Slu cuw 3 - Bible en langue guiziga

Israyeley mitiɓaka hirwuy Ok

¹ Moyis a ɓi ma: a dirba nah, i muslam ɓa i jiɗam ngir ti muwã Basaŋ. Amma Ok buy madiɗa ngi Basaŋ, a boko ati soje naŋhaya, ɓa i zliram kiɗa vu a Edreyi.

² Dar Bumbulvuŋ a ɓiy na: «Ki zluwun di ta, asi i vuluw di le asi haŋ ɗik, naŋ ati soje naŋhay gar waɗ hirwuy naŋ vuna, kisa gi ti taŋ kaɓa ka migi ti Sihoŋ, buy ngi Amorihey misi zleˀe a Heseboŋ na ma.»

³ Yo ma na, Ok buy ngi Basaŋ, Bumbulvuŋ Buymisemuŋ ndra, a vula ndra di le asi haŋ ndra jom ati soje naŋhaya. I ngizlaka taŋ le pay, ko i pulam mbur pal le ti siifa ta.

⁴ Akẽh si na, i tiɓaka walahay naŋhaya cek, ko mindir loŋ anta. I walahay kukur merkeɗ, li vay Argop misi a Basaŋ, Ok mazum buy ara na.

⁵ Walahay tayna, i muguno taŋ le kuy kuy ti mohol migilahay yik yik, mizlingrehey i migicahay le kap kap ti miviŋ mawun ti ka ti ka. Yo prokoy ada haɗa, muslufa tayna ta, i manja gun ti moholoy.

⁶ I musukuɗoko walahay tayna tur, yo i ngizlaka mizli pay, ziley, ngwasay waɗ ziri ma, kaɓa ndra migaka da buy Sihoŋ ngi Heseboŋ na.

⁷ Amma ginewey ati zlili ndra mutuɓoko di a diga na, i wam taŋ vu le da ndra ɓula.

Moyis muwunka hirwuy Galaˀat da mizli

⁸ Moyis a ɓi: Ti di nah na, i tiɓaka hirwuy ngi buy Amorihey mucuw na, hirwuy misi tisi pas ngi miprik ngi Zurdeŋ, ar wala ngi ciki sozo Arnoŋ ati muwã Hermoŋ.

⁹ (Mizli Sidoŋhoy a zilaka Hermoŋ Siriyoŋ, Amorihey a zilaka Senir.)

¹⁰ I tiɓaka walahay ngir ɗigaraya cek, waɗ hirwuy Galaˀata cek ma. Yo hirwuy Basaŋ cek hã sesẽŋ a Salka ati Adreyi, i walahay ngi Basaŋhay, Ok mazum buy ara.

¹¹ (Dambalaka, Ok buy ngi Basaŋ na, mindir pal asi Refayay i naŋ. Kes naŋ midikakaŋ ti naŋ, naŋ da a Raba aruŋ, Raba walahay hirnga ngi hirwuy Amorihey. A ciɗam di i mandazlay migidaŋ ka ɓiri, jek naŋ fineˀ metir mufaɗ, yo sliprik naŋ, a gi gwat ngi metir cuw.)

¹² Dar i tiɓaka hirwuy tayna so. Vay muwã Galaˀata reta, jom ti walahay naŋhaya, zle ar vay muŋ ngi Aroˀer ngi ciki sozo Arnoŋ, i vula le da dideˀ ngi Rubeney ati ngi Gatay.

¹³ Reta ngi Galaˀat vay numuŋ waɗ Basaŋ, Ok miwa gar na, i vula da reta ngi sukwi ngi Manasehey. Hirwuy vay Argop gar waɗ Basaŋ, a zilaka hirwuy ngi Refayay ma.

¹⁴ Dideˀ ngi Yayirey, mangal ngi Manase, a tiɓaka hirwuy vay Argop vuna, hã sesẽŋ a hirwuy ngi Gesurihey ati Maka hay. A zilaka li vay Basaŋ nah ti slimiɗ naŋ. Ko dana kwana, a zilaka «Walahayay ngi Yayir».

¹⁵ Ya muvula Galaˀat na, da Makir mangal mekelem ngi Manase.

