SLUFA VU 4 - Bible en langue guiziga

Slra ngi sukwi ngi Levi a. Slra ngi dideˀ ngi Kehatay

¹ Bumbulvuŋ a ɓa Moyis ati Aroŋ na:

² «Tohoko slimiɗ ngi ziri mizile ngi Kehataya, vur muyo vur muyo, yo vur wazlaraya vur wazlaraya.

³ Mizli gar mindilaka le vi kukur makir, hã kukur zlum na, a sa vulaka taŋ slra mekelemey ada ngi gi ar guɗuk ngi zlir ti ya.

⁴ Slra masa vulaka da ziri mizile ngi Kehatay ngi gi ar guɗuk ngi zlir ti ya na, ani: a sa vulaka taŋ buyɓi ngi gwat muvuku vu taŋ wãˀa.

⁵ Da Israyeley ara slikiɗam le na, Aroŋ ati ziri naŋhay a sa soko, a turoko zana minjar ngi tika hiri na kwaɗay, a sirtaka sirit nga hirnga akoti ngi jumoˀaya.

⁶ A sa ciyam garak mupuɗaw cay a hirnga naŋ, zana gagaza miwitwit, sirit a hirnga taŋ ngbulum wãˀ, waɗ ɓeɓelehey kulaˀ kulaˀ ava, ɓa ngi zuɓ naŋ.

⁷ A sa sirtam zana mekelem, migagaza wit wit, sirit ar tabul misi ɗaf muvulikiy di le da ya Buymisemuŋ na, yo taasa mipitikay pitikaya, ziri sikiɗey, kopoy, sikiɗ ngi pusla mbaazlahaya, a sa paka taŋ ara, waɗ ɗaf mindrehhe tuwa sek ar tabul nah vuna ma.

⁸ A sirtam gabaga mindezze ngi ngwic ngi tumuŋ a hirnga nah, waɗ garak mupuɗaw mislirkeɗ cay a hirnga taŋ gar, a caka ɓeɓele ngi zuɓ naŋ kulaˀ kulaˀ ava.

⁹ A wuɗam gabaga gagaza wit wit ngi sirta gwat ngi ɗuva lampe ngi ciɗika li waɗ lampe naŋhaya, gwat ngi slrahay gar, megecey, macamayay, gungwa ngi hila fucuhoy waɗ gojogoɗ ngi mal ngi lampehey vuna.

¹⁰ A sa sirtaka gwat tayna gar ti garak mupuɗaw, a kaka ɓaˀ ar ɓeɓelehey.

¹¹ A sa sirtam gabaga gagaza miwitwit, sirit a hirnga li gi mikuli miɗiya ti ɓiri tapasl tapasl, garak mupuɗaw sirit a hirnga nah, waɗ ɓeɓele ngi zuɓ naŋ kulaˀ kulaˀ ava.

¹² A dirba nah, a sa hilaka gwat ngi gi mezegweleye gar, magam taŋ slra ar hay ngi Buymisemuŋ. A sa mbizaka taŋ ti gabaga migagaza wit wit, garak mupuɗaw sirit a hirnga nah, waɗ a sa kaka ɓaˀ ar ɓeɓeleheye.

¹³ A sa hilaka fucu ngir li gi mikuli numuŋ, a sa sirtam gabaga migaga sirit a hirnga naŋ,

¹⁴ a sa paka gwatay magam taŋ slra ngi mikuli cek nga hirnga naŋ: gwat mazlumam di urdi, kuyer ngi zliga useˀ, peley, ziri sikiɗ ngi kuca lihey. Dar a sitaka taŋ gar ti garak mupuɗaw, waɗ ɓeɓele kulaˀ kulaˀ ava, ɓa ngi zuɓ naŋ.

¹⁵ Da a wuɗam a slikiɗam le na, Aroŋ ati ziri mizile naŋhay, a sa mbizaka gwat ngir guɗuko gar kwaɗay, a dirba nah, ziri mizile ngi Kehatay, a sa hilaka taŋ. Naŋ kine, ziri ngi Kehatay, a jaka haŋ avu gwat muvuku vu taŋ tayna ta, vur taŋ mamicam. Slra ngi ziri ngi Kehatay ngi gi ar guɗuko i nah.

¹⁶ Elazar, mangal ngi masay Aroŋ, i buyɓi ngi mal ngi lampehey, urdi ngi zlum, gwat ngi migam ngi vul vur hin gar waɗ mal ngi vula slra. I buyɓi ngi guɗuk ngi Buymisemuŋ ati gwat ngi raˀahay gar, waɗ gwat ngir hay ngi Buymisemuŋ ati gwat ngi slra naŋhay gar.»

¹⁷ Bumbulvuŋ a ɓa Moyis ati Aroŋ ma na:

¹⁸ «Kam slimiɗ anja ɓa muy ngi Kehatay a ndiram ti siifa a wuzla levi mekelemeye.

¹⁹ Da a kiraham le ng'avi li mipala, ɓa a ndiram ti siifa, a micam ta na, gam vur t'ani: ka Aroŋ ati ziri ɗik mizileheye, a ram ti mburo sesẽŋ kasl avu slra naŋ, yo avu gwat naŋ masa ga.

²⁰ Kanah na, naɓa t'anta sa sliɗaka hiri ngi pura gwat muvuku vu taŋ ko neˀ le ta, vur taŋ masa micam.»

b. Slra ngi dideˀ ngi Gersoŋhoy

²¹ Bumbulvuŋ a ɓa Moyise na:

²² «Toho slimiɗ ngi ziri mizile ngi Gersoŋhoy aya, vur wazlaray vur wazlaraya, vur muy vur muyo.

