TIMOTE MUCUW NAŊ 3 - Bible en langue guiziga

Hin ngi dirbahay

¹ Sina sin le kuy kuy, angi hin ngi dirbahay na, hin mutuwaˀhay a sa gam.

² Vur mike na, mizli a sa gam gizak, may dala. A sa gaka vu taŋ zlokoko, a sa huhumom vu. A sa zaka Buymisemuŋ, a sa cicam lak lak avu miyi taŋhaya. Tˀanta sa sinaka gi sise ta, anta sa ɗuvaka hirnga da gwat muvuku vu taŋ ta.

³ A sa tiram mizli mutuwaˀhay, anta sa puram ˀircece ta, a sa gam mbaɗa, a sa gam biyãˀ binyaˀ lambaˀ, a sa gam moˀore, a sa tiram mesene ngi gi gwat mezlehey.

⁴ A sa vulam mizli ngi ji, a sa jam mevel haɗa, huhumvu a sa hulfo taŋ, a sa wuɗam gwat macira taŋ hiri, mbak Buymisemuŋ le jak.

⁵ Deŋ taŋ na, i mizli misipi jiviɗ ngi Buymisemuŋhoy, amma a sa hizigaka gidaŋ ngi tiɓi avra. Mbiɗi duba avu mizli tayna ma.

⁶ Mekelemey a wuzla taŋ a cam suruɗ suruɗ a hay mizli, a tiram ti ngwas hĩhĩyahaya, luɓ luɓ a mbuŋ taŋ. I ngwas migi mungrahay haɗa, misi may gwat wanaka gar makiɗa taŋ.

⁷ I ngwas mapuram jiviɗ ngi dubun ndrehhe, amma ko a ndilaka si na ɓi mikaslsla ta ndiɗaˀ wãˀ.

⁸ Mizli tayna ara slam himaˀ kaŋ kaŋ avu ɓi mikaslsla, kaɓa Zannes ati Zamberes mislam himaˀ kaŋ kaŋ avu Moyis na ya. Taŋ ti wuluk ngi gi moˀore, t'anta dar dar ar tiɓi ta.

⁹ Amma t'anta sa ndilam di kileŋ ta, asi mizli gar a sa sinaka gilaw taŋ na, kaɓa naŋ migi avu ti Zannes ati Zamberes na ya.

Pol mukuta Timote ngi kiɗa mi naŋ wãˀ

¹⁰ Amma ka Timote, ki sipiy le hirdam hirdam ar gwat ya mudubuna da mizli, ar joˀ ɗu, ar gwat ya mujuwa ar wuluk ɗu ngi gi, ar tiɓi, ar ɓusaɓi, ar wuɗavu, ar cici ɗu zlak,

¹¹ yo ar mizli masipikiy nder nder, waɗ ar bonoy ya misa a Antiyos, a Ikoniyom waɗ a Listra. Kay, a sipikiy le nder nder gisiŋ, amma Bumbulvuŋ a lihiy le avu gwat tayna gar.

¹² Na zle, mizli gar muwuɗam le, ɓa a ndiram teŋteŋ avu Buymisemuŋ tisi Yesu Kristu na, a sa sipaka taŋ nder nder.

¹³ Amma mizli malambaˀhay ati mizli migi gilaw da mizli ti slirey na, a sa ram ti malambaˀ taŋ na nga mbuŋ nga mbuŋ. A sa gam gilaw da mizli, waɗ da hirnga taŋ vuna tehhe a muŋ.

¹⁴ Amma ka, gwat taŋ mudubunukuw di, yo ka mitiɓa i gisiŋ na, cici zlak anga kuy kuy. Ki si na mizli mudubunukuw di na le.

¹⁵ Ki si na Ɓimutoho le, zle ti ka misi ti zuŋ. Ɓimutoho, naŋ ti gidaŋ ngi vuluw sinmijileŋ, maru ti mbur nga lih, asi tiɓa Yesu Kristu a mevel.

¹⁶ Ɓimutoho gar, i Buymisemuŋ muˀufo di, yo naŋ puɗaw wãˀ ngi dubuna ɓi mikaslsla da mizli, ngi biga zluɓ ngi mburo, ngi cica mbur angi jiviɗ mezle, ngi sirka mburo ngi gi gwat mijeŋŋe,

¹⁷ ɓa mbur ngi Buymisemuŋ a ndila kuy kuy wãˀ, i mbur mujuw vu le ngi gi gwat mezle ko wanaka gar.