ZAKARI 12 - Bible en langue guiziga

A sa ndahaka Zeruzaleme, amma Bumbulvuŋ a sa lahaŋ

¹ Tila mi ati mingiɓi ɓi ngi Bumbulvuŋ a hirnga Israyel. I ya Bumbulvuŋ maɓi, ya miciya muŋ cay, yo muɗuva virzi ngi ruwuy, waɗ muvula musuɗuk ngi mbur titira da mizli.

² Zeruzaleme, i wuɗ i tiri di avu mizli mugun hirnga naŋhaya gar na, i sikiɗ ti mbaazla mawi vu. Tapas masa ndahaka hirnga ngi Zeruzalem na kwana, i sa gi ti Zuda kanah ya.

³ Naŋ kanah, tapasa, Zeruzaleme, i sa tiri di avu mizli gar kaɓa ɗugur mazuɓ ta. Mbur masa tutuma zuɓ naŋ gar na, a sa pultoŋ. Dar sukwi ngi mizli ngi si ruwuy gar a sa kusom kos kos nga hirnga naŋ.

⁴ Tapasa, i sa tiri ti pilis taŋhay i muwahay le, yo i sa ga zluwun da misi piliseye. Amma i sa ɗuva hiri ɗu taˀ ar Zuda ɓula, yo pilis ngi sukwi ngi mizli gar na, i sa hulufo taŋ. I ya Bumbulvuŋ maɓi.

⁵ Buy Zudahay a sa ɓam ti kwacay taŋ: «Zeruzalemeye, a lumam gidaŋ nga taŋ avu Bumbulvuŋ misi gidaŋ wãˀ, Buymisemuŋ taŋ na.»

⁶ Tapasa, buy Zudahaya, i sa tiri taŋ rak rak kaɓa zayvu mabul asi dum, yo kaɓa daliivu mubula le asi giziŋ. A sa ngizlaka sukwi ngi mizli mugun hirnga taŋ ti ka ti ka na gar. Amma Zeruzaleme, a sa ndir taˀ nga naŋ nga naŋ ar li naŋ.

⁷ Bumbulvuŋ a sa lih dumbuŋ i mizli ngi Zudahay, ɓa mizli ngi hay Davitey ati mizli Zeruzalemey a puraka kaɓa taŋ ɗongor ar mizli Zudahaya ta.

⁸ Tapasa, Bumbulvuŋ a sa jigina mizli Zeruzalemeye gar: ti hin nah na, mbur mihiya ngi si taŋ, a sa ndir a diga kaɓa Davit, yo hay ngi Davite, a sa ndir kaɓa Buymisemuŋ, waɗ kaɓa modro ngi Bumbulvuŋ a mbuŋ taŋ.

Hirwuy gar ara gi vagay

⁹ Tapasa, mizli gar musoko ngi zla kiɗa mizli Zeruzalemey na, i sa ngizla taŋ kap.

¹⁰ Mizli ngi hay Davitey ati mizli Zeruzalemeye, i sa po taŋ musuwun-uf ngi gi gwat mezle ati ngi tumbulo vu. Dar mbur taŋ mizligaka na, a sa puraka ngir tivi ya. A sa tuwaka vagay naŋ, kaɓa matuwam vagay ngi mangal kirmalay. A sa tuwakaŋ kaɗam kaɗam kaɓa matuwam mangal modogom.

¹¹ Tapasa, tuwuy ngi vagay a sa gi haɗa a Zeruzaleme kaɓa tuwuy vagay ngi Hadat-Rimoŋ. Ar li micay a Megido.

¹² Hirwuy a sa tuwa vagaya, mizli vur muyo vur muyo: muy ngi mizli ngi Daviteye pal taŋ, yo ngwasaya pal taŋ, muy ngi mizli ngi Nataŋhay pal taŋ, yo ngwasaya pal taŋ,

¹³ muy ngi mizli ngi Levihey pal taŋ, yo ngwasaya pal taŋ, muy ngi mizli ngi Simeyey pal taŋ, yo ngwasaya pal taŋ,

¹⁴ muy mekelemey gar na, mizli vur muyo vur muyo, yo ngwasaya pal taŋ pal taŋ.