ZAKARI 11 - Bible en langue guiziga

A ngizlaka ruwuy migidaŋhaya le

¹ Ka hirwuy Libaŋ, wuna mizlingre ɗikeye, ɓa vu a zuma widis miter ɗikeye.

² Ka widis Sipre, kuɗuma tuwuy, asi widis miter a mbizli le, asi a kiɗaka misi gidaŋhaya le. Kum widis madiɗa misi ka miter ngi Basaŋhay, kuɗumaka tuwuy, asi widis mingiriɗ macam anga gu ta na, i mihina le a ruwuy.

³ Cinaka mijiginay makuɗumam tuwuy, asi li jigin taŋ mezle i mihirya le. Cinaka moboroy matuwam, asi li hin taŋ a ˀayzaw Zurdeŋ, i mihirya le.

Ɓi ngi mijiginey cuw

⁴ Bumbulvuŋ, Buymisemuŋ ɗu a ɓiy na: «Tumuŋ hanayna muvula taŋ ngi sli na, jigina taŋ.

⁵ Misliˀay taŋhay a slaka taŋ manja a puraka kaɓa a gam di i gwat malambaˀa. Mihiɗik taŋhay a hiɗikaka taŋ, ti ɓi aseˀe ‹Sise da Bumbulvuŋ, ani i gam zlili le!› Amma mijigin taŋhay anta puraka taŋ ircece ko neˀ le ta.

⁶ Ya Bumbulvuŋ, y'anta sa pura ircece da mizli ngi si ruwuyoyo ta. Asi mike na, i sa vula mizli, mbur gar asi haŋ ngi midigwi naŋ waɗ asi haŋ ngi buy naŋ. Buyoy a sa zumaka hirwuyo, amma y'anta sa tiɓa mizli tisi haŋ taŋ ta. I ya Bumbulvuŋ misi gidaŋ wãˀ maɓi.»

⁷ Ginew, mijiginay muvulaka taŋ ngi sli ar li kiɗ taŋ na, i sa jigina taŋ so. I hil gandayay cuw. I zila ganday mudumbuŋ Gi mezle, yo ganday mucuw naŋ, i zila Ngiɓiˀay, dar i sa zla jigina gineweye.

⁸ Akẽh na, i susuymo mijigin mimakireye ar kiya purla. A dirba nah, i ɓusa ɓi taŋ mata, yo taŋ kwana, t'anta purikiy kuy avu hiri mata ya.

⁹ Dar i ɓi: «Y'anta sa ru ti kum nga jigine mata. Tumuŋ mawuɗ a muc na, anja a mucu! Misi mawuɗ a zizi na, anja a zizi! Misi masa ndiram titiriheye, anja a humbuɗam vu ar wala taŋ.

¹⁰ I zuɓa ganday ɗu mazilaka Gi mezle tuwa, waɗ i ngila tasl, ɓa ngi wuɗka ngiɓiˀay ndra mungiɓam ati mizli gar tuwa.

¹¹ Tapasa, ngiɓiˀay a pusuk le, migi terere ngi ginewey mapurikiy cum cum na, a sinaka le, nah na i mingiɓi ngi Bumbulvuŋ.

¹² Akẽh na, yi ɓa taŋ: «Da ki hĩyãka le na, wurkikiy migir ɗu, da kanah ta na, pulaka.» Ar nah na, a wurkikiy migir ɗu: suloy kukur makir.

¹³ Bumbulvuŋ a ɓiy na: «Dala ngi cikili mukuy hana, taŋ mupuraka ki ndila le na, zliɗa da mindira magayakay.» I hila suloy mizli ngir makir tuwa, i zliɗa da mindira magayakay ar hay ngi Bumbulvuŋ.

¹⁴ A dirba nah, i ngila ganday ɗu mucuw naŋ, mazilaka Ngiɓiˀay tuwa, ɓa i puska ji ngama ngi Zuda ati Israyele.

¹⁵ Bumbulvuŋ a ɓiy na: «Hil gwat ngi mbur mijigin gilaw.

¹⁶ Asi mike na, i sa bo ti mijigin ani asi ruwuy hana: tumuŋ miziza le na, naŋ anta sa ki slimiɗ ara ta. Tumuŋ maru ti liˀi kiŋkiŋ lambaˀ na, naŋ anta sa ru ti supo di ta. Misi mingila sar le na, naŋ anta sa juwaŋ di ɓa a juɓ ta. Misi mukuy kuyo, naŋ anta sa ɗiyaŋ kuy kuy wãˀa ta. A sa humbuɗ useˀ ngi ginew muzlumbrahay, hã a sa zlaha sar taŋ ngi ɗuf a ruwuyoyo.»

¹⁷ Mijigin kesef mapula tumuŋ mitaˀ gezleŋ mbak si na, kay, bonoy ava. Anja maslalam a ngumaŋ hirbazla, yo a nduzoŋ hiri vay hazumo! Anja haŋ naŋ a muc sok, haˀaw, anja a muc sok! Anja hiri naŋ vay hazum a pur ta, haˀaw, anja a pur ta!