SLUFA VU 34 - Bible en langue guiziga

Maakway ngi Kanaˀan

¹ Bumbulvuŋ a ɓa Moyise na:

² «Mingiɓi ani, ɓa da Israyeley ɗaˀ ɗaˀa: kisa cam nga Kanaˀana, hirwuy ya muvulukum di ɓa ki wunkaka na, maakway naŋhay anihĩ:

³ Tir vay ruwuyo, maakway a zlo a wuzlaɓuh mikirɗak kirɗak ngi Sin, hã a sipa Edomo silaɓɓa. Tisi pas ngi miprike, maakway a zlo zle tir vay hirwuy ngi mubuliy mumuca.

⁴ A sa guno tir vay ruwuy ngir li jiɗ ngi urucoy, a sa bi baɗ a Sin, hã sesẽŋ ar vay ruwuy ngi Kades-Barneya, a sa bi baɗ akẽh nga Hasar-Adar ati Asmoŋ.

⁵ A bi baɗ akẽh ma na, hã ara zliram ati mizaw Ezipte, ara kiɗo mi a mi mubuliy.

⁶ Tisi pas ngi pastaˀa, maakwaya ti mbubuliy Mediterane.

⁷ Tir vay muŋ, kisa ciraka maakwaya ar wala ngi mubuliy ati muwã Hor.

⁸ Ki sa ciraka zle a muwã Horo, hã sesẽŋ a Lebo-Hamat ati Sedat.

⁹ Yo a sa ra bi a Sifroŋ, ɓa ara kiɗo mi a Hasar-Enaŋ. Maakway kum misi tir vay muŋ, i hana so.

¹⁰ Tisi pas ngi miprike, kisa ciraka maakwaya zle a Hasar-Enaŋ, kini ngir ti Sefam.

¹¹ A sa bi baɗ a Sefama nga Ribla, tisi pas ngi miprik ngi Ayin. A dirba nah, a sa pi sar sesẽŋ, ara duko li musunok ngi mi yam Zenezaret.

¹² A sa ra zliram ati mizaw Zurdeŋ, ara kiɗo mi a mi mubuliy mumuca. Maakway ngi hirwuy kum i hana so.»

¹³ Moyis a slufa ɓi hana da Israyeleye. A dirba nah, a ɓa taŋ: «Hirwuy Bumbulvuŋ muvulukum di ɓa ki wunkaka ti ceregezleŋ tuwa i hana. Ki sa wunkaka da sukwi mungoltir ti reta na.

¹⁴ Naŋ kine, sukwi ngi Ruben ati hay taŋhay, sukwi ngi Gat ati hay taŋhay waɗ sukwi ngi Manase cah, a lumam hirwuy nga taŋ le si.

¹⁵ Sukwi mucuw ti reta tayna, a lumam hirwuy mi nga taŋ le si, naŋ tir vay ruwuy ngi dubazaw Zurdeŋ, puɗak angi Zeriko.»

Slimiɗ ngi mizli madiɗahay masa wunkaka hirwuy Kanaˀan

¹⁶ Bumbulvuŋ a ɓa Moyise:

¹⁷ «Masay Elazar waɗ Zozuwe mangal ngi Nuno, a sa wunkaka hirwuyo da mizli.»

¹⁸ Ki sa zuɓam buyɓihey pal pal ar sukwi gar, ɓa ngi jini taŋ.

¹⁹ Slimiɗ taŋhay ani: Sukwi ngi Zuda: Kalep mangal ngi Yefune.

²⁰ Ar sukwi ngi Simeyoŋ: i Semuyel, mangal ngi Amihuɗ.

²¹ Ar sukwi ngi Benjameŋ: i Elidat, mangal ngi Kisiloŋ.

²² Ar sukwi ngi Daŋ: i Buki, mangal ngi Yogli.

²³ Ar suwki ngi Manase, mangal ngi Zozef: i Haniyel mangal ngi Efot.

²⁴ Ar sukwi ngi Efrayim, mangal ngi Zozef: i Kenuwel manhal ngi Siltaŋ.

²⁵ Ar sukwi ngi Zabuloŋ: i Elisafaŋ, mangal ngi Parnak.

²⁶ Ar sukwi ngi Isakar: i Paltiyel, mangal ngi Azaŋ.

²⁷ Ar sukwi ngi Aser: i Ahihut, mangal ngi Selomi.

²⁸ Ar sukwi ngi Neftali: i Pedahel, mangal ngi Amihuɗ.

²⁹ Mizli, Bumbulvuŋ muwuna taŋ ngi wunka hirwuy Kanaˀan da sukwi Israyele, i taŋ.