Slu cuw 1 - Bible en langue guiziga

MINGIƁI MUDUMBUŊ NGI MOYIS ( 1—4 )

¹ Ɗerewol hana, a sluf di i ɓi Moyis miɓa da Israyeley gar ti taŋ misi tisi pas ngi miprik ngi mizaw Zurdeŋ, ar papala migweˀ avu walahay Suf, misi ar wala ngi Paraŋ, Tofel, Labaŋ, Haserot waɗ Di-Zahap.

² Zle a muwã Horep hã a Kades-Barneya, tir jiviɗ mabi tir muwã Seˀir na, sey gwat ngi hin kuruˀ ngaŋ kaˀ ar li ru.

³ Vi kukur mufaɗ a dirba Israyeley muboko ti ruwuy Ezipte, hin mudumbuŋ ngi kiya mukuruˀ ngaŋ kaˀ naŋ na, ɓi Bumbulvuŋ muɗuva da Moyis, ɓa a ɓa da Israyeley na, Moyis a sipa taŋ di tiɗeˀe.

⁴ A gi kahana, a dirba Moyis mipa hirnga da Sihoŋ, buy ngi Amorihey misi a Heseboŋ, waɗ da Edreyi-Ok, buy ngi Basaŋ misi a Hasetarot.

⁵ Angi hirwuy Moˀap, tisi pas ngi miprik ngi Zurdeŋ na, Moyis a zla dubuna ɓimuɗuva ngi Buymisemuŋ da mizli, mingiɓi naŋ ani:

Buymisemuŋ mupula jiviɗ da Israyeley ɓa a cohom le

⁶ Ti ndra misi zleˀe a muwã Horep na, Bumbulvuŋ Buymisemuŋ ndra a ɓa ndra ani: «Ani ki zikam le haɗa a muwã hana.

⁷ Wurenna, zuɓam jiviɗ, a ram ng'ar vay muwã ngi Amorihey ati midigwi taŋ Kanaˀanaya, i li micay ngi Zurdeŋ, hirwuy vay muwã, hirwuy mikini ngir ti ruwuy, vay ɗigaray, vay ruwuy naŋ, li misilaɓɓa ngi ciki mubuliy, a ram sesẽŋ a muwã Libaŋ, yo sesẽŋ a Efrat mizaw madiɗaŋ.

⁸ Puraka, yi vulukum hirwuy nah le. A ram, ara pam araŋ, i hirwuy ya Bumbulvuŋ miɓa ɗaˀ le da dideˀ kumoy, Abraham, Izak waɗ Zakop ati ziri taŋhay nga mbuŋ tuwa.»

Moyis mihil migi kiitahay

⁹ Moyis a ɓa taŋ na: I ɓukum di le zleˀe: «I ru ti kum pal ɗu gu ta.

¹⁰ Bumbulvuŋ Buymisemuŋ kumo a ga, ki sikam le haɗa. Ani dana, kum wenewene kaɓa wurzlaŋhay a muŋ.

¹¹ Bumbulvuŋ, Buymisemuŋ ngi dideˀ kumoy na, anja a sirkukum kahana, is durmuk ava ma, yo anja a ɗuwulukum mi kaɓa naŋ miɓa ɗaˀ le tuwa:

¹² ɓa ɓi mutuwaˀ kumoy, gwat kum macufuɗam waɗ tiri kumoyo, i ya pal ɗu maɗiya taŋ na, a gi ta.

¹³ Wunoko a wuzla mizli kumoyo, mizli kum misinaka taŋ le, i misi sinmijileŋhey, misi lesley, ɓa i sa cifa taŋ i buyɓihey a wuzla mizli.»

¹⁴ Joˀ ki mbiɗikiy di na: «Ɓi ka maɓa ndra di, ɓa i gaka hana, i ɓi mezleŋ.»

¹⁵ Ɓa ngi ru ti kum so na, yi wuɗ mizli misi sinmijileŋhey, mizli kum misinaka taŋ le, yo misi i buyɓihey ar sukwi kumoy zleˀe si, jo yi cifa taŋ i buyoy a hirnga mizli durmuk durmuk, skat skat, kukur zlum kukur zlum, kuruˀ kuruˀ. Mekelemey i mijigina lihey ar sukwiheye tiɗeˀe.

