ZEREMI 35 - Bible en langue guiziga

Zeremi ati muy ngi Rekapihey

¹ Ti Zoˀakim mangal ngi Zoziyas mazum buy asi ruwuy Zuda na, Bumbulvuŋ a ɓa Zeremi ani:

² «A ra luuma muy ngi Rekapiheye, ɓa ki ɓa taŋ, yo ɓa ki ru ti taŋ ng'ar viŋ ar hay ngi Bumbulvuŋ, ɓa ki vula taŋ mbaazla ɓa a sam.»

³ Joˀ yi ru nga puro Yazaniya, mangal ngi Irmeya, dideˀ ngi Habasiniya, waɗ sukum naŋ ati ziri ngi Yazaniyahaya gar: na zle muy ngi Rekapiheye gar si.

⁴ I ru taŋ ng'ar hay ngi Bumbulvuŋ, ng'ar viŋ ngi ziri ngi Hanaŋhay, Hanaŋ mbur ngi Bumbulvuŋ, mangal ngi Ikdaliya. Viŋ ya muru taŋ ng'ara vuna, naŋ gweˀ avu ngi mizli madiɗa ngi slrahay, naŋ ti hirnga viŋ ngi Maˀaseya mangal ngi Salum, mbur mijigina mizlingre ngi hay Bumbulvuŋ.

⁵ Ya tuwa i so ti mbaazla ti kukulumoy mbaf mbaf waɗ ti sikiɗeye, taˀ taˀ a mbuŋ muy ngi Rekapiheye, dar i ɓa taŋ: «Sam mbaazla!»

⁶ Taŋ a mbiɗikiy di: «Ndr'anta sam mbaazla ta, asi dideˀ ndra Yonadap, mangal ngi Rekapa, a ɓa ndra na: ‹Kum ati ziri kumoyo, ko kisam mbaazla ta ndiɗaˀ wãˀ.

⁷ Ki ndiram hay ta, ki huvam ta, ki hirvam widis ngi zumoy ta, ko ki wuɗam gwat loŋ ta si. Amma angi siifa kum gar na, kisa hinam angi guɗukoy, ɓa ki zikam haɗa angi hirwuy mulak kum misi anga na.

⁸ Dideˀ ndra Yonadap, mangal ngi Rekap, ɓi ngi dubun naŋ mupula ndra di na, i jaka taŋ le cineˀe a hirnga: ndra vuna ati ngwas ndrahay, ko ziri ndra mizile ati mongosohoyo, i sam mbaazla ɗaˀ ta wãˀ.

⁹ Yo hay ngi hin anga i ndiram ɗaˀ ta, gwat kaɓa widis ngi zumoy, guvahay, malla guva ngi zligi gwat kwana, ko ngi ndr'anta.

¹⁰ Ndr'i hinam angi guɗukoy, ɓi ngi dubun, dideˀ ndra Yonadap mupula ndra di na, i ra sipaka cineˀe.

¹¹ Amma sey ti Nabukodonozor buy madiɗa ngi Babiloŋ mitiɓa hirwuy na, ndr'i ɓam: ‹Zuwen ndra macam nga Zeruzalem, ɓa i laham avu Babiloŋhoy ati Siriheye.› Dar i pam a Zeruzaleme so.»

¹² Akẽh na, Bumbulvuŋ a ɓa Zeremi na:

¹³ «Bumbulvuŋ misi gidaŋ wãˀ, Buymisemuŋ ngi Israyele, a ɓi: ‹A ra ɓa mizli Zudahay ati mizli Zeruzalemeye na: mingiɓi ɗu ya madubunukum di na, ki tiɓaka le, ɓa ki jaka a hirnga muduba sukwa? -I ya Bumbulvuŋ maɓi.

¹⁴ Mbaazla, Yonadap mangal ngi Rekap mitika ziri naŋhay ɓa a sam ta na, a cinam mi le: vurˀe, a sam mbaazla ɗaˀ ta wãˀ hã dana, ɓi ngi dideˀ taŋ mudubuna taŋ di na, a jaka le a hirnga. Na ya Buymisemuŋ, i ra ɓukum ko mbak le anta ngbaŋ, amma ko ki cinikiy di ta.

¹⁵ I slinukum gawla mijiviɗ ɗuwoyo, ko mbak le anta, a ɓukum: ‹Mbur gar na, anja a mbiɗa kpak ngi vu naŋ malambaˀ na, haˀaw, ɗiyaka hiri ngi gwat ngi gi kumoyo. Ki ram ti sipi kulihey ɓa ki huruk hurukam a mbuŋ taŋ ta, yo kum ndiram asi ruwuy ya muvulukum di da kum waɗ da dideˀ kumoy na!› Amma ko ki jikam slimiɗ asi mingiɓi ɗu ta, ko ki cinikiy di ta.

¹⁶ Ziri ngi Yonadapaya, mingiɓi ngi dideˀ taŋ mupula taŋ di na, taŋ ara sipakaŋ, amma kum mizli Zudahaya, ko kum anta cinikiy mi ɗu ta.

¹⁷ Vurˀe, Bumbulvuŋ misi gidaŋ wãˀ, Buymisemuŋ ngi Israyel a ɓi na: ‹Yo mbak ɗagay so! Bonoy ya ɓi micica ɓi nah ngisa ga taŋ di gar na, i sa go taŋ ng'ar Zudahay waɗ ng'ar Zeruzalemey gar. Asi yi ɓa taŋ ɓi na, ko a cinikiy di ta, yo i zila taŋ na, ko a zilikiy mi ta.»

¹⁸ Akẽh na, Zeremi a ɓa muy ngi Rekapiheye: «Bumbulvuŋ misi gidaŋ wãˀ, Buymisemuŋ ngi Israyel a ɓi na: Keɗ keɗ na, ki ra cinaka mi da dideˀ kum Yonadapa, ki jaka mingiɓi naŋ mudubunukum di na le cek a hirnga, yo ɓi naŋ muɓukum di ɗaˀ le gar na, ki gam di slra le kuy kuy wãˀa,

¹⁹ na, da kine na! ya Bumbulvuŋ misi gidaŋ wãˀ, Buymisemuŋ ngi Israyele, i ɓi na: Yonadap, mangal ngi Rekapa, mbur ngi cici deŋ a mbuŋ ɗu, anta sa kic kic le a hay naŋ ta ndiɗaˀ wãˀ.»