ZEREMI 32 - Bible en langue guiziga

Zeremi mihiɗik guva a Anatot

¹ Angi vi mukuruˀ naŋ ngi zumabuy ngi Sedekiyas asi ruwuy Zuda na, Bumbulvuŋ a ɓa mingiɓi naŋ da Zeremi, naɓa i vi mukuruˀ nga dangafaɗ naŋ ngi zumabuy ngi Nabukodonozor.

² Ngi hin nah na, soje ngi Babiloŋhoy a ndahaka Zeruzaleme ndah, naɓa Zeremi i migica le giceˀ a wazlaray sojehey a hay buy Zuda.

³ Migicaŋ i Sedekiyas, buy Zuda, a mbiɗaŋ hirnga, a ɓaŋ: ki til miki ɓi na: «Bumbulvuŋ a ɓi: I sa vula walahay hana asi haŋ ngi buy madiɗa ngi Babiloŋ, a sa tiɓaŋ.

⁴ Sedekiyas, buy Zuda, naŋ anta sa lihi avu gidaŋ ngi Babiloŋhoyo ta, amma a sa ci asi haŋ ngi buy madiɗa ngi Babiloŋ cummo, a sa ra ɓaŋ ti balam naŋ, yo a sa ra puraŋ ti hiri naŋ.

⁵ Bugawla a saka Sedekiyasa ɓaˀ a mbuŋ nga Babiloŋ. A sa ndir a diga, hã ya misa ki slimiɗ le anga. Da ki ɓam le ki slam himaˀ avu Babiloŋhoyo na, kisa giram di i vu kum ngataraŋ. I ya Bumbulvuŋ maɓi.»

⁶ Zeremi a slufa ɓi naŋ, a ɓi ani: Bumbulvuŋ a ɓiy na:

⁷ «Sukum ɗik Hanameyel, mangal ngi jamba ɗik Salumo naŋ da ra sawa, a sa ɓuw na: ‹Hiɗika guva ɗu misi a Anatot na, asi muzuma haya i ka, yo misi ti jiviɗ ngi mbiɗa hirnga ngi guva i kaha.›»

⁸ Hanameyel, sukum ɗu ngi jamba tuwa, a so ng'avi ya, a wazlaray sojeheye, kaɓa Bumbulvuŋ miɓiy di zleˀe tuwa, dar a ɓiy: «Hiɗika guva ɗu misi a Anatot, angi hirwuy ngi Benjameŋ na, asi muzuma hay i ka, yo misi ti jiviɗ ngi mbiɗa hirnga ngi guva i kaha, hiɗika so.» Akẽh na, i cine le kwaŋ muduba, i Bumbulvuŋ maɓiy.

⁹ Dar yi hiɗika guva avu Hanameyel mangal ngi jamba ɗu, guva misi a Anatot tuwa. I slufaŋ dala ngi cikili naŋ, i vulaŋ suloy moyom kuruˀ nga tarnaˀa.

¹⁰ I ga ɗerewol ngi cikili naŋ, waɗ haŋ ɗu taˀ ara ti gwat ngi ɗuva haŋ ɗu, i wa dala nah ti kilo a mbuŋ sedewohoy, ya muzulo taŋ.

¹¹ I zuɓa ɗerewol ngi cikili ngi guva, misi mislirɓa mi naŋ le, ɓi miɓa ɗaˀ le ati ɓimuɗuva misi anga na, waɗ misi mi naŋ baŋ.

¹² Joˀ i vula ɗerewoloy tuwa cuw taŋ da Baruk, mangal ngi Neriya, dideˀ ngi Maˀaseya, i vula taŋ mur Hanameyel mangal ngi jamba ɗu, yo mur sedewohoy muɗuvaka haŋ ar ɗerewol ngi cikili ngi guva, waɗ mur Yudehey gar misi a mamay, li ngi mijigina mamayay.

¹³ Dar i ɓa Baruko ɗaˀ le mur taŋ:

¹⁴ «Bumbulvuŋ misi gidaŋ wãˀ, Buymisemuŋ ngi Israyele, a ɓi na: ‹Ɗerewol ngi cikili ngi guva, misi mislirɓa mi naŋ, waɗ misi mi naŋ baŋ hana, tiɓa taŋ, pa taŋ sek ar tutuŋ muzlumaŋ, ɓa t'ada ndiram weˀ vu.

¹⁵ Asi mike na, Bumbulvuŋ misi gidaŋ wãˀ, Buymisemuŋ ngi Israyel a ɓi na: «Asi ruwuy hana, hayay, guvahay waɗ guva ngi widiseye, ada sa hiɗikam aruŋ si.»