¹⁶ Zle a Galaˀat hã a Arnoŋ, i vula le da dideˀ ngi Rubeney ati ngi Gatay, maakway vay ruwuyo, tir sozo Arnoŋ, yo sozo ngi Yabok kwana, i maakway ati hirwuy ngi Amoŋhoy

¹⁷ ati Araba. Tisi pas ngi pastaˀa kwana, maakway a sipi sozo ngi mizaw Zurdeŋ, ar wala ngi miyam madiɗa ngi Zenezaret ati mubuliy mutuwak, hã sesẽŋ a sar muwã Pisga tisi pas ngi mipriki.

¹⁸ Akẽh na, i ɓukukum mingiɓi ɗu ani ɗaˀ ɗaˀ: «Muvulukum hirwuy hana da kum, i Bumbulvuŋ Buymisemuŋ kum. Wurenna, anja migi vurumoy gar, a hilaka gwat ngi vurum taŋhaya, ɓa a tuwuɗaka mizaw Zurdeŋ, sek a mbuŋ sukum kum Israyel mekelemeye.

¹⁹ Masa ndiram ar walahay, ya muvulukum taŋ na, sey ngwas kumoy ati ziri kumoy, i si na le kum ti ginewey haɗi.

²⁰ Jinaka sukum kumoyo, ɓa hã Bumbulvuŋ a vula taŋ li cifi wãˀ, kaɓa naŋ muvulukum di da kum na ya, yo ɓa taŋ kwana, hirwuy vay si pas ngi pastaˀ ngi dubazaw Zurdeŋ, Bumbulvuŋ Buymisemuŋ kumo muvula taŋ di na, a lumaka wãˀaya. A dirba nah, mbur gar a mi nga hirwuy nga naŋ nga naŋ, ya muvulukum di tuwa.»

²¹ Vurˀe, i ɓa mingiɓi ɗu le ɗaˀ ɗaˀ da Zozuwe ma, i ɓaŋ na: «Gwat Bumbulvuŋ Buymisemuŋ kumo miga gar da buy Amorihey mucuw na, ki pura le ti hiri ɗik takwa? Buyoy kum masa lumaka taŋ tuwaɗ dubazaw Zurdeŋ gar na, Bumbulvuŋ a sa gi ti taŋ ti jiviɗ mupurla kanah ya.

²² Ki zluwunam ti taŋ ta, asi Bumbulvuŋ Buymisemuŋ kumo a sa kiɗ vu ti haŋ naŋ ar li kumo.»

Moyis a ɓi ma: naŋ anta sa ci nga Kanaˀana ta

²³ Moyis a ɓi: Dar yi tumbulo Bumbulvuŋ, i ɓaŋ:

²⁴ «Aw Bumbulvuŋ Buymisemuŋ ɗu, madiɗa ɗik ati gidaŋ ngi zumabuy ɗike, ki biga le da gawla ɗike. Buymisemuŋ mekelem ada muŋ malla ada a ruwuyo, mindila gi slra ɗik mezle na kwa?

²⁵ Ambuh, puliy jiviɗ ɓa i tuwuɗa dubazaw Zurdeŋ, i ra puro hirwuy mezle misi ti diga na. Hirwuy mezle vay muwã waɗ muwã Libaŋ!»

²⁶ Amma Bumbulvuŋ a zuɓ himaˀ ng'ar ya vur kum. A ngum cine ɓi ɗu ta, dar a ɓiy: «Muk muduba, pula ɓi nah!»

²⁷ A ɓiy ma: «Jiɗ ng'ar mesengel ngi muwã Pisga, ɗuva hiri tisi pas ngi pastaˀ, tir vay muŋ, tir vay ruwuy waɗ tisi pas ngi miprik, pura kuy kuy, k'anta sa tuwuɗa Zurdeŋ hana ta!»

²⁸ Ɓa mingiɓi ɗike ɗaˀ ɗaˀ da Zozuwe, vulaŋ gidaŋ, tusoŋ didak, asi masa tuwuɗa mizaw Zurdeŋ ɓaˀ a mbuŋ mizli tayna i naŋ. Hirwuy ka mapura hana, masa wunka taŋ di i naŋ.»

²⁹ Zle ti nah na, ndr'i ndiram ar sozo misek duba cakay ati Bet-Peˀor na.