SOFONI 2 - Bible en langue guiziga

Zila mizli ɓa a mbiɗam hiri ng'avu Bumbulvuŋ

¹ Aw mizli manja mesemey, kusom, wulkam,

² daf dumbuŋ ar ɓi micica masa ndilawa, yo dumbuŋ ar papas masa ci yimak kaɓa cici, dumbuŋ ar ɓi ngi mevel ngi Bumbulvuŋ maso ng'ar kum, dumbuŋ ar hin ngi himaˀ ngi Bumbulvuŋ masa so ng'ar kum.

³ Kum mihina hirnga ngi si ruwuy gar, kum magam slra ti ɓi mikaslsla ngi Bumbulvuŋ na, sipakaŋ. Supaka ɓi mijeŋŋe ati hina hirnga, da kisa bam njiraŋ cimak ar hin ngi himaˀ ngi Bumbulvuŋ kwana.

Guco mi da mizli ngi si pas ngi pastaˀ

⁴ Hirwuy Gaza, a sa ndir njoŋ, hirwuy Askaloŋ, a sa ngizlaka kap, ti wuzla papas sina, a sa bam ti mizli ngi ruwuy Asdokoyo avra, yo a sa ɓulaka mizli ngi ruwuy Ekroŋ avra.

⁵ Kum mizli ngi ruwuy vay mubuliyey, kum sukwi Kaftoroy, kay kum ar bonoy. Bumbulvuŋ a ɓa mingiɓi naŋ ani na, vur kumo: «Kanaˀan, hirwuy ngi Filistihey, i sa puluw njoŋ manja mizli.

⁶ Hirwuy vay mubuliyey na, a sa tiri li jigina ginewey, pala da ginewey waɗ gezleŋ ngi ginewey.

⁷ Joˀ li vay nah, a sa ndir da is ngi mizli Zudahay. Taŋ, a sa ram ti ginew taŋhay nga jigin a diga, ti pastaˀa, a sa muskam vu ar hayay misi a Askaloŋ, asi Bumbulvuŋ Buymisemuŋ taŋ, a sa jiniˀis asi taŋ, yo gwat masa gi avu taŋ na, a sa mbiɗa pal.

Bumbulvuŋ muguco mi da mizli ngisi pas ngi miprik

⁸ Yi cine zi ngi mizli Moˀapay na le, a zaka mizli Amoŋhoyo le gbaˀ avu tesle, taŋ ara zaka mizli ɗuwoyo, yo taŋ masikaka hirwuy taŋ na, mbele hirwuy ngi mizli ɗuwoy.

⁹ Kaɓa ya misi ti siifa gisiŋ na, Moˀap a sa tiri kaɓa Sodom, yo mizli Amoŋhoyo, a sa tiram kaɓa Gomoroy. A sa tiri li ngi sisim ati ngi mandaŋ a tiri ɓuh mikirɗak kirɗak wãˀ. Mizli ɗuwoy mindiram ti siifa, a sa vaka taŋ gwataya, yo a sa tiɓaka hirwuy taŋ mindire da taŋ. I ya Bumbulvuŋ misi gidaŋ wãˀ, Buymisemuŋ ngi Israyeley maɓi.

¹⁰ Hana i gwat taŋ masa lumam vur huhumo vu taŋ na. Asi a zaka sukwi ngi Bumbulvuŋ misi gidaŋ wãˀa le, yo a sikaka hirwuy taŋ na, mbele mizli ɗuwoy.

¹¹ Ya Bumbulvuŋ i sa bugo vu ti himaˀ vur taŋ, i sa vuso kuli ngi si ruwuyoyo ceke, joˀ sukwi ngi mizli mikileŋ kileŋhey gar, a sa hurukom huruk huruk a mbuŋ ɗu, mbur gar a ruwuy naŋ a ruwuy naŋ.

Bumbulvuŋ muguco mi da mizli vay ruwuy ati vay muŋhoy

¹² Kum mizli Etiyopihey, maslalam ɗu a sa slinukum gor njoŋ.

¹³ A sa zuɓa haŋ naŋ ng'ar mizli vay muŋhoy waɗ ng'ar Asirihey, a ngizla taŋ. Ninive, a sa tiri di walahay muwaha le ngirwaŋ ngirwaŋ, mumuˀulo kaɓa wuzlaɓuh mikirɗak kirɗaka.

¹⁴ Gezleŋ ngi ginewey ati sukwi ngi gwat misah mihey wal wal gar, a sa muskam vu a hur walahay nah, sutete ati cemceme, a sa hinam ar mecepek naŋhaya. A mi fenetire, a sa cinam tuwuy ngi ɗiyuwoy. Zle a mizlingre sina, walahaya taˀ i diŋ, mbal ngi mitereye gilaɗ gilaɗ ar li babaraŋ.

¹⁵ Walahay macir hiri, muro zuy zuyo naŋ kahana so. Naŋ ara ɓi zleˀe na: «I ya si ta na, i wa aruŋ maka!» Na a sa tiri ɗoɗok, yo a sa tiri kuɓuŋ ngi gwat misãmihey mbri mbri maka? Ko wa gar macuh a cikeˀe, a curuɓ, a hira hirnga har har.