ZAKARI 10 - Bible en langue guiziga

Maga vuŋ i Bumbulvuŋ pal naŋ

¹ Cufuɗam vuŋ ngi munduvuno avu Bumbulvuŋ, ɓa i naŋ mavulukum di. Mazuɓo vuŋ i Bumbulvuŋ, a go vuŋ jor jor haɗa, maga gwat ngir guva da mbur gar i naŋ.

² Asi mike na, kulihey, kum macufuɗaka taŋ na, a njukukum di i ɓi ngi slir lambaˀa, yo mihiziga njoloyo, gwat taŋ mapuraka na, i sir lambaˀ kine, taŋ mamusuwunam ti duvuɗ gar na, ɓi mikaslsla anta ara loŋ le ta. Vurˀe, mizli a ram digi lambaˀ kaɓa ginew mitaˀ gezleŋ, asi mijigin midar anta.

Ɓi ngi laha vu miɓa le ɗaˀ le

³ Mevel majiy ka vu na, ar mijigina mizli ɗuwoy na, i wuɗ i ga kiita da porcokoyo, Haˀaw, ya Bumbulvuŋ misi gidaŋ wãˀa, i sa ra pura Zuda, mizli ɗuwoyo. I sa gi ti taŋ pilis ɗu hirngahay ngi gi vurum.

⁴ Ɗugur ngi ji mivay ngi hay mira kiɗ mi na, a sa bo tisi Zuda, naŋ gidaŋ ka dum ngi viŋ, selek ka lek ngi gi vurum, Buyoy jom gar a sa boko tiseˀeŋ.

⁵ A sa gam i bugawlahay, a sa kiɗaka mizli, kirap kirap asi sar, kaɓa makurpam ndilep a jiviɗ madiɗahay. A sa kiɗam vu kanah, asi Bumbulvuŋ a sa ndir avu taŋ, joˀ misi piliseye, a sa ndiram ti mesem.

⁶ I sa juko didak da Zudahaya, i sa laha mizli ngi Zozefeye. I sa mo ti taŋ ng'ar li taŋ a muŋ, mbur a ɓi kaɓa i zliɗa taŋ avra zleˀe ɗaˀ ta, asi yi Bumbulvuŋ, Buymisemuŋ taŋ, i sa cine diradibiɗ taŋ.

⁷ Mizli Efrayimey a sa ndiram wirwir ka bugawlahay, a sa ndiram ti mumul kaɓa a sam mbaazla le, ziri taŋhay masa puraka taŋ na, a sa mumulom, a sa ndiram ti jiɗa mececẽleŋ asi Bumbulvuŋ.

⁸ I sa fa gwat ngi zil taŋ, ɓa a kusomo, asi i mbuɗo hirnga taŋ le, a sa jam haɗa kaɓa zleˀe.

⁹ I zliɗa hirnga taŋ le mber mber zleˀe nga wuzla sukwi mekelemey, ko da taŋ kileŋ kwana, a sa wulkam keŋ angi ya, a sa gilaka ziri taŋhaya, a sa moko a muŋ.

¹⁰ I sa mo ti taŋ baɗ a ruwuy Ezipte, yo i sa kuso hirnga taŋ baɗ a Asiri. I sa co taŋ nga ruwuy Galaˀat waɗ nga Libaŋ, ko ti nah gar na, li anta sa ndila taŋ ta.

¹¹ A sa tuwuɗaka mubuliy Ezipte, Bumbulvuŋ a sa mbuzla diɓel ngi yam a wuzla mubuliye. Yam mijileŋ jileŋ ngi mizaw Nile, a sa hisikam. Huhumo vu ngi Asiri na, a sa kiɗ mi, yo Ezipte a sa ziza ganday naŋ ngi buyo.

¹² Mizli ɗuwoy a sa pulaka vu taŋ da ya Bumbulvuŋ, a sa laˀam ti zila zlimiɗ ɗu. I ya Bumbulvuŋ maɓi.