kwa?» Zeremi a mbiɗaŋ di: «hĩ!» Zeremi a ɓaŋ ma: «A sa vulukuw asi haŋ ngi buy madiɗa ngi Babiloŋ.»

¹⁸ Akẽh na, Zeremi a ɓa buy Sedekiyasa: «Ka ati gawla ɗikey waɗ mizli ɗikeye, kum mikikiy ar dangay vuna, i gukum gwat malambaˀ mike?

¹⁹ Mijiviɗey munjukukum ɓi, a ɓukum: kum vuna malla hirwuy hana, ko Babiloŋ anta sa gukum bonoy ta na, mijiviɗ tayna vuna taŋ amaka?»

²⁰ Jeremi a ɓaŋ ma: «Wurenna, buy kumani ɗu, cine tumbul ɗu na takwa: Ki mi ti ya ngi hay Yonataŋ, mbur mutoho gwat na mata, naɓa i sa muc a diga.»

²¹ Dar buy Sedekiyas a ɓi ɗaˀ, a pulaka Zeremi a wazlaray mijigina hayaya, yo vur hin gar na, a vulakaŋ ɗaf bulngus misi avu mizli misi ɗafahay macifam taŋ a jiviɗ madiɗahay na, hã ɗaf mikiɗ mi le ar walahaya. Naŋ kahana, Zeremi a ndir a wazlaray mijigina hayaya.