ZEREMI 23 - Bible en langue guiziga

Mizli madiɗa malambaˀhay ati buy milaha vu

¹ Ginew ɗuwoy mitaˀ gezleŋ, mijiginey mapulaka taŋ zlaɗ lambaˀ a zizam na, kay, taŋ ar bonoy! I ya Bumbulvuŋ maɓi!

² Yo mbak ɗagay so, ya Bumbulvuŋ, Buymisemuŋ ngi Israyele, i ra ɓi ani vur mijigina mizli ɗuwoyo: «Mupulaka ginew ɗuwoy mbak, ki zliɗaka hirnga taŋ mber mber, ko ki kam slimiɗ ar taŋ ta na, i kum takwa! Na, ya i wuɗ i ki slimiɗ ar kum, i sa kutukum kuti ngi bonoy, asi gwat ngi gi kum malambaˀ na. I ya Bumbulvuŋ maɓi.

³ Ya na, ginew ɗuwoy mindirama, yi ra cikilo hirnga taŋ tisi ruwuy ya mizliɗa taŋ hirnga gar mber mber na, yi sa mo taŋ ng'ar gezleŋ taŋ a muŋ, ɓa a jam, a sikam haɗa.

⁴ I sa vula taŋ mijigin mezlehey, ɓa a jiginaka taŋ, t'anta sa zluwunam mata, t'anta sa giram kupuyah kupuyah mata, mbur ɓa a sa zilakaŋ slimiɗe, naŋ anta na anta. I ya Bumbulvuŋ maɓi.

⁵ Hin ara ndilawa, tapasa, i sa bo ti mikwanay ngi Davite: i buy mindila zuma buyo le, a sa cik vu a hirnga ɓimujuwa mitaˀ gar waɗ a hirnga ɓi mijeŋŋe asi ruwuyo. I ya Bumbulvuŋ maɓi.

⁶ Ar hin ngi zumabuy naŋ na, kite Zuda a lih le, Israyel a sa cifi setete. A sa cakaŋ slimiɗ ani: ‹Bumbulvuŋ i milih ndra.›

⁷ Haˀaw, hin ara ndilawa, tapasa anta sa ɓam ka misi ani na mata: ‹Bumbulvuŋ misi ti siifa, i naŋ mubo ti Israyeley ti ruwuy Ezipte!› I ya Bumbulvuŋ maɓi.

⁸ A sa ɓam jak na: ‹Bumbulvuŋ mubo ti mizli, mumo ti tizer ngi Israyeley ti ruwuy vay muŋ waɗ tisi ruwuyoy gar, naŋ mizliɗa taŋ hirnga zleˀe nga diga, ɓa a pam asi ruwuy taŋ a muŋ na, naŋ ti siifa.›»

Mijiviɗ ati masayay anta cinaka mi da Buymisemuŋ ta

⁹ Mingiɓi vur mijiviɗey. Didak a muɗiy le, hirgisl ngi vu ɗu gar ara jijik. I tiri le kaɓa mbur miwi le ti mbaazla, kaɓa mbur mbaazla mizizaŋ lesl le. Hana gar na, asi Bumbulvuŋ, asi mingiɓi naŋ mipal na.

¹⁰ Mizli gar i migi madamahay asi ruwuyo. Hirwuy ara tuwuy vagay, asi i minisa le, li zum ngi ginewey a pala, ara muˀul. A wusam vu nga taŋ, sey nga gi malambaˀa, yo a tumom vu nga taŋ, sey ngi gi gwat mibinyaˀ binyaˀ lambaˀ.

¹¹ Mijiviɗey ati masayaya, i miziriɗa mihey: i pura na, a ndilam ti moˀore taŋ na le, hã sesẽŋ ar hay ɗu. I ya Bumbulvuŋ maɓi.

¹² Yo mbak ɗagay so! cikiviɗ taŋhay a sa sliram ti taŋ ŋkek ŋkek, a sa zizam ar luvuŋ, a sa ndilam. Angi vi ya masa mbuɗo hiri ng'ar taŋ na, i sa go taŋ bonoy. I ya Bumbulvuŋ maɓi.

Mijiviɗ malambaˀhay wãˀ mifineˀ ngi Samarihey

¹³ I pur gwat le magiy kuyta wãˀ avu mijiviɗ Samariheye: a njikam ɓi ti slimiɗ ngi Baˀal, dar a zizaka Israyel, mizli ɗuwoyo.

