ZEREMI 24 - Bible en langue guiziga

ˀUruf kiɗgil cuw

¹ Yekoniya mangal ngi Zoˀakim, buy madiɗa ngi Zuda ati mizli madiɗa migi slra ngi Zudahaya, mizli misina ɗiya gwatay waɗ miɗiya faɓuruhoy cek na, Nabukodonozor, buy madiɗa ngi Babiloŋ, a ja baɗ ti Zeruzaleme nga Babiloŋ. A dirba nah, Bumbulvuŋ a bigiy uruf kiɗgil cuw, taˀtaˀ gweˀ gweˀ cuw taŋ arleˀe, ar hay ngi Bumbulvuŋ.

² Kiɗgil pal numuŋ ti yi ngi ˀuruf mimezlehey teˀe, mepiɗece naŋhay aruŋ, amma lelek mekeleme, ti yi ngi ˀurf malambaˀwãˀ, mimalambaˀ muwãˀ naŋ, a zum ta.

³ Dar Bumbulvuŋ a ɓiy na: «Ki pur mike Zeremi?» I mbiɗaŋ di: «I pur yi ngi ˀUrufu. Sukwi ngi ˀuruf mezle na, i mezlehey haɗi teˀe, yo sukwi ngi ˀuruf malambaˀa, i malambaˀ muwãˀ naŋ, a zum ta.»

⁴ Dar Bumbulvuŋ a ɓiy ma ni:

⁵ «Ya Bumbulvuŋ, Buymisemuŋ ngi Israyele, i ɓi na: yi ngi ˀuruf mezlehey, mapuram kuy avu hiri ani na, mizli mijahay ti Zuda, ya muɓula taŋ tir li hana nga Babiloŋ na, yi ra pura taŋ ircece ya.

⁶ I sa ɗuva hiri taˀ avu taŋ ngi mezle, yo i sa mo taŋ a muŋ ng'asi ruwuy hana. I sa ndira taŋ ti ndir muduba, y'anta sa waha taŋ ti wuh mata, i sa hirva taŋ ti hirvi muduba, y'anta sa muɗa taŋ avra mata.

⁷ I sa vula taŋ lesl, ɓa a sinikiy. Haˀaw, ya i Bumbulvuŋ, joˀ taŋ a sa tiram mizli ɗuwoy, yo ya kwana, yi sa tiri Buymisemuŋ taŋ ya. I taŋ masa moko ng'avi ya ti wuluk ngi mevel taŋ wãˀ.

⁸ Ya Bumbulvuŋ i ɓi na, yi ngi ˀuruf malambaˀ, mukuyta wãˀ, a zum ta tuwa na, gwat magakaŋ di na, i gwat mupurla ya masa ga da Sedekiyas, buy Zuda, da mizli madiɗa ngi slra naŋhay, da Zeruzalemey gar mindirama, yo da mizli mindiram asi ruwuy hana waɗ da mizli mucufa ngi si ruwuy Ezipteheye.

⁹ Naŋ kanah, i tiri ti taŋ gwat ngi muɗa didak haɗa wãˀ da zuma buyoy ngi ruwuy gar. Ar li ya mizliɗa hirnga taŋ nga diga nga diga gar na, mizli a sa kiɗam ti taŋ mambaˀ, a sa singiram ar taŋ, yo a sa njiɗaka taŋ dimis, a nisaka taŋ.

¹⁰ I sa pula taŋ mbak da mizli a kiɗaka taŋ ti maslalam, may ati jiji mozorbono, a kiɗa taŋ, hã a ngizlam leɗeɗ wãˀ tisi ruwuy ya muvula taŋ di da taŋ waɗ da dideˀ taŋhay na.