Slu cuw 2 - Bible en langue guiziga

¹ A dirba nah, i mbiɗam duba ngi ru nga wuzlaɓuh mikirɗak kirɗak, kini ngir ti mubuliy lavaɗa, kaɓa Bumbulvuŋ miɓiy di zleˀe tuwa. I gunom, i gunom hã i zikam haɗa a muwã Seˀire.

Israyeley mutuwuɗaka hirwuy Edom, Moˀap waɗ Amoŋ

² Ti di numuŋ ada na, Bumbulvuŋ a ɓiy:

³ «Ani ki zikam le ar li guno wala muwã hana, zuɓam jiviɗ kini ngir ti vay muŋ!

⁴ Ɓa ɓi ɗu ani ɗaˀ ɗaˀ da mizli: «Ki sa tuwuɗam baɗ a Seˀir, hirwuy ngi sukum kumoy, ziri ngi Esawaya. A sa zluwunam ti kum ɓula, amma jam lesle.

⁵ Ki zlaka taŋ ta, y'anta sa vulukum gwat a ruwuy taŋ neˀ le ta, ko li ɗuva sar tekeɗe. Asi mike na, li vay muwã Seˀire, yi vula le da dideˀ ngi Esaway, ɓa a wunkakaŋ.

⁶ Ɗaf kum masa zumaka ati yam kum masa saka a diga, kisa hiɗikaka ti dala.»

⁷ Asi Bumbulvuŋ Buymisemuŋ kum, a ɗuwulukum mi le ar gwat ngi gi kum gar. Kum mutuwuɗoko wuzlaɓuh mikirɗak kirɗak na, a ki slimiɗ le ar kum, yo a gi ani vi kukur mufaɗ ati kumo, ko gwat mukicukum anta.»

⁸ Ɓa i bam tir vay Seˀir, hirwuy ngi sukum ndrahay, ziri ngi Esaway na, i bam zar kileŋ, i pulaka jiviɗ mabi tir sozo, mara bi a Elat waɗ Esiyoŋ-Geber na. Joˀ i kam kini ti wuzlaɓuh mikirɗak kirɗak ngi Moˀap.

⁹ Akẽh na, Bumbulvuŋ a ɓiy na: «Ki zlaka Moˀapaya ngi kiɗa vu ta, asi gwat ya masa vulukum neˀ le asi ruwuy taŋ anta. Naŋ kine, i vula hirwuy Ar na le da dideˀ ngi Lotoy, ɓa a ndir da taŋ.»

¹⁰ Amma, dumbuŋ angi Moˀapaya na, misi asi ruwuy Ara, i mizli Emihey. Emihey i mizli migidaŋhay, taŋ haɗi, yo i mizli suburohoy kaɓa Anakay.

¹¹ Mizli mekelemeye, a puraka taŋ kaɓa i mizli Refayay, kaɓa Anakay, amma Moˀapay, a zilaka taŋ Emihey.

¹² Ti zleˀe na, misi tir vay Seˀire, i mizli Horihey. Amma dideˀ ngi Esaway a ɓulaka taŋ, a ngizlaka taŋ, joˀ taŋ a pam ar li taŋ. Naŋ kaɓa Israyeley mitiɓaka hirwuy taŋ muwurenna, hirwuy Bumbulvuŋ muvula taŋ di na.

¹³ Akẽh na, Bumbulvuŋ a ɓa ndra: «Wurenna, zuɓam jiviɗ, tuwuɗaka mizaw ɗugur ngi Zereɗe.» Joˀ i tuwuɗaka mizaw ɗugur ngi Zereɗe.

¹⁴ Zle Kades-Barneya, hã tuwaɗ mizaw ɗugur ngi Zereɗe, i gam a jiviɗe, vi kukur makir nga dangafaɗa. Hã mizli migam vurum migam vurum, zle ar ndra mislikiɗoko na gar, a tikam pay a wuzla mizli. A gi kaɓa Bumbulvuŋ miɓa taŋ di ti hudum tuwa.

¹⁵ Gidaŋ ngi Bumbulvuŋ a ga ɓa a ngizla taŋ njeleleŋ wãˀ.

¹⁶ A dirba mizli migi vurumoy mingizlam njeleleŋ wãˀ a wuzla mizli na,

¹⁷ Bumbulvuŋ a ɓiy ani:

¹⁸ «Ki sa tuwuɗaka maakway ngi Moˀapa dana, joˀ kisa ngiraka hirwuy Ara.

¹⁹ Ki sa ra bam puɗak angi hirwuy ngi dideˀ ngi Amoŋhoyo, ki cicam zlak ar taŋ ngi kiɗa vu ta, asi ko gwat ya masa vulukum neˀ le angi hirwuy taŋ anta. Asi mike na, i vula hirwuy vay nah na le da dideˀ ngi Lotoy, ɓa a wunkakaŋ.»

²⁰ A puraka hirwuy vay nah na, kaɓa i hirwuy ngi Refayay. Na zleˀe na, misi anga i taŋ ɓula. Mizli Amoŋhoy a zilaka taŋ Zamzumoy.