²³ Mizli mizilehey gar, mindilaka le vi kukur makir hã kukur zlum na, a sa vulaka taŋ slra mekelemey ada, ngi gi ar guɗuk ngi zlir ti ya.

²⁴ Slra ngi muy ngi Gersoŋhoy masa gaka ati gwat taŋ masa jijiraka, ani:

²⁵ A sa jijiraka zana ngi sirta guɗuk ɗu ngi zlir ti ya ati guɗuk ɗu ngi huroˀo, waɗ borgo ngi garak mupuɗaw misirit anga waɗ zana minjar avu miviŋ ngi guɗuko,

²⁶ zana ngi zlavaɗ ati zana ngi mizlingre ngi wazlaray muguno guɗuk ngi huroˀo ati li gi mikuli, zeweɗ naŋhay ati gwat ngi slrahay waɗ gwatay muvulaka taŋ da Gersoŋhoy cek ngi gi slra ti naŋ.

²⁷ I Aroŋ ati ziri naŋ mizilehey masa pulaka jiviɗ da Gersoŋhoy ɓa a gaka slra taŋ. Slra ngi jijir waɗ ngi gi ti gi. I taŋ masa ɓaka taŋ ɓi ngi gwat ngi gi ati ngi jijire.

²⁸ Slra ngi sukwi ngi Gersoŋ ngi gi ar guɗuk ngi zlir ti Buymisemuŋ i nah. Masa pura taŋ ar slra taŋ i Itamar mangal ngi Aroŋ.»

c. Slra ngi dideˀ ngi Merarihey

²⁹ Bumbulvuŋ a ɓa Moyise na: «Ki sa slufa ziri mizile ngi Merariheye vur muyo vur muyo, vur wazlaraya vur wazlahaya.

³⁰ Ki sa slufa mizli mindilaka le vi kukur makir hã kukur zlumo cek, a sa vulaka taŋ slra ngi gi ar guɗuk ngi zlir ti ya Buymisemuŋ.

³¹ Slra taŋ masa gaka ani: A sa jijiraka mbal ngi guɗukoyo, ɓeɓelehey, ɓamtalay, sar ngi ɓamtalaya.

³² Ɓamtal ngi sar zlavaɗay waɗ sar naŋhay, dum mikaˀ kaˀhay waɗ zeweɗey ati gwat taŋ magam taŋ slrahay gar. Masayay a sa bigaka gwat ngi jijir ngi mburo ngi mburo.

³³ Slra ngi dideˀ ngi Merarihey i hana, i slra ngi gi ar guɗuko. Masa pura taŋ ar slra, i Itamar, mangal ngi Aroŋ.»

Slufa mizli levihey magam slra

³⁴ Moyis ati Aroŋ waɗ mizli micawwa ngi Israyeley a tohoko slimiɗ ngi Kehataya, vur muyo vur muyo, yo vur wazlaraya vur wazlaraya.

³⁵ I mizli levihey mindilaka le vi kukur makir hã kukur zlum, mindilaka le ngi gi slra ar guɗuk ngi zlir ti Buymisemuŋ.

³⁶ Mizli leviheye, taŋ jom gar na: durmuk cuw ti skat skat tarnaˀ ti kukur zlum.

³⁷ Muy ngi Kehetay, mindilaka le ngi gi slra ar guɗuko, mizli Moyis ati Aroŋ muslufaka taŋ, kaɓa Bumbulvuŋ muɗuva da Moyise.

³⁸ Mizli ngi Gersoŋhoy, vur muyo vur muyo, yo vur wazlaray vur wazlaraya,

³⁹ mizli mindilaka le vi kukur makir hã kukur zlum, yo mindilaka le ngi gi slra ar guɗuk gar na,

⁴⁰ muy taŋhay ati wazlaray taŋhaya, taŋ jom gar na, durmuk cuw ti skat skat merkeɗ ti kukur makir.

⁴¹ Hana i taˀ ngi muy ngi ziri ngi Gersoŋhoy, mizli mindilaka le ngi slra ar guɗuk gar, Moyis ati Aroŋ muslufa taŋ kaɓa Bumbulvuŋ miɓa ɗaˀ le.

⁴² Muy ngi Merarihey ani: slaf slaf vur muyo vur muyo, yo vur wazlaray vur wazlaraya,

⁴³ mizli mindilaka le vi kukur makir hã kukur zlum, yo mindilaka le ngi gi slra ar guɗuko,

⁴⁴ muy taŋhay a jom gar na, durmuk makir ti skat skat cuw.

⁴⁵ Hana i taˀ ngi muy ngi ziri ngi Merarihey, i mizli gar mindilaka le ngi slra ar guɗuk, Aroŋ ati Moyis mutohoko slimiɗ taŋ kaɓa Bumbulvuŋ muɗuva da Moyise.

⁴⁶ Hana i taˀ ngi levihey Moyis ati Aroŋ waɗ mizli micawwa ngi Israyeley mutohoko slimiɗ taŋ vur muy vur muyo, yo vur wazlaray vur wazlaraya.

⁴⁷ I mizli mindilaka le vi kukur makir, hã vi kukur zlum, yo mindilaka le ngi gi sla ati ngi jijira gwat ar guɗuko gar.

⁴⁸ Taŋ jom gar na: mizli durmuk dangafaɗ ti skat skat zlum ti kukur dangafaɗ.

⁴⁹ Mburo gar na, a ɓakaŋ ɓi ngi gwat naŋ masa ga ati ngi gwat naŋ masa jijira, kaɓa Bumbulvuŋ muɗuva da Moyise.