ZEREMI 1 - Bible en langue guiziga

¹ Ɗerewol hana, a ɓi di i ɓi ngi Zeremi, mangal ngi Hilkiya. Zeremi i dideˀ ngi masayay, taŋ a Anatot, hirwuy Benjameŋ.

² Bumbulvuŋ miɓa ɓi da Zeremi na, naɓa Zoziyas mangal ngi Amoŋ i buy Zuda, a ɓul di i vi mukuruˀ nga makir naŋ angi zuma buyo.

³ Buymisemuŋ a ɓaŋ le ma, hirak ti Zoˀakim mangal ngi Zoziyas mazum buy a Zuda, hã ar kiɗa mi ngi vi mukuruˀ ngaŋ kaˀ ngi Sedekiyas, mangal ngi Zoziyas vuna mazum buy a Zuda, hã ar kiya muzlum naŋ, mijam di Zeruzalemey nga hirwuy mulak.

Buymisemuŋ mizila Zeremi ɓa a tiri mijiviɗ naŋ

⁴ Bumbulvuŋ a ɓiy ani:

⁵ «Ya misa kicuwuw a kwacay munuk na, naɓa i sinuw le si. Ka misa bo tikeˀe ti kwacay naŋ na, naɓa i guhuw le gwah pal vur slra ɗu si. I tiri ti ka mijiviɗ le ng'avu sukwi ngi mizli.»

⁶ Yi mbiɗaŋ di: «Aw Bumbulvuŋ Buymisemuŋ ɗu, i si na ɓi ɓi a wuzla mizli ta, yi zuŋ aruŋ takwa.»

⁷ Bumbulvuŋ a ɓiy: «Ki ɓi ki zuŋ aruŋ ta. Ar li ya maslinuw gar na, a ru, ɓi ya muɓuw di le ɗaˀ le gar na, ɓaŋ.

⁸ Ki zluwun ti mbur ko loŋ ta, y'ada ati ka, i sa lihuw. I ya Bumbulvuŋ maɓi.»

⁹ Bumbulvuŋ a tilo haŋ til, a wusiy avu mi, a ɓiy: «I ca mingiɓi ɗu le a balam ɗike.

¹⁰ Sina sin le dana, i slinuw le nga gi slra a wuzla sukwi ngi mizli waɗ ar zuma buyoyo, ɓa ngi muɗa gwataya muroh muroh, ngi putukuso taŋ putukos putukos, ngi hirya taŋ, waɗ ngi waha taŋ, yo ngi ndira taŋ waɗ ngi hirva taŋ a muŋ.»

Mihaŋ ngi ɗugwas ati misirgaɗ mavuruɗ taˀ ar liwis, Zeremi mupura ti kleŋ

¹¹ Bumbulvuŋ a ɓiy ani: «Ki pur mike Zeremi?» Yi ɓaŋ: «Yi pur mihaŋ ngi ɗugwasa, widis miɗeŋ ɗeŋ hiri.»

¹² Bumbulvuŋ a ɓiy: «Gwat ka mupura na naŋ kaslsla, asi i ra ki slimiɗ ɓa gwat ya miɓa na a gi wãˀ.»

¹³ Bumbulvuŋ a ɓiy sar mucuw naŋ ava ma: «Ki pur mike?» Yi ɓaŋ: «Yi pur misirgaɗ taˀ ar liwis, ara vuruɗ, hanjak tir vay muŋ ng'ar ya.»

¹⁴ Bumbulvuŋ a ɓiy: naŋ kine, mizli ngi si ruwuy keɗeɗe gar, mendere a sa bulo vu tir vay muŋ, a so luuma taŋ.

¹⁵ I sa zilo mizli muyoy misi ar zumabuy tir vay muŋ na gar. A sa ndiloko, mbur gar na, a sa ɗuva janga naŋ ngi buyo, a mizlingreŋ nga Zeruzaleme, njiɓaŋŋa gun mohol naŋhaya, yo a sa zlaka walahay Zudahaya gar ngi kiɗa vu. I ya Bumbulvuŋ maɓi.

¹⁶ I sa tila taŋ mi ti ɓi ya mujuwa a mevel ɗu vur malambaˀ taŋ migaka na. A pulikiy le fuk, ara zlumam gwat ngi mikulihey da kulihey. A ra hurkom a mbuŋ gwatay, taŋ miɗiyaka taŋ ti haŋ taŋ.

¹⁷ Amma ka Zeremi, juw vu, slikiɗi, ɓi ya masa ɓuw di ɗaˀ le gar na, tila taŋ mi ti ɓi nah. Ki pula taŋ vu ɓa a gucukuw mi ta, vur ya masa gucuw mi a mbuŋ taŋ.

¹⁸ Zle dana na, ya i tiri ti ka le kaɓa walahay muguno le ti mohol, ka ɓamtal ngi ɓiri, ka mohol ngi ɓiri gaza, a mbuŋ mizli ngi si ruwuyoy keɗeɗe, a mbuŋ buy Zudahay ati mizli madiɗa ngi slra taŋhaya, a mbuŋ masay taŋhay waɗ a mbuŋ soje taŋhaya.

¹⁹ A sa gam kiɗa vu ati ka, amma t'anta sa gukuw gwat neˀ gu ta, asi y'ada ati ka, ɓa i tuɓuw tisi haŋ taŋ. I ya Bumbulvuŋ maɓi.»