ZEREMI 12 - Bible en langue guiziga

¹ Ka Bumbulvuŋ, ka jeŋŋe! Amma i wuɗ i cufuɗ ar gi jeŋŋe ɗike na si. Haˀaw, i wuɗ i ɓam ɓi ati ka ar ɓihey ani: Migi malambaˀhaya, gwat taŋ magaka gara, a gi kasl kasl na vur mike? Mizli miteŋteŋhey ta, ara pulam vu vur mike?

² Ki hirva taŋ le, a pam dimbasl le, a gilam, hã a yam. A zilaka slimiɗ ɗike daˀ avu mi tewle, amma a mevel taŋ, taŋ kileŋ avu ka.

³ Bumbulvuŋ, ka ki siniy le, ki ra puriy, yo ki ra jiɗa wuluk ɗu: ya tisi ka. Amma mizli misi moˀoreheye, pa taŋ sek pal, kaɓa tumuŋhoy nga sli ˀay! Wi taŋ vu weˀ ngi kutuko hin ngi kiɗ taŋ!

⁴ Hirwuy ara tuwuy vagay, yo giziŋ ngi ɓuh gar a ro hiikom. Na a sa kiɗ mi, hã ti vunaka? Gwat misãmi ngi ɓuhoy ara ngizlam, asi moˀore ngi mizli ngi ruwuy tayna, taŋ a ɓam na: «Gwat ndra magaka na, Buymisemuŋ anta pura ta.»

⁵ Da pi mi ti sar ati misi saray, a giruw le na, naɓa kisa pam mi ti sar ati piliseye mbri mbrike? Da cifi setete, sey ar hirwuy muro zuy zuy na, na kisa gi mbri ar li mikip ngi mizaw Zurdeŋ ka?

⁶ Ko sukum ɗikey, mizli ngi hay kumoy kwana, taŋ vuna, a vulukuw ngi ji, maziloko mizli haɗa ti yaŋ yaŋ ng'ar ka, i taŋ vuna. Ko da ara ɓukuw ti ˀay mezle kwana, ki pula taŋ vu ta.

Bumbulvuŋ a pula hay naŋ ati mizli naŋhaya le

⁷ I mbuka hay ɗu, i pula sukwi ɗu, sukwi ya mawuɗ haɗa na, i pula mbak asi haŋ ngi mesene naŋhay.

⁸ Sukwi ɗu a tiri le avu ya, kaɓa mobor a ɓuh, ara buc ng'ar ya, ya mawuɗ mata na vurˀe.

⁹ Sukwi ɗu a tiri le avu ya, kaɓa ɗiyuw minjeɗeɗe, ɗiyuw muzuma useˀhey masuroko nga hirnga naŋ ti ka ti ka gar sukwa? A ram, cikilaka gwat misãmi ngi ɓuhoyo cek! Soko taŋ nga zuma ɗaf ngi muguzlum!

¹⁰ Mijiginey hiɗim hiɗim, a guzuvuraka guva ngi gudubun ɗu le, a kurpaka guva le kirap kirap. Guva ɗu mimezle tuwa, a tiram di wuzlaɓuh mikirɗak kirɗak cay.

¹¹ A tiram di diŋ le cay, n'ani cay a mbuŋ ɗu, sey tuwuy. Hirwuy gar a ndir le daŋ daŋ, ko mbur mawulka ɓi nah anta.

¹² Mihirya gwataya, ara zuɓoko jiviɗ ngi wuzlaɓuh mikirɗak kirɗakaya gar. Maslalam ngi Bumbulvuŋ, ara zuma hirwuyo, hã a mivay naŋ ti ka ti ka gar: mbur muzuy zuy anta ko loŋ mata.

¹³ Mizli ɗuwoy a zligam dawa, amma a gam sifi ngi hadaw, a giram kupuyah, amma ko gwat taŋ malumam neˀ anta. Pam mesem ti gwat ngi lum kum ngi sifi na so, asi Bumbulvuŋ a ji mevel le ka vu ar kumo.

Bumbulvuŋ ati midigwi ngi Israyeley

¹⁴ Bumbulvuŋ a ɓi na: «Midigwi ɗu misi moˀorehey, majaka haŋ avu zlili ɗu, ya muvula da Israyel, mizli ɗuwoy na, i sa ɓula taŋ tisi ruwuy taŋ, yo i sa tuɓo mizli ngi Zudahay misi a wuzla taŋ na ma.

¹⁵ Amma a dirba ya muɓula taŋ le vuna ma na, i sa pura taŋ ircece a muŋ, i sa mo ti mbur gar ng'ar li naŋ ng'ar li naŋ, nga ruwuy naŋ nga ruwuy naŋ.

¹⁶ Da a dubunaka gi gwata le kuy kuy kaɓa mizli ɗuwoy, yo da ara hudumom ti slimiɗ ɗu, a ɓam: «Hadam ti slimiɗ ngi Bumbulvuŋ misi ti siifa!» kaɓa taŋ mudubunaka hudum ti slimiɗ ngi Baˀal zleˀe da mizli ɗuwoy na, naɓa a sa cifam ti hay taŋhay a wuzla mizli ɗuwoyo.

¹⁷ Amma da a cinam ta na, i sa ɓula sukwi ngi mizli tayna nga zizi ngi wãˀ I ya Bumbulvuŋ maɓi.