ZAKARI 14 - Bible en langue guiziga

Bumbulvuŋ a sa zum buy asi ruwuy gar

¹ Zeruzalem, hin ara ndilawa ani, i hin ngi Bumbulvuŋ, tapasa, mizli a sa wunkaka zlili ɗike daˀ a mihiri ɗik vuna si.

² Asi mike na, i sa kuso sukwi ngi mizli gar a ciki Zeruzalem ɓa ngi zla kiɗa vu. A sa tiɓaka walahaya, a sa hilaka gwat ngi hayaya, a sa hinam ti ngwasaya ti gidaŋ. A sa jaka mizli ngir walahaya cah nga ruwuy mulak, amma mizli masa ndiram neˀ na, t'anta sa ngizlam ta.

³ Bumbulvuŋ a sa zla kiɗa mizli tayna, kaɓa angi hin naŋ makiɗ vu, kaɓa angi hin ngi vurum.

⁴ Tapas nah na, a sa ɗuva saraya taˀ ar muwã tutumbur mupuɗak ar Zeruzalem, kini tisi pas ngi miprik na. Muwã tutumbur a sa cir puɗak a wuzla cuw, zle tisi pas ngi miprik, hã tisi pas ngi pastaˀa, a sa tiri sozo madiɗa ndah ndah. Muwã micah mekeleme, a sa kirih ngir tir vay muŋ, yo numuŋ kwana ngir tir vay ruwuy.

⁵ Dar kisa kilam tir sozo misi ɓaˀ ar wala muwã ɗuwoyo, vur sozo a sa ndil sesẽŋ a Asal. Ki sa kilam kaɓa kum mikilam zleˀe ti hirwuy muwus ti hin ngi zumabuy ngi Oziyas, buy Zuda. Akẽh na, Bumbulvuŋ, Buymisemuŋ ɗu a sa ndilawa, mizli naŋhay mipal na gar sesek aseˀeŋ.

⁶ Tapasa, li minjahha anta mata, ko li anta sa gi yaɓyaɓ ta, yo ko yam anta sa tisl, hã a ji ngboˀ ngboˀo ta.

⁷ A sa gi i hin mipal avu mekelemeye, i Bumbulvuŋ misina tewle. Papas malla duvuɗ anta gi mata, amma hirak ti pastaˀ na, li a sa pusluɗ njahha.

⁸ Tapasa, miviɗiviɗi ngi yam a sa bo ti Zeruzaleme, yam a sa ɓul cah ngir tisi pas mabawa, yo cah kwana ngir tisi pas madiɗi. Ti hinpas ati viya kwana, a sa ndir kanah.

⁹ Dar Bumbulvuŋ a sa biga vu naŋ i buy madiɗa ngi si ruwuy gar. Tapasa, Bumbulvuŋ a sa ndir i naŋ tewle, yo slimiɗ inga naŋ tewle.

¹⁰ Hirwuy gar na, a sa tiri li micay, zle a Geba, hã a Rimoŋ a Zeruzalem tir vay ruwuy naŋ. Zeruzalem a sa zuɓ ɗingir a muŋ daˀ arleˀe, zle a mizlingre Benjameŋ, hã ar li ngi mizlingre magala zleˀe, sesẽŋ a mizlingre misi a mivay ngi moholoy mira zliram, yo zle avu hay madiɗa ngi Hananeyel, sesẽŋ ar li ɗuco gwat ngi buy.

¹¹ Mizli a sa pam anga, ngizla vu ngi vul da Bumbulvuŋ anta sa gi mata, Zeruzalem a sa ndir setette.

¹² Mizli gar masa soko gi vurum ti Zeruzalem na, jiji naŋ masa ngizla taŋ ti naŋ na anihĩ: ar taŋ muroko deŋ ti sar taŋ tekeɗe kwana, useˀ ngi vu taŋ a sa zĩˀĩ, hiri taŋhay a sa zãˀãm daˀ ar mododok hiri taŋhaya, yo irne taŋhay a sa zãˀãm a balama.

¹³ Tapasa, Bumbulvuŋ a sa yo taŋ muɗa didak a wuzla taŋ, mbur gar a sa zliga cil naŋ, a sa kiɗam vu ar wala taŋ.

¹⁴ Zudahay a sa kiɗam vu tisi Zeruzaleme. Akẽh na, a sa cikilaka zlili ngi sukwi ngi mizli gar cikal cikal zikitiŋ arleˀe: ɓiri tapasl tapasl, ɓiri bara, zana zikitiŋ haɗa.

¹⁵ I jiji misi purla masa ndilo avu pilisey, avu zungu-pilesey, zlogomohoy, zunguhoy, na zle avu ginew misi ar walahay guɗuk taŋ gar si. I jiji mupurla mingizla mizli na.

¹⁶ Akẽh na, mizli mindiram ti siifa, miram zleˀe gar nga kiɗa vu ati Zeruzaleme, vur vi gar na, a sa ra huruk hurukam ti miliwis a mbuŋ buy Bumbulvuŋ misi gidaŋ wãˀa, yo ɓa ngi gi muguzlum ngi Guɗukoyo.

¹⁷ Amma sukwi ngi mizli ngi si ruwuy misi t'anta sa ram nga huruk huruk a mbuŋ buy Bumbulvuŋ misi gidaŋ wãˀa ta na, vuŋ anta sa gi asi ruwuy taŋ ta.

¹⁸ Da mizli Eziptehey anta ngumam ru nga Zeruzaleme ta na, jiji Bumbulvuŋ masa kiɗa sukwi ngi mizli maram nga gi muguzlum ngi Guɗukoy na ta na, a sa kiɗa taŋ ti naŋ ta kwa?

¹⁹ Ezipteheye, bonoy ngi kuti taŋ i nah, yo sukwi ngi mizli gar misi t'anta sa ram nga gi muguzlum ngi Guɗukoy na ta na, bonoy ngi kuti taŋ kwana i nah.

²⁰ Tapasa, ko mawuyar ngi si ˀay pilisey kwana, a tohom mingiɓi avu t'ani: «Muvula le da Bumbulvuŋ». Misirgaɗ ngir hay ngi Bumbulvuŋhoyo, a sa ndiram kaɓa sikiɗ ngi pusla gwat a mbuŋ li gi mikuli.

²¹ Misirgaɗ misi ada a Zuda malla a Zeruzalem gar na, a sa vulaka taŋ da Bumbulvuŋ misi gidaŋ wãˀa. Mizli gar masa soko ti gwat taŋhay ngi gi mikuli na, a sa gam slra ti misirgaɗ tayna ngi di gwat ngi mikuli taŋhay. Tapasa, ar hay ngi Bumbulvuŋ misi gidaŋ wãˀa, migi tererehey anta mata.