¹⁴ Amma avu mijiviɗ Zeruzalemeye, i pur gwat le mukuyta muwãˀ naŋ ma: a vulaka vu taŋ da madama, yo a gam gwat mikaslsla ta. A jinam is ti gidaŋ asi migi malambaˀhaya: mbak ko mbur mapula gi moˀore anta. Avi ya na, taŋ gar a tiram le rak rak ati Sodomoy, mizli ngi raˀahaya, a bam vu ati mizli Gomoroy.

¹⁵ Yo mbak ɗagay so, ya Bumbulvuŋ misi gidaŋ wãˀa, i ra ɓi ani vur mijiviɗ tayna: «I sa vula taŋ muwuŋ ɓa a sakaŋ, yo i sa lugo taŋ ti yam misi slalak ara, asi hiryi mitiɓa hirwuyo gar na, a bo tivi mijiviɗ Zeruzalemey.

Mijiviɗ misi slirey

¹⁶ Bumbulvuŋ misi gidaŋ wãˀ a ɓi na: «Ki jikam slimiɗ asi mingiɓi ngi mijiviɗey manjukukum ɓihey na ta, a gukum gilaw ti ɓi ngi njaha hiri lambaˀ kine, ɓi taŋ matilam di mi na, i ɓi taŋ mulumaka ar wuluk taŋ tewle, i ɓi mubo baɗ ti balam Bumbulvuŋ ta.

¹⁷ A tumom vu gisiŋ, dar a ɓaka mizli mapuraka ɓi ngi Bumbulvuŋ hiris le na: ‹Bumbulvuŋ a ɓi na: kumo, kisa ndiram zuy zuy! Ko waka gar mangum pula cin ta naŋ na ta tekeɗe kwana, a ɓakaŋ: ‹Ko hiryi anta sa lumuw ta.›

¹⁸ Na i wa asi kumo micici ɗaˀ ar li ngilawuy ngi Bumbulvuŋ vuna, ɓa a pura waɗ ɓa a cine mingiɓi naŋ vunaka? Mijika slimiɗ asi mingiɓi ɗu i waka? Yo micina ti slimiɗ naŋ i waka?

Zeremi a ɓi:

¹⁹ Burkataŋ ngi Bumbulvuŋ, ji mevele ara ndilawa, i burkataŋ ngi vuŋ: ara kicuwur a hirnga migi malambaˀhay.

²⁰ Bumbulvuŋ anta sa tisla mevele t'aruŋ, sey da naŋ miga gwat naŋ mujuwa a mevele ngi gi na le gar far, Nga mbuŋ so na, kisa lumam lesl ngi sla wala nah kuy kuyo so.

Bumbulvuŋ a ɓi:

²¹ I ya mislina mijiviɗ tayna ta ngbaŋ, na, a kilam ti kil na si, ko i ɓa taŋ neˀ le ta, amma ara njikam ɓihey na si.

²² Da a cicam le ɗaˀ zleˀe ar li ngilawuy ɗu na, anja ani a ɓaka mingiɓi ɗu da mizli ɗuwoyo, ɓa a cinaka so. Anja ani a mbuɗoko hiri taŋ le tir sipi jiviɗ malambaˀ taŋ na, waɗ tir gi gwat taŋ mikaslsla ta na.»

Bumbulvuŋ naŋ da asi ruwuy kurzluˀgar

²³ Yi Buymisemuŋ ngi li migweˀ tewle, mbak Bumbulvuŋ ngi li mikileŋ sukwa? I ya Bumbulvuŋ maɓi.

²⁴ Da mbur a ɗum le ɗum ar zlirɗi na, ya i pura gu ta kwa? I ya Bumbulvuŋ maɓi - Mbur misi ko ma gar, a ruwuy waɗ a muŋ ma na, i ya vuna takwa? I ya Bumbulvuŋ maɓi.

Cekwesl ati mengeleleŋ i gwat mupurla ta

²⁵ Mijiviɗey maɓam ɓi, taŋ manjikam ɓi mijeŋ ta ti slimiɗ ɗu na, i ra cina, a ɓam: «I musuwun na! I musuwun na!»

²⁶ Mijiviɗ tayna manjikam ɓi mijeŋ ta na, i mi a hirnga taŋ ka? Taŋ mijiviɗ miji ɓi ndaw ndaw ngi tikina mizli tewle tayna vuna, a sa kiɗaka mi nah ti vunaka?

