ZEREMI 28 - Bible en langue guiziga

Zeremi ati mijiviɗ Hananiya, maɓi jeŋ i wa asi taŋ ka

¹ Arvi nah na, angi zli virzi ngi zumabuy ngi Sedekiyas, buy Zuda, kiya muzlum ngi vi mumufaɗ naŋ na, mijiviɗ Hananiya mangal ngi Azur, mbur miya cak a Gabaˀoŋ, a ɓiy ya ar hay ngi Bumbulvuŋ, a mihiri masayay ati mizli gara:

² «Bumbulvuŋ misi gidaŋ wãˀ, Buymisemuŋ ngi Israyele, a ɓi na: ‹I wuɗ i ngila galalaŋ ngi buy madiɗa ngi Babiloŋ.

³ Angi vi cuw keslsle mindir na, vur hin gar na, gazlangahay ngir hay ngi Bumbulvuŋ, Nabukodonozor, buy madiɗa ngi Babiloŋ mihila taŋ baɗ aka zleˀe nga Babiloŋ na, i sa mo taŋ a muŋ.

⁴ Naŋ kine ma, Yekoniya, mangal ngi Zoˀakim, buy Zuda ati mizli Zudahay gar mija taŋ nga Babiloŋ na, i sa mo taŋ a muŋ, asi i ra ngila galalaŋ ngi buy madiɗa ngi Babiloŋ muduba. I ya Bumbulvuŋ maɓi»

⁵ Mijiviɗ Zeremi a mbiɗa da mijiviɗ Hananiya daˀ a mbuŋ masayay ati mizli gar, muroko dedeŋ dedeŋ ar hay ngi Bumbulvuŋ,

⁶ a ɓa taŋ: «Amin! Anja Bumbulvuŋ a ga kanah! Anja Bumbulvuŋ a kiɗa mi ngi ɓi ka minjika na wãˀ muduba, anja a mo ti gazlangahay ngir hay ngi Bumbulvuŋ ti Babiloŋ jom ati mizli mijahay nga diga na gar!

⁷ Na so na, mingiɓi ani, ya maɓuw di da ka waɗ da mizli gar na, cine kuy kuy:

⁸ Mijiviɗey migam slra dumbuŋ ar ndra ati ka na, a tilam mi le diga zlezle ti ɓi vur hirwuyoy mbeˀ mbeˀe, waɗ vur zumabuy madiɗahay, a tilam mi le ti ɓi ngi vurum, ɓi ngi hiryi waɗ ngi jiji mozorbono.

⁹ Amma mijiviɗe, da naŋ mira njik ɓi, a til di i mi ti ɓi ngi zuy na, ɓa a sa sinakaŋ i mijiviɗ Bumbulvuŋ mislino di gisiŋ na, sey da ɓi naŋ manjika vuna migi le far.»

¹⁰ Akẽh na, mijiviɗ Hananiya, a cuko galalaŋ misi asi ˀay ngi mijiviɗ Zeremi tuwa, a ngilaŋ.

¹¹ Dar mijiviɗ Hananiya a ɓi a mbuŋ mizli gara: «Bumbulvuŋ a ɓi na: angi vi cuw keslsle mindir na kwana, i sa ngila galalaŋ ngi Nabukodonozor, buy madiɗa ngi Babiloŋ, i sa cuko avra tisi ˀay ngi sukwi ngi mizli gar.» Joˀ mijiviɗ Zeremi a cuh gwat naŋ.

¹² Hananiya mingila galalaŋ misi asi ˀay ngi Zeremi tuwa na, a dirba nah, Bumbulvuŋ a ɓa Zeremi:

¹³ «A ra ɓa Hananiya na: Bumbulvuŋ a ɓi: Ki ngila galalaŋ ngi dumoyo le, na ɗiyi galalaŋ ngi ɓirihey ar deɗe taŋ so.

¹⁴ Asi mike na, Bumbulvuŋ misi gidaŋ wãˀ, Buymisemuŋ ngi Israyele, a ɓi na: ‹Ɓa sukwi ngi mizli gar a gam gawla ngi Nabukodonozor, buy madiɗa ngi Babiloŋ na, sey i luwa taŋ asi ˀaya i galalaŋ ngi ɓiri. A sa gam gawla naŋ, ko gwat misãmi ngi ɓuhoy kwana, i vula taŋ le asi haŋ naŋ.›»

¹⁵ Dar mijiviɗ Zeremi a ɓa mijiviɗ Hananiya tuwa: «Hananiya, cin ɗi, i Bumbulvuŋ mislino ka ta, mapa mi da mizli hanayna ɓa a tiɓam ɓi ngi slir na, i ka.

¹⁶ Bumbulvuŋ a ɓi na, yo mbak ɗagay so: i sa ɓuluw avra tisi ruwuyo, kisa muc tumbulumna, asi ka mitil mi ɓa mizli a slikiɗam ɓi avu Bumbulvuŋ na.»

¹⁷ Mijiviɗ Hananiya a muc kalla ngi vi nah, angi kiya mitarnaˀ naŋ.