ZEREMI 34 - Bible en langue guiziga

Bumbulvuŋ miɓa buy Sedekiyas

¹ Nabukodonozor, buy madiɗa ngi Babiloŋ ati soje naŋhay gar, yo zuma buyoy naŋ miwa taŋ ngi si ruwuy gar waɗ mizli gar na, a ndahaka Zeruzaleme le ndah ndah ati prok naŋhaya gar. Bumbulvuŋ a ɓa mingiɓi naŋ da Zeremi ti di nah.

² Bumbulvuŋ Buymisemuŋ ngi Israyele, a ɓi na: «A ra luuma Sedekiyas buy Zuda, yawwa, ɓaŋ ani kuy kuy: Bumbulvuŋ a ɓi na: i wuɗ i vula walahay hana asi haŋ ngi buy madiɗa ngi Babiloŋ, a sa ɗuvaŋ vu div ɓa a wur.

³ Ka Sedekiyasa, k'anta kisa lih ava ta, a sa juw, a gi ti kaɓa naŋ mawuɗo. Ka, kisa zliram hiri tataˀ ati buy madiɗa ngi Babiloŋ, a sa ɓuw ti mi naŋ, joˀ kisa ru nga Babiloŋ.

⁴ Gar ti nah kwana, Sedekiyas buy Zuda, cine mingiɓi ngi Bumbulvuŋ. Bumbulvuŋ a ɓi vur ka na: ‹Muc ɗike, anta ti kiɗ ti maslalam ta.

⁵ Ki sa muc ar wuya, a sa wuram urdi vur ka, kaɓa taŋ muwuram vur dideˀ ɗikey, buy mudumbuŋhoy ar ka na, a sa tuwukuw vagay ɗik ani: ‹Aw buy ɗu ma!› Haˀaw, i ɓa le njah kahana. I ya Bumbulvuŋ maɓi.»

⁶ Mijiviɗ Zeremi a ɓa ɓi hana cek a mbuŋ Sedekiyas, buy Zuda a Zeruzaleme.

⁷ Hirak ti nah vuna, naɓa soje ngi buy madiɗa ngi Babiloŋhoy a ndahaka walahay Zeruzaleme le waɗ walahay mucuw ngi Zudahay, Lakis ati Azeka, t'ada aruŋ, walahay Zudahay muguno ti moholoy misi t'ada aruŋ na i taŋ.

Beke mupulahay, buy taŋhay mijaka taŋ a muŋ

⁸ Yo Bumbulvuŋ a ɓa Zeremi le ma: a dirba buy Sedekiyas munhurukom ˀay ati mizli ngi Zeruzalemey gar ngi pula bekeheye ti mi.

⁹ Sey mbur gar a pula beke naŋ, mbur Hebere, ko da i mbur zil malla i ngwasa, yo anja mbur a gi beke ti sukum naŋ mbur Yude mata.

¹⁰ Akẽh na, mizli madiɗahay gar ati mzili gar mungiɓam ˀay ngi pula beke taŋhaya ti mi, beke mizile ati mongoso, anja a gam taŋ beke mata tuwa na, a jaka ɓi nah le kuy kuy, dar a pulaka beke taŋhaya.

¹¹ A dirba nah ma na, a mbuɗoko ng'ar wuluk taŋ misi zleˀe a muŋ, a moko ti beke taŋhay, taŋ mupulaka taŋ zleˀe tuwa, a muŋ, beke mizile ati mongosohoyo, a gam taŋ beke a muŋ.

¹² Akẽh na, Bumbulvuŋ a ɓa Zeremi na:

¹³ «Ya Bumbulvuŋ, Buymisemuŋ ngi Israyele, i ɓi na: Ti ya mubo ti dideˀ kumoy tir beke baɗ a ruwuy Ezipte na, i ngiɓamˀay le ati taŋ, i ɓa t'ani:

¹⁴ «Vi tarnaˀ migi le na, mbur gar a sa pula sukum naŋ, mbur Heber, naŋ mihiɗika zleˀe na, a gi beke naŋ vi merkeɗ, a dirba nah, a sa pulaŋ.» Amma dideˀ kumoy a cinikiy di ta, a jikam slimiɗ asi mingiɓi ɗu ta.

¹⁵ Amma dana, kumo ki mbiɗaka mevele le, ki ra gam gwat mijeŋŋe a mihiri ɗu, mbur gar ar wala kumo, a ɓi njah ngi pula beke naŋ, mbur taŋ misi asi ruwuy purla. Yo ki ngiɓamˀay vuna ma na a mbuŋ ɗu, angi hay matilam mi ti slimiɗ ɗu na.

¹⁶ Amma kumo, ki mam murdirba a muŋ, joˀ ki hiryaka slimiɗ ɗu. Mbur gar asi kumo, beke naŋ mizile ati mongoso, naŋ mupula le zleˀe tuwa, a mo di a muŋ, joˀ ki gam taŋ beke a muŋ ma.

¹⁷ Bumbulvuŋ a ɓi na: «Yo mbak ɗagay so, anja zleˀe ki tilam mi ti ɓi ngi pula sukum kumoy, kum misi angi hirwuy purla na, amma ani ki cinikiy mi ta. Na ya, yi sa til mi ti ɓi ngi pul kum mbak da maslalam, da jiji mozorbono waɗ da may a ngizlukum. I sa ga ɓa zumabuy ngisi ruwuy kurzluˀ gar mupurukum le na, a zluwunam ti ɓi kumo kirkir. I ya Bumbulvuŋ maɓi.

¹⁸ Ɓi ngi jumoˀay ɗu ati kum a mbuŋ ɗu, kum muwurslukaka zuŋ sla wurasl a wuzla cuw, dar ki cohom tir wala ngi zuŋ sla muwurslak tuwa na, mizli mijaka ɓi nah a hirnga ta na, i vula taŋ ɓa a jaka taŋ.

¹⁹ I mizli madiɗa ngi Zudahay ati ngi Zeruzalemey, mizli ngi mamay buyoy, masayay, miwi li ngi guvahay ati mizli gar mucohom ar wala ngi zuŋ sla muwurslak wuzla cuw tuwa,

²⁰ i vula taŋ asi haŋ ngi mesene taŋhay, asi haŋ ngi mizli mawuɗam ziza hutuŋ taŋ na. Vagay taŋhay a sa tiram gwat ngi zum da ɗiyuw ngi ɓuhoy waɗ da gwat misãmi ngisi ruwuyoy.

²¹ Sedekiyas, buy Zuda ati mizli ngi mbuŋ naŋhaya kwana, i vula taŋ asi haŋ ngi mesene taŋhay, asi haŋ ngi mizli mawuɗam ziza hutuŋ taŋ, waɗ asi haŋ ngi soje ngi buy Babiloŋhoy mupulaka ndaha hirnga kum wureˀ aruŋ na.

²² I sa pula taŋ jiviɗ, a mbuɗoko hiri pulaˀ a muŋ ng'ar walahay hana, a sa ndahaka ndah, a sa tiɓakaŋ, a sa ɗuvakaŋ vu div a wur, i sa tiri ti walahay Zuda daŋ daŋ, njololoŋ manja mizli. I ya Bumbulvuŋ maɓi.»