²⁷ Taŋ maslufaka ɓi ngi musuwun taŋ ar wala taŋ na, a wuɗam ɓa mizli ɗuwoy a puyukoko hirnga ngi slimiɗ ɗu, kaɓa dideˀ taŋhay ati kuli taŋ Baˀal mupuyukoko hirnga ngi slimiɗ ɗu na ya.

²⁸ Mijiviɗ mumusuwun le na, anja a sluf di i ɓi ngi musuwun naŋ na cirre gwat naŋ, amma mijiviɗ misi mingiɓi ɗu na, anja a til mi ti ɓi ɗu na ti jiviɗ naŋ kasl kasl! Mujumo cekwesl ati mengeleleŋ ngi gwat i mike? I ya Bumbulvuŋ maɓi.

²⁹ Mingiɓi ɗu, naŋ kaɓa vu, kaɓa tokom ngi ɓiri mawaha ɗugur. I ya Bumbulvuŋ maɓi

³⁰ Yo mbak ɗagay so, i wuɗ i diɗ vu plak avu mijiviɗ tayna, magam ti mingiɓi taŋ ar wala taŋ kaɓa i mingiɓi ɗu na. I ya Bumbulvuŋ maɓi.

³¹ I wuɗ i diɗ vu plak avu mijiviɗey mitikina vuhoy, mazuɓaka irne taŋ kaɓa a njikam di i ɓi ɗu na. I ya Bumbulvuŋ maɓi.

³² I wuɗ i diɗ vu plak avu mijiviɗey mamusuwunam i musuwun mijeŋ ta na. I ya Bumbulvuŋ maɓi. A slufaka musuwun taŋhay mijeŋ jeŋ ta, yo mapulam gir ta tayna, a zizaka mizli ɗuwoyo. I ya mislina taŋ ta, yo i ya mupula taŋ jiviɗ naŋ ta ngbaŋ. Ko gwat taŋ magam ngi pula gir da mizli ɗuwoy tayna anta neˀ le ta I ya Bumbulvuŋ maɓi.

Mingiɓi ngi Bumbulvuŋ i gwat ngi jijir ti jijir kwa?

³³ Buymisemuŋ a ɓa Jeremi na: «Mizli tayna, mijiviɗ, malla masay, da taŋ mucufuɗukuw le: ‹Gwat magira Bumbulvuŋ i mike?› na, kisa ɓa taŋ: ‹Magiraka Bumbulvuŋ i kum! I wuɗ i sa zliɗukum avra. I ya Bumbulvuŋ maɓi.»

³⁴ Mijiviɗ, masay malla ko mbur a wuzla mizli, da a ɓi le: ‹Ɓi ngi Bumbulvuŋ i gir› na, naɓa i sa ga bonoy da mbur nah, jom ati hay naŋ gar.

³⁵ Mingiɓi, kum masa ɓaka ar wala kum na, ani: ‹Bumbulvuŋ a mbiɗa mbrike? Bumbulvuŋ a til mi, a ɓi mbrike?›

³⁶ Amma ɓi ngi gir Bumbulvuŋ mavula na, ki ɓaka ɓi nah avu mi mata. Gir ngi mbur gar na, i mingiɓi naŋ vuna tehhe a muŋ, asi ki ra hiryaka mingiɓi ngi Buymisemuŋ misi ti siifa, Bumbulvuŋ misi gidaŋ wãˀ, Buymisemuŋ ndra.

³⁷ Ɓi ka masa cufuɗa mijiviɗe vurˀe na, ani: ‹Bumbulvuŋ a mbuɗuw di mbrike? Bumbulvuŋ a til mi ti ɓi wanaka?›

³⁸ Kum maɓam: ‹Gir Bumbulvuŋ mavula› na, yi tukukum le ngi ɓa ɓi nah ngbaŋ. Bumbulvuŋ a ɓi na: amma gar ti nah kwana, da mbur ara ɓi: ‹Gir Bumbulvuŋ mavula› na ɓula si na,

³⁹ mbak ɗagay so! I sa diɗ vu plak avu kum gisiŋ, i zliɗukum kileŋ a mihiri ɗu, kum ati walahay, ya muvulukum di da kum ati dideˀ kumoy na.

⁴⁰ I sa pukum mesem ngi sete. Busukum ngivi dangwal kum a diɗ le ngi wãˀ! Mizli anta sa puyukom hirnga ti ɓi nah ta wãˀ.