²¹ Taŋ zleˀe i sukwi madiɗaŋ, taŋ haɗi, yo i mizli suburohoy kaɓa Anakay. Amma mizli Amoŋhoy mindiloko na, Bumbulvuŋ a ngizla Anakaya pay, Amoŋhoy a ɓulaka taŋ, joˀ taŋ a pam ar li taŋ.

²² Bumbulvuŋ miga da Edomoy, dideˀ ngi Esaway mipam angi hirwuy Seˀir na, i gwat misi purla. Buymisemuŋ a ngizla Horiheye, Edomoyo kwana a ɓulaka Horiheye, a pam ar li taŋ. T'ada ara hã dana aruŋ.

²³ Mizli Avihey misi zleˀe tir vay Gaza na, Kaftoroy musoko ti Kaftoro, a ngizlaka taŋ pay, a pam ar li taŋ.

²⁴ A dirba nah, Bumbulvuŋ a ɓiy na: «Zuɓam jiviɗ, tuwuɗaka mizaw Arnoŋ. Sihoŋ, buy ngi Amorihey misi a Heseboŋ, i wuɗ i vuluw di asi haŋ ɗik jom ati hirwuy naŋ. Zlaka tiɓa hirwuyo, gam vurum.

²⁵ Zle dana, i sa ga ɓa ki muɗaka didak da mizli, a zluwunam ti kum asi gazlavay kurzluˀ gar. Taŋ micinam ɓi kumo le cin si na, a jijikam ngbaˀ ngbaˀ ti zluwun a mbuŋ kumo.»

Israyeley mitiɓaka hirwuy ngi buy Sihoŋ

²⁶ Moyis a ɓi: I slino mizli ti mingiɓi ngi vula zuy, zle a wuzlaɓuh mikirɗak kirɗak ngi Kedemot, ng'avi Sihoŋ buy ngi Heseboŋ. I ɓaŋ na:

²⁷ «Pula ndra ɓa i cohom puɗak hirwuy ɗike. I jam jiviɗ tileɓ tileɓ tewle si, ko i ngizlam ti hazum ta, ti gula ta.

²⁸ Ɗaf ndra masa zumaka waɗ yam ndra masa saka na, i hiɗikaka ti hiɗiki. Pula ndra i cohom ar sar tewle si.

²⁹ Dideˀ ngi Esaway misi asi ruwuy Seˀire, a pulam ndra, i ngiraka hirwuy taŋ le, yo mizli Moˀapay misi asi ruwuy Ara, a pulam ndra, i ngiraka hirwuy taŋ le ma. I wuɗam ɓa i ra tuwuɗaka mizaw Zurdeŋ, ɓa i ra ndilam sesẽŋ angi hirwuy Bumbulvuŋ Buymisemuŋ ndra muvula ndra di na.»

³⁰ Amma Sihoŋ, buy ngi Heseboŋ, a pula ndra ɓa i bam ti ngi hirwuy naŋ ta. Asi mike na, Bumbulvuŋ Buymisemuŋ kum, a ga ɓa wuluk naŋ a mbiɗi ta, yo ɓa hirnga naŋ a tiri gidaŋ, asi a wuɗ a vulukum di tapasa asi haŋ kum.

³¹ Dar Bumbulvuŋ a ɓiy na: «Ani zle wurenna, i ra vuluw buy Sihoŋ jom ati hirwuy naŋ. Zlakaŋ ɓa ki tiɓaka hirwuy naŋ.»

³² Buy Sihoŋ a boko ati soje naŋhay nga zlir dibiɗ ti ndra, ɓa i kiɗam vu a Yahas.

³³ Joˀ Bumbulvuŋ Buymisemuŋ ndra a vula ndra di asi haŋ ndra, i kiɗaka taŋ ati ziri taŋhay waɗ soje naŋhaya gar.

³⁴ A dirba nah si na, i tiɓaka walahay naŋhaya cek. I kiɗaka taŋ krap krap pay wãˀ. I ngizlaka ziley, ngwasay waɗ ziri pay wãˀ, ko i pulam mbur ti siifa pal ta.

³⁵ I pulam da ndra sey i ginewey ati gwatay misi ar walahay ndra mitiɓaka taŋ da ndra na.

³⁶ Zle ar walahay Aroˀer misi a ciki sozo Arnoŋ ati walahay mekelem ada ar sozo misi purla ati ngi Arnoŋ, hã sesẽŋ a hirwuy Galaˀat, ko walahay misi i tiɓaka ta na, anta. Bumbulvuŋ Buymisemuŋ ndra a vula ndra taŋ le cek.

³⁷ Misa ndire, sey hirwuy ngi Amoŋhoy, asi i gumbaˀam ng'avu taŋ ta, waɗ hirwuy misilaɓɓa ngi ciki sozo ngi Yabok gar, walahay muwãhay, waɗ lihey Bumbulvuŋ Buymisemuŋ ndra mitika ndra vurˀe vurˀe na tewle.