SLUFA VU 35 - Bible en langue guiziga

Walahay levihey

¹ Bumbulvuŋ a ɓa ɓi da Moyis ar li micay ngi Moˀap, migweˀ avu mizaw Zurdeŋ, puɗak ar Zeriko, a ɓaŋ na:

² «Ɓa Israyeleye, a wunam a wuzla walahay taŋhaya, a vulaka taŋ da sukwi ngi levihey, a pam ar taŋ, yo ɓa a vulaka taŋ li jigina ginewey migweˀ gweˀ avu walahay vuna ma.

³ Dideˀ ngi levihey a sa pam ar walahay tayna, yo a sa lumam pala gun a ciki taŋ ngi jigina ginew taŋhay ati gwat misãmi mekelemey taŋ misi ti taŋ.

⁴ Pala kum masa vulaka da levihey na, zle avu mohol ngi walahaya, sliprik naŋ metir skat skat zlum gun gar.

⁵ Tisi pas ngi miprik, tir vay ruwuy, tisi pas ngi pastaˀ, waɗ tir vay muŋ, kisa waka sliprik naŋ zle a dubuyo, metir durmuk makir, walahay a ndir guzluv a wuzla. Pala taŋ masa lumam gun gun walahay taŋhaya, naŋ kahana.

⁶ Ki sa vulam da leviheye, i walahay mimerkeɗ ngi ɗum ar taŋ. Mbur mikiɗ hirnga le, i waˀ waˀ ta na, ara ɗum a diga, kisa vulaka taŋ walahay mekelemey kukur mufaɗ ti cuw nga meˀe ma.

⁷ Walahay kum masa vulaka da leviheye, a sa gi jom gar na, walahay kukur mufaɗ nga dangafaɗ, waɗ pala gun gun ar taŋ.

⁸ Sukwi gar na, a sa vulaŋ walahaya weˀe avu naŋ misi ti naŋ. Sukwi misi ti walahayay haɗa, a sa vul haɗa ya, sukwi misi ti walahayay neˀkini, a sa vul neˀkine ya.»

Walahay ngi ɗum ar taŋ

⁹ Bumbulvuŋ a ɓa Moyise:

¹⁰ «Mingiɓi ani, ɓa ki ɓa da Israyeley: Ti kum misa tuwuɗaka mizaw Zurdeŋ le, yo kum misa cam le nga hirwuy Kanaˀan na,

¹¹ kisa wunam walahay madiɗahay ngi ɗum ar taŋ. Da mbur a kiɗ hirnga le, i waˀwaˀ ta na, ara ɗum a diga.

¹² Naɓa a laha hutuŋ naŋ le avu mupula cuwala. Mbur mikiɗ hirnga le, da jum ngi mizli a gaŋ kiita ta na, anta kiɗaka vagaya t'aruŋ.

¹³ Ki wunam walahay madiɗa madiɗa merkeɗ ngi ɗum ar taŋ.

¹⁴ Makir tisi pas ngi miprik ngi mizaw Zurdeŋ waɗ makir ar hirwuy Kanaˀan.

¹⁵ Ko wa gar mikiɗ hirnga le, da ko i mbur Israyel, ko mbur mislikiɗo ti slikiɗ malla mulak ngir sar kwana, da a kiɗ hirnga le, i waˀwaˀ ta na, ara ɗum ar walahay pal a wuzla mimerkeɗ tayna.

¹⁶ Da mbur a kiɗ mbur le vagay ti ɓiri na, naɓa i mikiɗa hirnga, sey a kiɗaka mbur nah vagay.

¹⁷ Da a hiziga ti ɗugur misi zliv a kiɗa mburo vagay gu na, naɓa i mikiɗa hirnga, sey a kiɗaka mbur nah vagay.

¹⁸ Da a kiɗa ti dum zliv a kiɗa mburo vagay na, naɓa i mikiɗa hirnga, sey a kiɗaka mbur nah vagay.

¹⁹ Mbur mikiɗ hirnga le na, i mbur mupula cuwal masa kiɗaŋ. Da taŋ mizliram le si na, a kiɗa si.

²⁰ Da kaɓa: mburo, a dumbusla mburo ar ɓi ngi kwacay, malla a hizigaŋ ti hizig ngi moˀore, hã mbur a mucu,

²¹ malla ta ma na, a kiɗa kiɗ miji miji, ti haŋ turɓus, hã mbur a muc na, naɓa i mikiɗa hirnga, sey a kiɗaka mbur nah vagay. Mbur mupula cuwal miji di hirnga le sina, a kiɗa si.

²² Amma da kaɓa: mburo, a dumbusla mburo, a diɗ, a muc, a ga waˀwaˀ ta, yo i ɓi ngi kwacay ta, malla a hiziga ti hizig ngi moˀore ta,

²³ malla ta ma na, a pulo ɗugur madiɗa nga hirnga mburo, a puraŋ ta, i mesene naŋ ta, yo i ɓi ngi kwacay ta na,

²⁴ jum ngi mizli, a sa gaka kiita naŋ ar wala ngi mbur mikiɗa hirnga ati mupula cuwala, kaɓa ɓi micicaka ɓi nah.

²⁵ Jum ngi mizli a sa tiɓa mbur mikiɗa hirnga avu mupula cuwala, a mi di ng'ar walahay naŋ muɗum zleˀe ara. Mbur mikiɗa hirnga, a sa ndir a diga, hã masay madiɗa, mipakaŋ mal ngi vula slra na, a mumuc le kwaɗay.

²⁶ Amma da mbur mikiɗa hirnga, a zli ɓi le ngi tuwuɗa maakway ngi walahay naŋ muɗum ara na,

²⁷ yo mupula cuwal a ji di hirnga le, a kiɗa le vagay na, anta a slufaka kaɓa a kiɗ hirnga le ta.

²⁸ Naŋ kine, mbur mikiɗ hirnga le gar na, sey a ndir ar walahay madiɗa naŋ muɗum ara na, hã masay madiɗa mumuc le kwaɗay. Da a muc le so na, mikiɗa hirnga a mi nga hirwuy naŋ zuy.

²⁹ Ko da kum amaka gar na, hana i ɓi micica vur kum ati ziri kum masa ya ka taŋ nga mbuŋ nga mbuŋ gar.

³⁰ Ɓi ngi kiɗa hirnga gar, a sa pulaka cuwal naŋ na, sey da mizli haɗi a gaka sedewo naŋ le. Sedewo purla na, muk ta.

³¹ Da mbur mikiɗa hirnga a ndila le ngi kiɗ vagay na, ki tiɓam dala ngi mbiɗa hirnga naŋ ta. Amma zizaka gbaˀa.

³² Yo ki tiɓam dala avu mburo, ɓa ki pulakaŋ a kil ng'ar walahay maɗumom ara na ta, malla ɓa a mi nga hirwuy naŋ a muŋ ta, sey da masay madiɗa a muc le kwaɗay.

³³ «Hirwuy kum misi anga hana, ki gam di lambaˀ ta, a pam pumbus ngi mbur le na, a hirya hirwuyo, amma ɓa ngi zuɓa hiryi nah na, sey a kiɗaka mbur mipa pumbus nah cummo.

³⁴ Hirwuy kum misi anga hana, yo ya vuna misi ada anga ti hirnga ɗu na, ki gam di lambaˀ lambaˀ ta so. Asi, ya Bumbulvuŋ, y'ada a wuzla Israyeleye.»