ZEREMI 13 - Bible en langue guiziga

Zeremi waɗ kanda ngi gugumay mislirkeɗe

¹ Bumbulvuŋ a ɓiy na: «A ra hiɗik kanda ngi gugumay mislirkeɗe, juwa wak a virzi, amma ki buna ta ɓula.»

² Akẽh na, i ra hiɗiko kanda kaɓa Bumbulvuŋ miɓiy di tuwa, i juwa wak a virzi.

³ Yo Bumbulvuŋ a ɓiy ma ni:

⁴ «Zuɓakandaka mihiɗika, ka mujuwa wak a virzi tuwa, aru ng'ar mizaw Fara, ɓa ki cakanda nah kulaˀ ar wala muwã a diga.»

⁵ Ya tuwa, i ra ɗumo a Farakaɓa Bumbulvuŋ miɓiy di vuna.

⁶ Hin mbeˀ a dirba nah na, Bumbulvuŋ a ɓiy ma: «Mi nga Fara a muŋ, kanda ya muɓuw ɓa ki ɗumo a diga tuwa na, zuɓo di a muŋ.»

⁷ Joˀ ya tuwa, i ru nga Fara, nga supo kanda ar li ya muɗumo tuwa, ɓa i zuɓo di a muŋ. Kanda tuwa, a hiryi le, hiryeˀ hiryeˀ fuk wãˀ.

⁸ Akẽh na, Bumbulvuŋ a ɓiy ma ni:

⁹ «Ya Bumbulvuŋ i ɓi na: Gwat Zuda majijih aseˀe, yo gwat mezle Zeruzalem majijih aseˀe na, i sa hiryakahana vuna ya.

¹⁰ Mizli malambaˀ tayna mangumam cine mingiɓi ɗu ta, macicam kaŋ kaŋ ti cin ta taŋ, yo masipam kulihey, mahuruk hurukam, waɗ mahurukom a mbuŋ taŋ na, anja a tiram kaɓa kanda nah, mihirya le fuk wãˀ na.

¹¹ Mizli Israyeley ati Zudahaya gar, i juwa taŋ le a virzi zleˀe, kaɓa majuwam kanda, ɓa a tiram mizli ɗuwoy, ɓa slimiɗ ɗu a zil, slimiɗ muɗongor, ɓa a tiram gwat ngi wuya ɗu, amma ko a ngumam cin naŋ ta wãˀ. I ya Bumbulvuŋ maɓi.»

Mbaazla ati himaˀ ngi Buymisemuŋ

¹² «Ki sa ɓa taŋ: ‹Bumbulvuŋ Buymisemuŋ ngi Israyele, a ɓi na: Kukulum gar na, a ndiraka ngi zluro mbaazla.› Da a mbuɗukuw di le: ‹I sinaka le, kukulum gar na, a ndiraka ngi zluro mbaazla› na,

¹³ kisa mbiɗa taŋ di: ‹Bumbulvuŋ a ɓi na: Mizli ngi si ruwuy hana gar, buy mubo tivi Davit, muar janga naŋ, masayay, mijiviɗey waɗ mizli Zeruzalemey gar na, i sa wa taŋ dulak dulak ti mbaazla.

¹⁴ I sa buɗusla taŋ hirnga da cala da cala, cine ati ziri taŋ mizileheye buɗisl buɗisl jom arleˀe, ko i pul mbur loŋ ti siifa ta. Ircece malla gi mezle anta, na zle ko gwat masa tikiy neˀ ɓa i ngizla taŋ ta na, anta.›»

Cinam cin cin le, vur hin masa ndungufo kum

¹⁵ Cinam, jikaka slimiɗe, ki gam kaɓa kum anta cinam ta ta, i ya Bumbulvuŋ maɓi.

¹⁶ Bumbulvuŋ Buymisemuŋ kumo, dumbuŋ ɓa naŋ masa slino luvuŋ, ɓa sar masa bukum tikeˀe avu muwã misi luvuŋ timbiɗim na, gakaŋ dudok daf le. Ki ra kutukom li minjahha, amma naŋ a mbiɗi di luvuŋ makiɗ vu vagay, a mbiɗi di gazlavay mititim titim.

¹⁷ Da kum anta cinikiy di ta ma na, i sa ra ndir ɗoɗok pal ɗu ar li muguc, asi huhumo vu kum na. I sa tuwuy, i tuwuy hiri hindrik hindrik, asi ginew ngi Bumbulvuŋ, gezleŋ taˀa, a jaka taŋ le ng'ar beke.

Mingiɓi ngi Buymisemuŋ vur hay ngi buy

¹⁸ Buy ati ngwas naŋ maˀãya, ɓa taŋ na: «Wurenna cifam a ruwuy! Asi loppol kum mezle na, a puk le avra ti hirnga kumo!

¹⁹ Walahay misi tir vay ruwuyoyo, i migicahay le, ko mbur loŋ maso ngi wun taŋ naŋ anta mata wãˀ. A jaka Zudahaya le cek nga hirwuy mulak, a jaka mizli le gar.»

Buskum ngivi dangwal Zeruzalem a diɗ le

²⁰ Zuɓa hirnga, pur hiri kwaɗay, mesene ɗikey ara ndiloko tir vay muŋ! Ginew gezleŋ taˀ, mupula asi haŋ ɗik tuwa, a gi mbrike? Tumuŋ ɗik mezlehey tuwa, a gam mbrike?

²¹ Mizli makutukuw kuti ngi bonoyo, kisa ɓi vur taŋ mbrike? I ka vuna misirka taŋ, ɓa a wukuwo. Haˀaw, ɓi nah a sa giruw, kaɓa kwacay magira ngwas ngi yi.

²² Ki sa ɓi ti kwacay ɗike: «A gi kanah avu ya vur mike?» Taŋ makursukuw mi ngi rop ɗike nga muŋ, yo taŋ magukuw moˀore na, asi gi malambaˀ ɗik mukuyta wãˀ na.

²³ Mbur misi kuturkuy titra na, a mbiɗa kuturkuy ngi vu naŋ gu kwa? Dirlenge a mbiɗa ngwic ngi vu naŋ gu kwa? Naŋ kine ya, kum mizli misirkam le ti gi malambaˀa, ki gam gwat mezle gu kwa?

²⁴ I wuɗ i zliɗukum hirnga mber mber, kaɓa himiɗ mazliɗa hirnga ngi giziŋ a wuzlaɓuh.

²⁵ Zeruzalem, gwat mandilo avu ka ani, i mi ngi ɗik, ya mawuw di vu, asi ki ra puyuk hirnga ti ya, ɓa ki vula mevel ɗike da kulihey. I ya Bumbulvuŋ maɓi.

²⁶ Yo mbak ɗagay so, i wuɗ i kursuw rop ɗike, hã a midibiɗi, joˀ mizli a sa purukuw gulndiŋ.

²⁷ Kay! Madamaka maga, may gwat ɗik, gi sulome ɗik mapi mesem na, i pura taŋ le. Kuli ɗik mukuy tahay misi a muwã waɗ a ɓuh na, i pura taŋ le kaɗaŋ kaɗaŋ. Aw Zeruzalem ɗu, ki ngum sipiy ɓa dili ɗik a zuɓ avra ta so! Na kisa zik kite wana aruŋ ka?