TILA MI 2 - Bible en langue guiziga

¹ Yi ɓi a kwacay ɗu na: «Naŋ kuy, anja i titila mumulo, i titila cifi ar ndumo!» Nah gar kwana, i ngatara lambaˀ.

² Yi ɓi ma: «Singire, i ɓi ngi gilaway» yo mumulo: «A pul gir mike?»

³ A mevel ɗu, i sipi jiviɗ ngi sirka dumvu ɗu le ti mbaazla, amma y'ada ti sinmijileŋ a mevel ɗu na si ɓula, i vula vu ɗu da gilaw, ɓa i pura gwat mezle vur mizli titirahay, magaka angi hin ngi siifa taŋ a ruwuyo.

⁴ Yi gi slra madiɗahay le haɗa: i ndir hayay le da ya, i gi guva ngi gudubun le,

⁵ i gi jarne ngi gwat memeɗehey le ati ngi widis ngi zumoy gar.

⁶ I nduɓ futuŋhoy le, ɓa ngi pa yam da widis memeɗehey aruŋ.

⁷ Yi hiɗik bekehey le, mizile ati mongosohoy jom ng'avi mekelemey misi ada zleˀe si, yo y'ada ti slahay ati away waɗ tumuŋhoy haɗa, fineˀ mizli mudumbuŋhoy ar ya a Zeruzaleme.

⁸ Ɓiri bara ati ɓiri tapasl tapasl, yi cikil le haɗa, yo zlili ngi buyoy ati ngi ngomna muvulikiy di. Y'ada ti mizli dimisey, ziley ati ngwasaya, yo gwat gar macira hiri da mbur titira, waɗ ngwasay haɗa teˀe.

⁹ Yi tiri mbur madiɗa, yi gi zlili le haɗa, fineˀ mizli mudumbuŋhoy ar ya a Zeruzaleme, Amma sin ɗu mijileŋ naŋ da avu ya.

¹⁰ Gwat hiri ɗu mawuɗ gar na, yi sli himaˀ ava ta, mumul wanaka gar na, a gi le a mevel ɗu, i sli himaˀ ta, asi slra ɗu ya maga gar na, mevel ɗu a mumul di le, nah na, i mi nga ya angi slra ɗu gar.

¹¹ Amma slra, ya miga ti haŋ ɗu gar, ati slra, ya mulum gir haɗa vurˀe gar na, i pura le keɗ keɗ. Amma nah gar na, i ngatara lambaˀ, yo naŋ ka sipi himiɗ ngataraŋ, anta pul gir neˀ le ar duniya misenna ta.

¹² Yo i pura ɓi ngi sinmijileŋ keɗ keɗ, waɗ birnga ati gi gilawa. Dar i ɓi: mbur masa sawa a dirba ɗu, ya buy na, a sa gi mbrike? Yo a sa gi gwat migakaŋ ndi le zleˀe si kwa?

¹³ Gwat ya mupura n'ani: mbur a cir tisi sinmijileŋ, fineˀ tisi gilawa, kaɓa mbur macir tisi li minjahha fineˀ tisi luvuŋ na.

¹⁴ Mbur misi sinmijileŋ, a pur di i gwat mizlir le, mbur gilawa, a gi di i gwat ngir luvuŋ. Amma ya i si na le, taŋ cuw taŋ, masa gi avu taŋ i gwat mupurla.

¹⁵ Dar ya i ɓi a kwacay ɗu na: gwat masa gi avu mbur gilaw na, a sa gi avu ya ya. Na ya mitiri misi sin jileŋ haɗa vuna vur mi ska? Yi ɓi a kwacay ɗu ma na, nah gar na, i ngataraŋ.

¹⁶ Asi mike na, mbur misi sinmijileŋ ati mbur gilawa, taŋ purla, wuluk keŋ vur taŋ anta, hã ngi sete. Angi hin ngi mbuŋ na, taŋ cuw taŋ, wuluk keŋ vur taŋ anta. Na zle, mbur misi sinmijileŋ a muc i muc mupurla ka mbur gilaw aya takwa!

¹⁷ Vurˀe, yi pura siifa hiris le, asi gwat mira gi ar duniya misenna gar na, avu ya i gwat malambaˀa: gwat gar i ngatara lambaˀ, naŋ ka sipi himiɗ ngataraŋ.

¹⁸ Ya na, slra ya maga ar duniya misenna gar, ati ya masa pula da mbur masa ci ar li ɗu na, yi pura hiris le.

¹⁹ Da naŋ a sa gi i mbur misi sinmijileŋ malla i gilaw kwana, misina i waka? Ko da naŋ a sa tiri le i buy ngi slra, ya miga taŋ gar ti sinmijileŋ ar duniya misenna tekeɗe kwana, nah gar na, i ngatara lambaˀ.

²⁰ Slra ya miga gar ar duniya misenna na, yi zil marava le vurˀe.

²¹ Asi mike na, mbur miga slra naŋ ti sinmijileŋ, ti sin ngi gi gwat waɗ ti bi jiŋ na, ko da ada kwana, a sa vula mi nga naŋ da mbur migi slra geˀ le ta. Nah gar na, i ngatara lambaˀ, yo i gwat malambaˀ miwãˀ naŋ.

²² Haˀaw, slra mbur miga gar ati gidaŋ, naŋ muvula wãˀ ngi gi slra ar duniya misenna na, a sa pulaŋ gir mike?

²³ Asi mike na, hin ngi siifa naŋ gar na, i bonoy tewle, yo naŋ magi welele gar na, i lik tewle, ko ti duvuɗ tekeɗe kwana, musuka vu anta a mevele ta: Nah kwana, i ngatara lambaˀ.

²⁴ Gwat mezle loŋ vur mbur titira anta, sey zum ati si tewle, yo titila cifi mundum ar slra naŋ. Nah gar na, yi pura, i gwat mabo tisi haŋ ngi Buymisemuŋ.

²⁵ «Asi da Buymisemuŋ a vula ta na, mazum gwat, yo mamumul gu i waka?»

²⁶ Haˀaw, mbur Buymisemuŋ mupura le kuy avu hiri na, a vulaŋ sinmijileŋ, si na gi gwat ati mumul, amma mbur gilaw na, a pulaŋ a gi welele ngi cikila gwat ati ngi kuso gwat, ɓa ngi vul da mbur Buymisemuŋ mapura kuy avu hiri tuwa. Nah gar kwana, a cuh ka cunju lambaˀ, yo i himiɗ ngataraŋ.