¹⁶ Akẽh na, i juwa ɓi ani da migi kiitahay misi a wuzla kumo, i ɓa taŋ: «Jikaka slimiɗ kuy kuy ngi cine mingiɓi ngi sukum kumoy masoko taŋ nga mbuŋ kum na. Yo da ko a soko di i mbur Israyel ati Israyel cil naŋ, malla da ko i mbur Israyel ati mbur mulak misi asi ruwuy kumo kwana, kisa gaka taŋ kiita rak raka.

¹⁷ Ki puram mbur ti pur ngi ji ti kiita ta, ko mbur mizlew, ko mbur micawwa, cinaka mingiɓi naŋ. Ko ki zluwunam ti mbur pal ta, asi ki gaka kiita na, ti slimiɗ ngi Buymisemuŋ. Da ɓi a funukum le na, so ɓikiy di, ɓa yi pura ɓi nah ya.»

¹⁸ Ti di nah na, yi ɓukum ɓi ngi gwat ngi giheye le cek si.

Cina mi ta ngi Israyeley a mi maakway ngi ruwuy Buymisemuŋ muvula taŋ di

¹⁹ Akẽh na, Bumbulvuŋ Buymisemuŋ ndra, a pula ndra jiviɗ, ɓa i slikiɗam baɗ a muwã Horepe, i ngiraka wuzlaɓuh mikirɗak kirɗak, ciɗak ciɗak, magi zluwun, kum mupuraka, misi tir jiviɗ mabi tir vay muwã ngi Amorihey na, a dirba ndra mindilaka Kades-Barneya.

²⁰ Yi ɓukum na: «ki ndiloko le ar vay muwã ngi Amorihey, Bumbulvuŋ Buymisemuŋ ndra mavula ndra di tuwa.

²¹ I hirwuy, Bumbulvuŋ Buymisemuŋ kum, mavulukum di, n'ani. A ram, ara tiɓaka, kaɓa Bumbulvuŋ, Buymisemuŋ ngi dideˀ kumoy miɓa ɗaˀ le zleˀe tuwa. Ki zluwunam ta, mburom mbor!»

²² Dar ki soko cek ng'avi ya, ki ɓikiy: «Slinukum mizli a mbuŋ ndra, ɓa ara puroko ndra hirwuyo, ɓa a sa ɓam ndra ɓi ngi jiviɗ ndra masa bam ti raˀa, waɗ walahay ndra masa ndilam anga vuna.»

²³ Yi pura na, wuluk kumo naŋ kuy. Vurˀe, yi wini mizli kuruˀ nga cuw a wuzla kumo, mbur pal ar sukwi gar.

²⁴ A zuɓam jiviɗ kini ngir ti ruwuy vay muwã, a ndilam ar wala muwã ngi ci nga Esekol, a puraka hirwuy ngi diga tuwa.

²⁵ A ngiloko yi ngi widis ngi digahaya, a soko ndra taŋ a haŋ, a ɓam ndra na: Hirwuy, Bumbulvuŋ, Buymisemuŋ ndra muvula ndra di na, i hirwuy mezleŋ!

²⁶ Amma ki ngumam ru nga diga ta, ki slam himaˀ avu mingiɓi ngi Bumbulvuŋ Buymisemuŋ ndra.

²⁷ Ki dirɗakaŋ a hur guɗuk kumoyo, ki ɓakaŋ: «Bumbulvuŋ mubo ti ndra ti ruwuy Ezipte na, a zlir ti ndra avu hiri ta ti zlir. A bo ti ndra ngi vul da Amorihey, ɓa a kiɗam ndra, ɓa a ngizlam ndra!

²⁸ I ram nga diga vuna a gi mike? Sukum ndrahay a kiɗam ndra vu tay tay, a ɓam ndra: Mizli ngi digahaya, taŋ haɗa, taŋ gidaŋ fineˀ ndra. Walahay taŋhaya, i walahay madiɗahay, mugunohoy gun gun ti mohol hã a dadala muŋ. A puraka mizli suburohoy, dideˀ ngi Anakay na le a diga ma.»

²⁹ Yi mbuɗukum di: «Ki jijikam ta, ki zluwunam ta!