Dira dibiɗ ngi Zeremi

¹⁶ A dirba ya muvula ɗerewol ngi cikili ngi guva da Baruk mangal ngi Nereya tuwa na, i tumbulo Bumbulvuŋ, i ɓaŋ:

¹⁷ «Haˀaw Bumbulvuŋ Buymisemuŋ, miga muŋ ati hirwuy i ka ti gidaŋ ɗik mihaɗa na, ki puska gidaŋ ɗike le pusak, ko gwat mutuwaˀ haɗa avu ka anta.

¹⁸ Ki biga gi mezle ɗike, hã avu dideˀ dideˀ durmuku. Amma ziri, mungra ngi miyi taŋhay migaka na, ki pula ɓa mawurkaka i taŋ. Ka Bumbulvuŋ madiɗaŋ, miwirwir ngi vurumo, slimiɗ ɗike: Bumbulvuŋ misi gidaŋ wãˀ!

¹⁹ Ki mukuti vu mupuɗaw wãˀ, migidaŋ ngi gi gwata, ki ro hiri taˀ ar gwat ngi gi ngi mbur gar, yo ki gi ti mburo gar weˀe avu kpak naŋ, weˀe avu gwat ngi gi naŋ.

²⁰ Angi hirwuy Ezipte, ki biga vu ɗike le ti gwat migam ɗaˀ tahay, i gwatay misi hã dana kwana, t'ada puɗaw aruŋ. Ki ga le ɓa slimiɗ ɗik a zil asi ruwuy Israyel waɗ a wuzla mizli gar, kaɓa ndra mapuraka ani dana na.

²¹ Israyel, mizli ɗikeye, ki bo taŋ le tir beke, ki biga taŋ vu ɗike le ti gi gwat migam ɗaˀ tahay mupuɗaw puɗawaya, ti gidaŋ ngi hirbazla ɗiki, ki puska gidaŋ ɗik mihaɗa na le pusak wãˀ.

²² Hirwuy ka miɓa ɗaˀ le ti hudum da cine taŋhay, hirwuy misi ɗuwa ati mal maɓulom ara na, ki vula taŋ di le.

²³ A cam le, yo a pam le anga, amma so na, a cinaka mingiɓi ɗike ta, ɓi ka mudubuna taŋ di na, a sipaka ta. Gwat gar ka mucufuɗa taŋ ɓa a gaka na, a ngumam gi naŋ ta. Ka mica taŋ ar mendre tayna cek na vurˀe.

²⁴ Ani Babiloŋhoy a mbaka muyuŋ le mbeˀ mbeˀ, hãka ngi ndila moholo ngi walahaya si, taŋ gweˀ ngi tiɓi naŋ. Yo ma na, a sa vulaka walahay asi haŋ taŋ, a gucoko mi le da walahaya ti maslalam, ti may waɗ ti jiji mozorbono, i taŋ masa tiɓaka ti gidaŋ. Ɓi ka ɓi micica le na, a gi, ka ki pura ti hiri tewle.

²⁵ Bumbulvuŋ Buymisemuŋ, na miɓiy ya: ‹Hiɗik guva, i wa dala ngi cikili nah weˀ le ti kilo a mbuŋ sedewohoy› na, i ka takwa! Dambalaka walahay vuna i muvula le asi haŋ ngi Babiloŋhoy ngbaŋ.»

Buymisemuŋ mimbiɗa mingiɓi da Zeremi

²⁶ Akẽh na, Bumbulvuŋ a ɓa Zeremi:

²⁷ «Ya Bumbulvuŋ, yi Buymisemuŋ ngi gwat gar mamusuwun. Gwat mutuwaˀ haɗa avu ya ada kwa?

²⁸ Ya Bumbulvuŋ i ɓi na: i sa vula walahay hana asi haŋ ngi Babiloŋhoy waɗ asi haŋ ngi Nabukodonozor, buy madiɗa ngi Babiloŋ. A sa tiɓa da naŋ.

²⁹ Mizli Babiloŋhoy masa zlaka kiɗa vu ati walahaya, a sa cam, a ɗuvaka vu div div da walahaya, a wuraka jom ati hayay misi mawuram gwat ngi vul taŋhay da Baˀal ar taŋ, yo mapuslam mbaazla da kulihey ar taŋ ngi jiy mevel na.

