SLUFA VU 36 - Bible en langue guiziga

Jiviɗ ngi zuɓa ngwas muzuma hay ngi cine

¹ Akẽh na, dideˀ ngi Zozefey, buy ngi hayay, muy ngi Galaˀat, mangal ngi Makir, yo dideˀ meciɗek ngi Manasehey, a soko lumaka Moyis ati buyɓi ngir sukwi Israyeleye.

² A ɓaka Moyise: «Moyis, Bumbulvuŋ a puluw jiviɗ le, ɓa ki wunka li da Israyeleye ti ceregezleŋ. Yo a puluw jiviɗ le ma, ɓa ki vula li ngi sukum ndra Selofata da ziri naŋ mongosohoyo ma.

³ Amma da zuŋ vuna, a sliˀi sukwi mekelem le mbak mbur Israyele na, kite a sla li ngi sukwi ndra le, a buca le ng'avi li ngi sukwi naŋ misliˀi ng'ara na. Naɓa li ndra mulumaka ti ceregezleŋ tuwa, a sli le avra takwa?

⁴ Yo ma na, ar vi ngi mumulo, mi nga taŋ, a sa slaka ngi wãˀ, baɗ avu ngi ndra da sukwi taŋ nawaya na takwa?»

⁵ Bumbulvuŋ a pula jiviɗ da moyise, ɓa a ɓa ɓi micica hana da Israyeleye: «Mingiɓi ngi dideˀ ngi Zozefeye, naŋ kaslsla.

⁶ Bumbulvuŋ a pula jiviɗ vur ɓi ngi ziri mongoso ngi Selofatay ani: A zuɓam zile, mbur taŋ hĩhĩyaka le gar, amma sey muy ngi cine taŋ ɓula.

⁷ Avi Israyeleye, anta slaka li taŋ da sukwi mekeleme ta. Mbur Israyel gar, sey a cici zlak vur li ngi sukwi naŋ.

⁸ Da zuŋ mongoso, angi zumahaya, a vulakaŋ li le na, sey a zuɓ ngi zile i muy ngi cine naŋ, ɓa li, dideˀ taŋhay mupulaka taŋ di na, sukwi Israyel gar, a sa ndir ti nga naŋ ti nga naŋ.

⁹ Kanah na, anta sa slaka li da sukwi mekelem ta, sukwi Israyel gar, a sa ndir ti li nga naŋ nga naŋ.»

¹⁰ Dar ziri mongoso ngi Selofatay, a gaka kaɓa Bumbulvuŋ muɗuva ɓi nah da Moyis tuwa.

¹¹ Mala, Tirsa, Hogla, Milka ati Noˀa, a zuɓam zile i ziri ngi jamba tanhay.

¹² A zuɓam mizli muboko tivi Manase mangal ngi Zozef. Naŋ kine, angi zuma haya, hirwuy muvulaka taŋ di na, a ndir da sukwi ngi cine taŋ a muŋ.

¹³ Ɓi Bumbulvuŋ muɗuva, jiviɗ naŋ ɓi micica ɓi nah da Israyeley tisi Moyis na, i hana so. A ɓaŋ di ar li micay ngi Moˀap, a mi mizaw Zurdeŋ, mupuɗak ar walahay Zeriko.