³⁰ Bumbulvuŋ Buymisemuŋ ndra miɓaˀ a mbuŋ kum na, a sa kiɗ vu ti haŋ naŋ ar li kumo, rak rak ati naŋ miga a mihiri kum a Ezipte na.

³¹ Yo a wuzlaɓuh mikirɗak kirɗaka, ki puraka naŋ mijijiro kum, kaɓa mbur majijir mangal naŋ na le, ki zuɓoko jiviɗe bummoˀ hã sesẽŋ ar li hana.»

³² Gar ti nah kwana, ki pulaka mevel kumo da Bumbulvuŋ Buymisemuŋ kumo ta na si.

³³ Miki ɓaˀ a mbuŋ ngi supukum li pi sar na, i naŋ vuna ngbaŋ. Ti duvuɗo, naŋ ar musure ngi vu, ɓa a ciɗika jiviɗ kum mazuɓaka, yo ti papasa, naŋ ar gazlavay.

³⁴ Bumbulvuŋ a cine mingiɓi kum miɓaka na le. A ji mevel, a hudum, a ɓi:

³⁵ «Hirwuy mezle, ya muhudum ɓa i vula da dideˀ kumoy na, ko mbur pal masa pura asi mizli malambaˀ migwene tayna anta.

³⁶ Sey Kalep mangal ngi Yefune masa pura, i sa vulaŋ hirwuy naŋ mira puro di na, da naŋ ati ziri naŋhay, asi a sipa jiviɗ ɗu le ti mevel purla.»

³⁷ Bumbulvuŋ a ji mevel le ɗaˀ ar ya asi kumo. A ɓiy na: «Ko ka vuna Moyis, k'anta kisa ci nga hirwuy nah vuna ta.

³⁸ Amma gawla ɗik Zozuwe mangal ngi Nuno, a sa ci ɓula. Tusoŋ didak, asi masa vula li ɓa a ndir da Israyeley i naŋ.»

³⁹ A dirba nah, Bumbulvuŋ a ɓukum gar kumo: «Ki ɓam zleˀe na, a sa jaka ziri kumoy ng'ar beke kini ta? Na dana ani na, a sinaka mezle ati malambaˀa ta, i taŋ masa cam ati Zozuwe nga hirwuy nah. I sa vula hirwuyo da taŋ, masa pam ara i taŋ.

⁴⁰ Amma kumo, mbiɗam duba, mam, ngiraka wuzlaɓuh mikirɗak kirɗaka, ngir ti mi mubuliy lavaɗa.»

⁴¹ Moyis a ɓa taŋ ma: Tapasa, ki mbiɗikiy di: «I gam mungra le avu Bumbulvuŋ. Amma wurenna, i wuɗ i ram, i ra kiɗam vu, kaɓa Bumbulvuŋ Buymisemuŋ muɗuva ndra ɓi nah na gar.» Ko waka gar asi kumo, a zuɓa gwat ngi vurum naŋ. Ki waka zleˀe kaɓa kisa tiɓaka hirwuy vay muwã nah tuwaˀ tuwaˀ ta.

⁴² Dar Bumbulvuŋ a ɓiy so na: «Ɓa taŋ na: anja aram ng'ar vurumo ta. Asi y'anta a wuzla taŋ ta. Naɓa mesene taŋhay a sa kiɗaka taŋ.»

⁴³ Yi ɓukum le, ki cinikiy mi ta, joˀ ki mbiɗam hirnga avu mingiɓi ngi Bumbulvuŋ, ki huhumom vu, hã ki jiɗam nga muwã gbaˀ na si.

⁴⁴ Joˀ Amorihey misi a muwã nah na, a poko sar nga ji ti kum hirnga, a ɓulukum zititi kaɓa mam, baɗ ti kiɗ kumo, zle a Seˀire hã sesẽŋ a Horma.

⁴⁵ Kum mumoko na, ki tuwam kaɗam kaɗam a mbuŋ Bumbulvuŋ, amma Bumbulvuŋ a cine tuwuy kumo ta, a ki slimiɗ ar kum ta.

⁴⁶ Joˀ ki ndiram a Kades-Barneya, ki zikam haɗa.