Biblia Todo Logo
Bìoball air-loidhne

- Sanasan -

Slu cuw 24 - Bible en langue guiziga


Ngwas muɓula le

1 Da kaɓa ani, mbur a zuɓ ngwas a sa zla a wuɗ mata, asi a pur gwat ngi mbiɗaŋ hirnga le ava. Kanah na, a tohoŋ ɗerewol ngi ɓula ngwasa toh toh, a vulaŋ di, a ɓula ti hay naŋ avra.

2 Naŋ ngwas tuwa mibi le ti hay naŋ na, a zuɓ zil mekelem.

3 Da mbur naŋ muzuɓa tuwa, a wuɗ mata ma na, a tohoŋ ɗerewol ngi ɓula ngwasa toh toh, a vulaŋ di, a ɓula ti hay naŋ avra. Malla ta, mbur vuna, a muc le ti mucu,

4 ko da i muɓula ti ɓul, malla ko da zil naŋ a muc ti muc kwana, zil naŋ muɓula mudumbuŋ na, a zuɓa ngi ngwasa mata, asi a gi le ava, i ngwas misi dili. Bumbulvuŋ a sa pura i gwat malambaˀ muwãˀ naŋ. Hirwuy Bumbulvuŋ Buymisemuŋ kumo muvulukum di da kum na, anja ki gam mungra ara ta.


Mbur muzuɓ ngwas wureˀe

5 Da mbur a zuɓ ngwas le wureˀ na, anja aru ng'ar soje ta, anta vulakaŋ slra mekelem ta. Amma a sa pulakaŋ mbak a haya ngi vi pal, ɓa a ga gwat ngi cira hiri da ngwas naŋ muzuɓa na.


Jika gwat ngi hila duvus

6 Da mbur ara jikuw ngurvuŋ malla zingaˀ ngi ngurvuŋ na, ki tiɓa ta, kite a jikuw di na, i gwat naŋ mangir di ar siifa naŋ.


Ji mbur ngi beke

7 Da mbur Israyel a ji sukum naŋ le, ɓa a gi di beke malla a hiɗika avra na, sey a kiɗaka vagay. Kite ki zuɓaka mungra misi a wuzla kumo le avra.


Kukula

8 Jam lesl avu sukwi ngi jiji ngi kukulahaya. Ɓi ya miɓa da masay levihey, ɓa a ɓukum di na, singilaka ɓi nah kuy kuy ɓa ki gam di slra.

9 Gwat Bumbulvuŋ Buymisemuŋ kumo miga da Miriyam, ti kum misi a jiviɗ, kum maboko ti Ezipte na, wulkaka ayɗi.


Ɓi ngi jika gwat tuwa ma

10 Da mbur a didiɗ gwat le avu kum, ko i gwat wanaka gar, da ki vulakaŋ di le na, ki cam ngi hay naŋ, ɓa ki ra zuɓam gwat ngi jik jak le ar deɗe ta.

11 Ki sa cici deŋ avra, mbur mididiɗa gwat vuna, a sa buw ti gwat ngi jike ng'avra.

12 Da i mbur misi murga na, ki hinam ti gwat naŋ mujukuw di vuna a hay kumo ta.


Ɗuva hirnga da mbur misi murga

13 Pas mira diɗ na, ki makaŋ ti zana naŋ mijika vuna, ɓa a sa hin ti zana naŋ avu vu, a sa ɗuwulukum mi, yo Bumbulvuŋ Buymisemuŋ kumo a sa pura, ki gam gwat mezle le.

14 Mbur misi murga migeˀ ircece le, ko i sukum kum, i mbur mulak, ko mbur ngisi ruwuy kum, malla da ko mbur ngir walahay kum, ara gi slra avu kum ɓa ki wurkakaŋ na, ki zumakaŋ ta.

15 Vulakaŋ migir naŋ vur hin gar, manja pas a diɗi. Asi naŋ i mbur migeˀ ircece, yo ara kutuko migir naŋ ti yam ar gojogoɗo. Da kanah ta na, a sa tuwuy ti ka a mbuŋ Bumbulvuŋ, kite ki gi mungra le.


Mbur gar a muca kwanay a duba sar naŋ

16 Da ziri a gam mungra le na, anta kiɗam vagay ar deɗe taŋ, i miyi taŋhaya ta, yo da miyi ziri a gam mungra le ya kwana, anta kiɗam vagay ar deɗe taŋ, i ziri taŋhaya ta ya. A kiɗaka mburo vagay na, asi mungra naŋ miga ti haŋ naŋ.


Gi mezle da misi murgahay:

17 Kiita ngi mbur mulak malla mutuhu na, ki hiryaka ta. Ki tiɓaka zana ngi ngwas wudiga majikuw di ta.

18 Wulukam keŋ ɗi, kum zleˀe i bekehey a Ezipte, yo Bumbulvuŋ Buymisemuŋ kumo a mbuɗo hirnga kumo le. Ya maɓukum ɗaˀ le, ɓa ki gam slra ti ɓi nah na vurˀe.

19 Da ki ra njikoko gwataya, da ki puyukom hirnga le ti mizer purla ar guva na, ki mam nga hilo di ta, kisa pulaka da moholoyoy, mutuhuhoy waɗ wudigahay. Dar Bumbulvuŋ Buymisemuŋ kumo a sa ɗuwulukum mi ar gwat ngi gi kum gar.

20 Naŋ kine ma, da ki ra ngilaka yi ngi tutumburoyo na, ki gaka holok naŋ ta. Holok nah a sa ndir da moholoyoy, mutuhuhoy waɗ wudigahay.

21 Da ki ra slaka yi ngi gudubun kumoyo na, ki gaka holok naŋ ta, holok naŋ da moholoyoy, mutuhuhoy waɗ wudigahay.

22 Anja ki wulkam keŋ, kum zleˀe i bekehey a Ezipte. Ya maɓukum ɗaˀ le, ɓa ki gam slra ti ɓi nah na vurˀe.

Bible en Langue Guiziga © L’Alliance Biblique du Cameroun, 2011.

Bible Society of Cameroon
Lean sinn:



Sanasan