Slu cuw 8 - Bible en langue guiziga

Bumbulvuŋ misirika Israyeley a wuzlaɓuh

¹ Moyis a ɓi: Ɓimuɗuvahay ya mavulukum taŋ dana ani na, gam taŋ slra, ɓa kisa ndiram ti siifa, ki sikam haɗa, yo kisa cam nga hirwuy Bumbulvuŋ miɓi ɗaˀ le ti hudum, a sa vulukum di tuwa.

² Wulkaka Bumbulvuŋ Buymisemuŋ kumo mutukukum ˀay ngi zuɓa jiviɗ madiɗa angi vi kukur mufaɗ a wuzlaɓuh mikirɗak kirɗak na. A zlirukum ati ɓi mutuwaˀ tuwaˀhay, ɓa ngi jiɗa kwacay kumo, ɓa a si na wuluk ngi mevel kumo, da ki ra jaka ɓimuɗuva naŋhaya a hirnga, malla kum anta jaka taŋ ta kwana.

³ A dirba bonoy miwal wala, a gukum may. A dirba maya kwana, a vulukum man. I gwat ngi zum kum misinaka ta, yo dideˀ kumoy a si na ka ta Naŋ kine, a wuɗ ɓa a bugukum di na: mbur titira a ndir ti siifa ti ɗaf cummo ta, amma a ndir ti siifa ti mingiɓi mabo ti balam Bumbulvuŋ.

⁴ Zana kumoy miɓaˀ ɓaˀ avu vu, a hiryam ta. Angi vi kukur mufaɗ na, sar kumoy a hislam ta.

⁵ Anja sinaka sin le, slaka wala ngi ɓi ani kuy kuy, Bumbulvuŋ Buymisemuŋ kumo a surukukum na ti sirik, kaɓa cine masirik mangal naŋ.

⁶ Ɓimuɗuva ngi Bumbulvuŋ Buymisemuŋ kumo, jaka a hirnga, gaka gwata kaɓa naŋ mawuɗo, yo cinakaŋ mi.

Tikiney wal wal masa gam avu Israyeley angi hirwuy Bumbulvuŋ muvula taŋ di

⁷ Moyis a ɓi: Bumbulvuŋ Buymisemuŋ kum, a wuɗ a ci ti kum nga hirwuy mezle, i hirwuy misi mekepel ara zuɓu, hirwuy misi miviɗiviɗi ngi yamay, misi yam mamulo tir mijileŋ naŋ ngi ruwuy ng'ar li micay malla ng'ar muwãhay.

⁸ I hirwuy magi gwat: alkamari, daw giziŋ, gudubun, uruf, hunduruk, i hirwuy misi mal ngi tutumbur ara jõh jõh waɗ mam lit lit.

⁹ Adiga, anta sa vulukum ɗaf ti vul ta, gwat masa kic avu kum anta. Adiga, ɓiri ada ar ɗuguroyo, yo ɓiri gaza muwuy wuy ada a muwãhaya.

¹⁰ Adiga, kisa zumam hã ki mbam, joˀ kisa gaka sise da Bumbulvuŋ Buymisemuŋ kumo, vur hirwuy mezle, naŋ muvulukum di na.

¹¹ Amma jam lesl so! Anja ki puyukom hirnga ti Bumbulvuŋ Buymisemuŋ kumo ta, ɓa ɓimuɗuva naŋhay, sirik naŋhay ati ɓimujuwa naŋhay, ya muvulukum taŋ dana ani na, ki gam taŋ ka ɓi ngi sefel ta.

¹² Da ki ra zumam hã ki mbam, ki ra ndiram hay mezlehey ngi hin,

¹³ da sla kumoy, tumuŋ kumoy, ˀaw kumoy, a sikam le haɗi, dala ada haɗi, ɓiri tapasl tapasl ada haɗi, ati zlili mekelemey gar na,

¹⁴ anja ki huhumom vu, ɓa ki pulaka Bumbulvuŋ Buymisemuŋ kumo ta. Mubo ti kum tir beke baɗ a ruwuy Ezipte, i naŋ.

¹⁵ Mingir ti kum wuzlaɓuh mikirɗak kirɗak magi zluwun, misi kaw mihimaˀhay haɗi ati urcoy na, i naŋ. I li mumuˀulo wãˀ, madalyam a kuɗukum le ara. Amma naŋ a bukum ti yam tir mandazlay migidaŋ haɗi.

¹⁶ A wuzlaɓuh mikirɗak kirɗak nah na, a vulukum man, i gwat ngi zum dideˀ kumoy misinaka zleˀe ta. A zlirukum ati ɓi mutuwaˀhay wal wal, ngi ci ti kum ar murga, ɓa a ci a kwacay kum. Dambalaka ara ɗiyukum di i li ngi wuya ngi tumbuŋ.

¹⁷ Anja ki ɓam ti kwacay kumo: «I gam zlili le ti haŋ ndra, ti gidaŋ ndra na, ki ɓam ta.»

¹⁸ Amma wulkaka ɗi, muvulukum gidaŋ ɓa ki gam zlili na, i Bumbulvuŋ Buymisemuŋ kum, yo hã dana kwana, ara ga gwat ngi jumoˀay naŋ miɓa ti hudum da dideˀ kumoy zleˀe na aruŋ.

¹⁹ Asinta, kisa puyukom hirnga ti Bumbulvuŋ Buymisemuŋ kumo, ki sipam kulihey, ki gaka taŋ mezegweley, ki huruk hurukam a mbuŋ taŋ. I ra ɓukum di ɗaˀ ɗaˀ le dana, i sa nguzlukum pay wãˀ.

²⁰ Haˀaw, da kum anta cinaka mi da Bumbulvuŋ Buymisemuŋ kumo ta na, a sa nguzlukum pay, kaɓa naŋ masa ngizla sukwi ngi mizli a mbuŋ kum na ya.