ZAKARI 1 - Bible en langue guiziga

ZAKARI MUPUR GWAT TI KLEŊ Bumbulvuŋ mizila Israyeley ɓa a mbiɗakagwat ngi gi taŋ

¹ Ar kiya midangafaɗ naŋ, naɓa Dariyus a ɓul di i vi mucuw naŋ ar zumabuy naŋ na, Bumbulvuŋ a ɓa mijiviɗ Zakari, mangal ngi Berekiya, dideˀ ngi Ido:

² «Ya Bumbulvuŋ i ji mevel le haɗa ar dideˀ kumoyo.»

³ Ɓa taŋ na: «Ya Bumbulvuŋ misi gidaŋ wãˀ a, i ɓi ani: Moko ng'avi ya. Yo ya Bumbulvuŋ misi gidaŋ wãˀa, i ɓukum na, i sa mo ng'avu kumo. I ya Bumbulvuŋ, misi gidaŋ wãˀ maɓi.

⁴ Ki sipaka sar ngi dideˀ kumoyo ta. Mijiviɗ mudumbuŋhoyo, a tilaka taŋ mi le zleˀe, a ɓaka t'ani: ‹Bumbulvuŋ misi gidaŋ wãˀa, a ɓi na: Moko so, jiviɗ malambaˀ kum masipaka ati gwat ngi gi kum malambaˀ na, pulaka›, amma a cinam mi ta, yo a kam slimiɗ ar ya ta. I ya Bumbulvuŋ maɓi.

⁵ Taŋ ama ani dideˀ kumoy vuna ska? Yo mijiviɗey vuna t'ada aruŋ kwa?

⁶ Dambalaka ɓi ɗuwoy, ya miɓa taŋ ɗaˀ le, yo ɓi ya mujuwa taŋ a mevel ɗu, ya muvula asi haŋ ngi mijiviɗ, gawla ɗuwoy na, a ci le avu dideˀ kumoyo kwa? Dar a moko, taŋ ti balam taŋ a njikaka le, a ɓam: ‹Bumbulvuŋ misi gidaŋ wãˀa, a juwa le a mevele, a gi ti ndra le weˀe avu jiviɗ ndra masipakaŋ ati gwat ngi gi ndra, yo naŋ migi ti ndrakanah vuna, naŋ kaslsla gwaɗ naŋ.

Gwat mupura ti kleŋ sar mudumbuŋ naŋ: Pilisey

⁷ Ngi hin mizli ngir cuw nga mufaɗ, ngi kiya mukuruˀ ngaŋ kaˀ mazilaka Sevat, ngi vi mucuw naŋ ngi zumabuy ngi Dariyus vuna ma na, Bumbulvuŋ a ɓa mingiɓi naŋ ani da mijiviɗ Zakari, mangal ngi Berekiya, dideˀ ngi Ido: Mingiɓi ngi Zakari ani:

⁸ Ngi duvuɗ nah na, i pur gwata: mbur gilaˀ ar pilis muvurziŋŋe. Naŋ deŋ a wuzlakalaf miɗiɗahay tukuf tukuf ar sozo. Ti dirba naŋ na, pilis mivirziŋŋe, birfikke waɗ babarahay.

⁹ I cufuɗa mbur tuwa: «Buy ɗu, hanayna i mihey ka?» Dar modro maɓiy tuwa a mbiɗiy di: «I sa buguw taŋ i gwat kahana kahana.»

¹⁰ Mbur mideŋ a wuzlakalaf miɗiɗa tukuf tukufoy tuwa a sla, a ɓi: «I Bumbulvuŋ mislino taŋ ngi so bula hirwuy.»

¹¹ Joˀ taŋ a ɓaka modro ngi Bumbulvuŋ mideŋ a wuzlakalaf miɗiɗa tukuf tukufoy tuwa: «I bulaka hirwuyo le bal bal, amma hirwuy gar a ro setette, ara musuk vu.»

¹² Dar modro ngi Bumbulvuŋ a zuɓa ˀay a muŋ: «Bumbulvuŋ misi gidaŋ ŋwˀa, walahay Zeruzalem ati walahay ngi ruwuy Zudahaya, ki ji mevel le haɗa ar taŋ, ki gi di le ani vi kukur tarnaˀa, na kisa pura taŋ ircece tuvunaka?»

¹³ Dar Bumbulvuŋ a mbiɗa da modro maɓiy tuwa, ti mingiɓi ngi juko didak, ngi tisla mevel.

Bumbulvuŋ a sa pura ircece da Zeruzalem a muŋ

¹⁴ Joˀ modro maɓiy tuwa, a ɓiy: «Til mi, ɓi na: ‹Bumbulvuŋ misi gidaŋ wãˀ a ɓi ani: Zeruzalem ati Siyioŋ, i ra gi suloŋ vur taŋ haɗa.

¹⁵ Amma sukwi micifam virzi le ndasl kuy kuy na, i ji mevel le haɗi ar taŋ ɓula. Dambalaka ya vuna, i ji mevel haɗa ar Israyele ta ngbaŋ, amma sukwi mekelemey a sikaka taŋ bonoy ava ma.

¹⁶ «Vurˀe, ya Bumbulvuŋ i ɓi ani: Y'ani i ra pura ircece da Zeruzaleme, a sa ndirikiy hay ɗu anga. A sa waka Zeruzaleme, ɓa a ndiraka hiri naŋ a muŋ. I ya Bumbulvuŋ misi gidaŋ wãˀ maɓi.

¹⁷ Til mi ma, ɓi na: ‹Ya Bumbulvuŋ misi gidaŋ wãˀa, i ɓi ani: Walahay ɗuwoy a sa naham mbaf mbaf ti zlili a muŋ ma. Ya Bumbulvuŋ, i sa tisla mevel ngi Siyoŋ a muŋ ma, I sa zuɓa zeruzalem a muŋ ma.›»