³⁰ Haˀaw, diga cak taŋ si na, gwat ya mahĩyã na, Israyeley ati Yudeheye, a gikiy di ɗaˀ ta, gwat ngi gi ngi Israyeleye, sey ngi jiy mevel tewle.

³¹ Walahay Zeruzalem nah na, zle angi ɗuva virzi naŋ hã wurenna, ara giy gwat ngi ji mevel, gwat ngi slikiɗa himaˀ fõh fõh. I sa ɓula taŋ a mbuŋ ɗu avra,

³² asi malambaˀ ngi Israyeley ati ngi Zudahay migaka taŋ gar, a gikiy gwat ngi ji mevel le, taŋ vuna, buy taŋhay, mizli madiɗa ngi slra taŋhay, masay taŋhay, mijiviɗ taŋhay, taŋ Zudahay ati mizli misi a Zeruzaleme.

³³ A mbiɗikiy di i duba, mbak mbuɗo hiri ng'avi ya le jaka. I ra dubuna taŋ gwata, ko anta mbak le ta ngbaŋ kwana, anta cinam ta, anta tiɓaka dubun ɗu ta.

³⁴ Kuli taŋ mukuy tahay wãˀ na, a paka taŋ ar hay mazilaka slimiɗ ɗu anga na, ɓa a tiram di hay misi dili.

³⁵ A ɗiyam li miɗingir le ngi mikuli da Baˀal ar hurjijiŋ ngi Hinom, ɓa a zlumaka ziri taŋ mizile ati mongosohoy da kuli Molek ara, ko i cufuɗa taŋ gwat kanah ɗaˀ ta ngbaŋ, gwat malambaˀ muwãˀ nah ngi hizigiɗa Zudahay na, ko yi wuluk ɗaˀ ɓa a gaka ta.»

³⁶ Bumbulvuŋ, Buymisemuŋ ngi Israyel a ɓi: «Yo mbak ɗagay so! Walahay kum maɓam i mitiɓa le da buy madiɗa ngi Babiloŋ ti maslalam, ti may waɗ ti mozorbono na,

³⁷ i sa cikilo hirnga taŋ tisi ruwuy gar, ya mizliɗa taŋ hirnga mber mber nga diga ti mevel, waɗ ti himaˀ fõh fõh haɗa na. I sa mo taŋ nga diga, i sa cifa taŋ, a ndiram setete.

³⁸ A sa ndiram i mizli ɗuwoy, ya kwana, i sa ndir yi Buymisemuŋ taŋ.

³⁹ I sa ga ɓa mevel taŋ ati wuluk taŋ, a tiri purla, ɓa a cinikiy mi ndrehhe, ɓa taŋ a ndiram ar wuya waɗ dideˀ taŋhay a dirba taŋ.

⁴⁰ I sa ɗiyam ɓi ngi jumoˀay ati taŋ ngi wãˀ: y'anta sa pula ga taŋ mezle mbak le mata, i sa ga ɓa a cinikiy mi kuy kuy, ɓa a baˀam avu ya baˀ le mata ndiɗaˀ wãˀ.

⁴¹ Masa ciriy hiri da ya, i ya masa mba taŋ ti gi mezle na. Haˀaw, i sa ga ɓa a cifam hǝɗ hǝɗ ngi wãˀ gisiŋ angi hirwuy hana, i sa ga ti mevel ɗu wãˀ, ti membezleŋ ngi vu ɗu wãˀ.»

⁴² Bumbulvuŋ a ɓi: «Haˀaw kaɓa ya muso ti mendere madiɗahay gar nga hirnga mizli hanayna na, gi mezlehey ya ɓi micica ɓi nah ngi ga taŋ di gar na, i sa ga taŋ di cek cek kanah ya.

⁴³ Hirwuy hana kum maɓam: ‹Naŋ daŋ daŋ, mizli ati ginewey anta ara ta, yo i muvula le da Babiloŋhoy› tuwa na, a sa hiɗikam guvahay anga.

⁴⁴ A sa wam dala ti kilo ngi hiɗika guva, a sa tohom ɗerewol ngi cikili ngi guva, a sa ɗuvam haŋ taˀ taˀ angi ɗerewol a mbuŋ sedewohoy miziloko taŋ le. Hana gar na, a sa gi asi hirwuy Benjameŋ, ar prok ngi Zeruzalemey, angi walahay Zudahay, hirwuy ngi muwãhay, hirwuy vay mukutukoy ati hirwuy vay ruwuyoy, asi i wuɗ i mo taŋ nga ruwuy taŋ a muŋ I ya Bumbulvuŋ maɓi.»