SOFONI 3 - Bible en langue guiziga

Zeruzalem a cine zil ngi Buymisemuŋ ta

¹ Walahay maslikiɗ ɓi, misi dili, yo walahay matik ˀay da mizli na, kay, naŋ ar bonoy!

² A cine mizilakaŋ na ta, a cine mi da gwat mudubunakaŋ di na ta, a ka mevele ar Bumbulvuŋ ta, a ngum kircih ng'avu Buymisemuŋ naŋ ta.

³ Buy ngi raˀahaya, taŋ kaɓa moboroy ar li tuwuy, migi kiita naŋhaya, taŋ kaɓa kiriɓuhoy majam gwat ti li zuyyo ko a pulam neˀ le ngi humbuɗ ti miprike ta.

⁴ Mijiviɗ naŋhaya, i muhuhumo vuhoy, i muhuloy. Gwat muvula le da Bumbulvuŋ ma na, masay naŋhaya, a ɗuvakaŋ hirnga ta, A ngilaka ɓimujuwa le.

⁵ Na ar walahaya, Bumbulvuŋ naŋ jeŋŋe ngbaŋ, naŋ anta gi gwat malambaˀa ta. A ga kiita naŋ vur miprik gar, li mawun gar na, naŋ anta zluɓ ɓi ta. Amma, gwat ngi meseme, misi moˀore anta si na ta na si.

⁶ Buymisemuŋ a ɓi: «Sukwihey mitaˀ taˀa, i ngizla taŋ le kap kapa, hay taŋ musuburoy misi ar moholoy mira zlirama, i waha taŋ le avra. I kiɗa cikiviɗ taŋhaya le: ko mbur macuh anta mata. Walahay taŋhaya, i waha taŋ le: ko mbur miar taŋ anta mata.

⁷ Yi ɓi ti kwacay ɗu na: «Ko mbri, walahay a sa ciniy mi neˀ le, a sa tiɓa ɓi ngi gwat ya midubunaŋ di. Y'anta sa waha hay nga naŋ ta.» Da ya mira kuta taŋ ti bonoy na, a wusam vu kutum ngi hirya vu taŋ ti gwat malambaˀa.

⁸ «Yawwa! inga kutikikiy. Kutukoko hin ya masa slikiɗ ngi ga sedewo kumo! Kiita ɗu ya maga, i ngi muɗa sukwihey buzok buzok, i ngi jumo zuma buyoy, ɓa i ga mevel ɗu wãˀ ng'ar taŋ, mevel ɗu mifõh fõh na, ɓa i pa wãˀ ng'ar taŋ, asi hirwuy kurzluˀ gara, i sa zluma ti suloŋ ɗu misi ka vu na. I ya Bumbulvuŋ maɓi.

Buymisemuŋ a sa mbiɗa wuluk ngi mizli

⁹ Akẽh na, i sa ga ɓa ɓi malambaˀ a bo ti balam mizli ta, ɓa taŋ cek a zilam slimiɗ ngi Bumbulvuŋ, ɓa a gikiy mezegwel ti mevel misi purla.

¹⁰ Ko zar kileŋ, a duba mizaw Etiyopi kwana, mizli miteŋteŋ ɗuwoy, ya mizliɗa taŋ hirnga na, a sa sikiy ti gwat ngi vul taŋhaya.

Mizli Israyeley mindiram

¹¹ Ti dinah, sukwi ɗu, k'anta sa gi mesem ti gwat ngi gi ɗik malambaˀ na mata, ti slikiɗa ɓi ɗik avu ya mata, asi hirak ti nah na, mizli ɗikey mahuhumom vu fineˀ gidaŋ na, i muɗa taŋ le avra, joˀ kisa pula jijih ɗik ar muwã mipala.

¹² Is ngi mizli mihina hirnga misi murgahaya, i sa pula taŋ a wuzla kumo. Taŋ a sa sipam jiviɗ ngi ɗum ti Bumbulvuŋ.

¹³ Israyeley mindirama, anta sa gam gwat malambaˀ mata, t'anta sa gam slir mata, anta sa lumaka taŋ gurjik ar li ɓi mi ngi tikina vu mata. Amma a sa zumam, a musukam vu, ko mbur masa ga taŋ zluwun anta.

Israyeley mindiraka Zeruzalam hiri nah muŋ

¹⁴ Walahay Siyoŋ, ji salalay, Israyel, ngil di wuy ˀay paɗ a muŋ, Walahay Zeruzalem, ka mumul, yo singir ti mevel ɗik pusak.

¹⁵ Bumbulvuŋ mujuwu ti kiita tuwa, a pula ɓi nah le teˀe, a ɓula mesene ɗike le avra. Bumbulvuŋ, naŋ buy Israyel vuna, naŋ da ati ka, kum anta sa zluwunam ti gwat malambaˀa mata.

¹⁶ Ti hin nah a sa ɓaka Zeruzaleme: «Walahay Siyoŋ, ki zluwun ta, anja ki pula haŋ ɗike silber silber ta.

¹⁷ Bumbulvuŋ Buymisemuŋ ɗike, naŋ da ati ka. N'ada ti gidaŋ naŋ, ti bugawla naŋ. A ra mumul vur ka, naŋ mawuɗ ka na, ara vuluw siifa nawayaŋ. A ra zluzluɓ, yo ara ji salalay vur ka.»

¹⁸ Buymisemuŋ a ɓi: «Mizli misi taŋ ar mumul ngi muguzlum ta na, i sa cukulo hirnga taŋ, asi taŋ zleˀe kileŋ avu ka, mesem misirta Zeruzalem na, i sa zuɓa avra.

¹⁹ Ti hin nah na, mizli magukum bonoy na, i sa kuta taŋ cek. Mbur mulum waˀa le gar na, i sa ɗiyaŋ di, mizli mizizahay na, i sa cukulo hirnga taŋ. I sa ɗuvukum hirnga, joˀ slimiɗ kum a sa zil asi ruwuy gar kum mipam mesem ara na.

²⁰ Hirak ti nah na, i sa mo ti kum, a sa gi tapas ya masa kuso hirnga kum na. Slimiɗ kumo a sa zil, yo i sa ɗuvukum hirnga, a wuzla mizli ngisi ruwuyoy gar, tapas ya masa mbiɗa gwat masa gi avu kumo, a mihiri kum na, i ya Bumbulvuŋ maɓi.