TUWUY 5 - Bible en langue guiziga

Bumbulvuŋ, mo ti ndra ng'avi ka a muŋ

¹ Aw Bumbulvuŋ ndra, ɓi mandilo avu ndra na, inga wulka keŋ takwa: ani, pura taŋ mazam ndra na ayɗi!

² Hirwuy ndra a tiri ngi mulakay le, hay ndrahay a tiram ngi mizli manja siney le.

³ Pura, ndr'ani i mutuhuhoy, zlaɗ manja cine, mumuŋ ndrahay a tiram wudigahay le.

⁴ Yam ndra ngi si, sey i hiɗikaka ti hiɗiki, dum ngi ɗiya vu, sey wuruk le.

⁵ Mizli misipi ndrahay nder ndere, a pam ndra le sek a mbuŋ, gidaŋ ndra a tiki le, ko ndr'anta musukom vu ta.

⁶ I sukom gwat ti suk avu hirwuy Ezipte waɗ avu hirwuy Asiri, ɓa i lumam ɗaf ngi zum ngi kiɗa ndra maya.

⁷ Miyi ndrahay a gam mungra le: t'anta mata, muzuɓaka zayɓi ngi malambaˀ taŋ i ndra.

⁸ Bekehey a tiram buy ndrahay le, ko mbur anta ngi tiɓa ndra tisi haŋ taŋ ta.

⁹ Mufuyovuhoy a ɓuh, ɓa i lumoko gwat ngi zumo na, a wuɗam kiɗ ndra vagay.

¹⁰ Kuturkuy ndra culok kaɓa liwis, asi may a bul vu le a hur ndra kaɓa ngi kiɗa ndra.

¹¹ A jam ngwasay a Siyoŋ ti gidaŋ ngi hin taŋ, ar walahay ngi si ruwuy Yudeheye, a jam ziri diilihey ti gidaŋ ngi hin taŋ.

¹² A luwaka mizli madiɗa ngi slra ndraˀahaya a muŋ, anta ɗuvaka hirnga neˀ le da micawwahaya mata.

¹³ Mizli ziri ziri aruŋ, a jijiram ngurvuŋhoy ngi yiˀi, yo ziri gawlahay a ram takay takay ti dumoy.

¹⁴ Mizli micawwahaya, anta ram ar li kus ngi ngila wuyo mata, yo ziri ziri aruŋ a taˀaka zli dimise le.

¹⁵ Mumul anta a mevel ndra mata, ɓuruk ndra a tiri tuwuy ngi vagay le.

¹⁶ Loppol ngi hirnga ndra a puk le pok avra. Aw ma, bonoy a luuma ndra le, asi i gam mungra le.

¹⁷ Vurˀe, dumvu ndra gar i misi jiji, yo hiri ndra a pur gruv gruv na vurˀe.

¹⁸ Hana gar na, asi muwã Siyoŋ a tiri le daŋ daŋ, yo a tiri li liˀi ngi biigaɗay le.

¹⁹ Haˀaw Bumbulvuŋ ɗu, ka na, ka micifi buy na, i ngi wãˀa, zumabuy ɗike, naŋ da vur dideˀ vur dideˀ.

²⁰ Ki puyuk hirnga ti ndra ngi wãˀ kwa? Ki pula ndra mbak wãˀ hã ngi set kwa?

²¹ Aw Bumbulvuŋ ndra, mo ti ndra ng'avi ka a muŋ, naɓa i sa moko gisiŋ gisiŋ, tiri ti hin ngi siifa ndra nawaya nawaya a muŋ, kaɓa misi zleˀe.

²² Malla ki zliɗa ndra le avra ngi wãˀ far kwa? Ki ji mevel le wãˀ, fineˀ gidaŋ ar ndra far kwa?