ZEREMI 33 - Bible en langue guiziga

Ɓi miɓa ɗaˀ le vur Zeruzalem

¹ Ti Zeremi muro giceˀ a wazlaray sojehey aruŋ tuwa na, Bumbulvuŋ a ɓaŋ ani ava ma.

² Bumbulvuŋ miga gwatay, Bumbulvuŋ miɗiya gwatay, ɓa t'ada nga taŋ nga taŋ a ɓi na, slimiɗ naŋ Bumbulvuŋ:

³ Ziliy, i sa ziluw mi, i sa njikuw gwat madiɗahay, gwatay muɗum, ka misina taŋ ta.

⁴ Haˀaw, Bumbulvuŋ Buymisemuŋ ngi Israyele, a ɓi vur hayay misi ar walahay hana, vur hay ngi buy Zudahay, taŋ cek a sa mbizlam, yo a ɓi vur masa ndahaka hirnga ngi walahaya, ngi kiɗa mizli ngi raˀahaya ti maslalam:

⁵ Mizli a sa ram nga kiɗa vu ati Babiloŋhoy na, ngi naha hay taŋhay mbaf mbaf ti vagay ngi mizli na si, vagay ngi mizli, ji mevel ɗu ati slikiɗa himaˀ ɗu fõh fõh masa kiɗa taŋ na, asi i sa mbiɗa duba da walahay nah vur moˀore naŋ miga gar.

⁶ Amma i sa ki slimiɗ ar walahay nah, i sa mbulo mizli, i sa biga taŋ cifi muzuy zuy wãˀ, manja zluwun.

⁷ Mizli Zuda ati Israyel mijahay nga hirwuy mulak na, i sa mo taŋ, i sa cifa taŋ ar li taŋ ka misi zleˀe a muŋ.

⁸ Mungra taŋ madiɗahay migikiy taŋ gar, mici taŋ ar dili na, i sa zuɓa taŋ di avra. Mungra madiɗahay mitiri taŋ i misi dili hey avu ya na, i pula taŋ di cek avra.

⁹ Naŋ kine, Zeruzaleme, i sa zila slimiɗ naŋ ti mumul, a sa tiri avu ya i ɓi ngi dudok, i gwat ngi wuya avu sukwi ngi mizli ngi si ruwuyoy gar. Asi taŋ masa cinaka ya maga mezle da Zuda waɗ da Israyel na. Zlili gar ati ya masa ga ɓa a ndiram ar ndum gar na, hã a sa siˀitam, a sa jijikam kirkir vurˀe.

¹⁰ Bumbulvuŋ a ɓi na: «Kum maɓam vur li hana, a tiri diŋ le hilgim, mizli malla ko ginewey anta ara ta, yo ar walahay Zudahay ati jiviɗ madiɗa ngir Zeruzalemey mindiram daŋ daŋ, mizli anta, mizli ngi raˀahay ati ginewey anta tuwa na, a sa cinam ma na,

¹¹ ˀay ngi zluzluɓ, salalay, dimis ngi mbur mazuɓ ngwas ati mumul ngi ngwasa, waɗ dimis ngi mizli ma ram ti mikuli ngi hunuma vu ar hay ngi Bumbulvuŋ, a sa zlaka na: ‹Mumuloko Bumbulvuŋ misi gidaŋ wãˀa, asi naŋ mezle, yo gi teŋteŋ naŋ hã ngi sete.› Haˀaw, i sa mo ti mizli ngisi ruwuy hana a muŋ, a sa tiri kaɓa naŋ misi zleˀe a muŋ.» I ya Bumbulvuŋ maɓi.

¹² Bumbulvuŋ misi gidaŋ wãˀ, a ɓi na: «Ar li misenna mitiri diŋ, ko mizli, ko ginewey anta, yo ar walahay naŋhay gar na, a sa gi gezleŋ ngi ginewey ada muduba, mijiginey a sa gicaka tumuŋ ati ˀaw taŋhay ara, ɓa a musukom vu.

