ZAKARI 6 - Bible en langue guiziga

Gwat mupura ti kleŋ sar midangafaɗ naŋ: mota ngi vurumoy mufaɗa

¹ I zuɓa hiri paɗɗa ma, i pur gwata: mota ngi pilis mufaɗa, ara boko tir wala muwãhay, yo muwã tayna vuna i muwã ngi ɓiri gazahay.

² Mota ngi pilis mudumbuŋ, naŋ law avu pilis mivirziŋŋe, mota mucuw naŋ, law avu pilis titra,

³ mimakir taŋ, law avu pilis bara, waɗ mumufaɗ taŋ, law avu pilis gaza muzlop zlop.

⁴ I sla mingiɓi, i cufuɗa modro maɓiy ɓi tuwa: «Buy ɗu, hana vuna a bigi mike?»

⁵ Modro a mbiɗiy di: «Hanayna i himiɗ ngi si gazlavay misi tir vay mufaɗ midedeŋ dedeŋ a mbuŋ Buy ngi ruwuy keɗeɗe.»

⁶ Mota pilis titrahay maɗiɗaka na, a ram kini tir vay muŋ. Pilis baraˀahaya ɓaˀ asi taŋ, amma pilis muzlop zlopoyo, a ram kini tir vay ruwuy.

⁷ Pilis gazahaya, a wuɗam ru ti yam ar gojogoɗ nga bula si ruwuyo. Dar Bumbulvuŋ a ɓa taŋ ɗaˀ: «A ram, ara bulaka si ruwuyo.» Joˀ mota ngi pilisey mumufaɗa, ara bulaka si ruwuyo so.

⁸ Akẽh na, Buymisemuŋ a ziliy, a ɓiy na: «Pilisey maram kini tir vay muŋ na, pura taŋ ɗi, ara pam sar ti ˀUf ɗu angi hirwuy nah.»

Bumbulvuŋ minjika ɓi ngi Yesuwa masa cam di buy

⁹ Bumbulvuŋ a ɓiy mi naŋ ani:

¹⁰ Helday ati Tobiya waɗ Yedaya, mizli mijaka taŋ zleˀe nga ruwuy mulak mumoko na, gwat taŋ mavulukuw di, tiɓa. Ka ti hirnga ɗike, kisa ru dana dana ngi hay Yosiya, mangal ngi Sefaniya, mizli mindiloko ani ti Babiloŋ na, taŋ a hay naŋ vuna.

¹¹ Ki sa hila ɓiri bara ati ɓiri tapasl tapasl, ki vuɗ taŋ loppol, waɗ kisa ca a hirnga Yesuwa, mangal ngi Yosadak, masay madiɗa.

¹² Ki sa ɓaŋ na: ‹Bumbulvuŋ misi gidaŋ wãˀa, a ɓi ani: Mbur ani, a zilaka Hilfa, a sa pus ar li naŋ micici le anga gar, a sa ndiriy hay da ya Bumbulvuŋ.

¹³ Masa ndiriy hay da ya Bumbulvuŋ i naŋ. A saka gwat maka ka da buy avu vu, a sa cifi ar janga naŋ ngi buyo, dar a zum buy. Masay a sa cifi a cikeˀe, taŋ cuw taŋ, ngiɓiˀay mezle a sa bigi ar wala taŋ.›

¹⁴ ‹Loppolo, a sa ndir ar hay nga ya Bumbulvuŋ. Helday, Tobiya ati Yedeya waɗ mangal ngi Sefaniya mavul ti gula ti hazum na, mizli a sa wulkaka taŋ keŋ avu loppol nah.

¹⁵ Mizli mikileŋ kileŋheye, a sa soko gam slra ar hay nga ya Bumbulvuŋ, dar kisa sinaka mislino ya ng'avu kum i Bumbulvuŋ misi gidaŋ wãˀa. Da ki ra cinikiy mi kuy kuy wãˀ da ya Bumbulvuŋ kumo na, gwat nah a sa gi cummo.