¹³ Ar walahay vay muwãhay, ar walahay ngir mukutukoy, hirwuy vay ngi ruwuyoy, ar hirwuy ngi Benjameŋ, ar prok ngi Zeruzalemey waɗ ar walahay Zudahay na, tumuŋ ati ˀawaya, a sa gam girɗiɗi a mbuŋ mijigin taŋ maslufa taŋ. I Bumbulvuŋ maɓi.

Gwat Buymisemuŋ miɓa le ɗaˀ le na, naŋ anta sa mbiɗa mata

¹⁴ Hin ara ndilawa, tapasa, i sa ga gwat ya miɓa ɗaˀ le da jum ngi Israyeley waɗ da jum ngi Zudahay na. I ya Bumbulvuŋ maɓi.

¹⁵ Ti di nah, kalla vuna si na, i sa vula mangal da Davite, mangal ngi kwacay naŋ, a sa cik vu a hirnga ɓimujuwa mitaˀ gar waɗ gi jeŋŋe asi ruwuyo.

¹⁶ Tapasa, Zuda a sa luuma hirnga naŋ, yo Zeruzalem a sa cifi manja zluwun. Slimiɗ masa cakaŋ di ani: «Bumbulvuŋ, gi jeŋŋe ndra i naŋ.»

¹⁷ Bumbulvuŋ a ɓi na: «Tizer ngi Davite, anta sa kic ngi cifi ar janga ngi buy ar Israyele ta ndiɗaˀ.

¹⁸ Ar tizer ngi Levi, masay ngi cici a mbuŋ ɗu, ngi gi mikuli mizlam zlam, ngi wura gwat ngi vuloy waɗ ngi gi mezegwel vur hin gar na, anta sa kic ta ndiɗaˀ.

¹⁹ Bumbulvuŋ a ɓa mingiɓi naŋ ani da Zeremi:

²⁰ «Ya Bumbulvuŋ i ɓi na: Jumoˀay ndra ati papas waɗ duvuɗo, ɓa papas a gi mata, yo ɓa duvuɗ a ji mata na, ki ngilaka gu kwa?

²¹ Da kanah na, jumoˀay ɗu ati gawla ɗu Davite a sa ngil aya, naɓa naŋ anta sa lum dideˀ ngi cifi ar li naŋ mata. Yo vur jumoˀay ɗu ati Levihey masay waɗ mizli madiɗa migi ngi slra ɗuwoy na, a sa gi i misi purla.

²² Dideˀ ngi Davitey ati Levi, mizli madiɗa ngi slra ɗuwoy na, i sa ska taŋ a slufam ta, kaɓa wurzlaŋhay a muŋ maslufam ta, yo kaɓa muyuŋ ar mubuliy mawi gu ta na ya.»

²³ Bumbulvuŋ a ɓa Zeremi na:

²⁴ «Mizli tayna a waka na, kaɓa ya Bumbulvuŋ i zliɗa sukwi muwuna mucuwoy na le zlaɗ, ki ra pura takwa? Yo ma na, ara puraka mizli ɗuwoyo hiris le kaɓa i sukwi avu taŋ mata.

²⁵ Na ya Bumbulvuŋ i ɓi na: Ya mujumˀay ati papas waɗ ati duvuɗo, yo ya miɗiya gwatay ɓa a gam ti jiviɗ naŋ a muŋ waɗ a ruwuy na,

²⁶ dideˀ ngi Zakop ati ngi gawla ɗu Davite, ɓa i zliɗa taŋ avra na, a gi kwa? Sukwi ngi Abraham, ngi Izak waɗ ngi Zakopo, i pula wini mizli a wuzla taŋ ngi cifi buy ar taŋ teˀ sukwa? Kanah ta ndiɗaˀ wãˀ! I sa mo taŋ ng'ar li taŋ muŋ, asi i pura taŋ geˀ ircece.»