SLUFA VU 3 - Bible en langue guiziga

Slra ngi sukwi ngi Levi

¹ Tapas Bumbulvuŋ miɓa ɓi da Moyis a hirnga muwã Sinay na, dideˀ ngi Aroŋ ati Moyise, t'ani:

² Aroŋ naŋ ti ziri mizilehey mufaɗa. Modogomo, a zilaka Nadaɓ, numuŋhoy i ti Abihu, Elazar waɗ Itamar.

³ Ziri ngi Aroŋhoy i taŋ, a cam taŋ masayay le, yo a zlaka slra taŋ le.

⁴ Amma Nadaɓ ati Abihu a micam a mbuŋ Bumbulvuŋ, a wuzlaɓuh mikirɗak kirɗak ngi Sinay, asi a gam mikuli ti urdi ar vu muho gar. Ziri mizile taŋhay anta. Magaka slra ngi mikuli a ciki cine taŋ Aroŋ i Elazar ati Itamar.

⁵ Bumbulvuŋ a ɓa Moyise na:

⁶ «Ɓa sukwi ngi Levi ɓa a girjohoko. Pula taŋ asi haŋ ngi masay Aroŋ, ɓa a jinakaŋ.

⁷ A sa gam gawla ngi Aroŋ waɗ ngi Israyeley gar a mbuŋ guɗuk ngi zlir ti ya, a sa gaka slra ngi hur guɗuko gar.

⁸ Sey a kam slimiɗ kuy kuy ar gwat ngi slrahay misi ar guɗuk ngi zlir ti ya, yo sey a gam gawla ngi Israyeley a hur guɗuk ɗu ngi huroˀo.

⁹ Naŋ kine, kisa vula mizli leviheye da Aroŋ ati ziri naŋ mizilehey. I Israyeley muvulaka taŋ di ti vul gisiŋ gisiŋ.

¹⁰ Sey ki cifi ngi gi mikuli i Aroŋ ati ziri naŋ mizilehey tewle. Da mbur i masay ta, a girjih le nga gi slra taŋ na, kiɗaka vagay.»

¹¹ Bumbulvuŋ a ɓa Moyise ma:

¹² «Y'ani i wini levihey a wuzla Israyeley ti haŋ ɗu. A sa gam gawla ɗu ar deɗe ngi ziri mizile, modogom ngi Israyeley gar. Mizli levihey inga yahay.

¹³ Naŋ kine, tapas ya mikiɗa modogom ngi Eziptehey gar na, modogom ngi mizli Israyeley ati ngi ginew taŋhaya, yi wi taŋ vu le weˀ da ya. I nga yahay. I ya Bumbulvuŋ!»

Slufa sukwi ngi Levi sar mudumbuŋ

¹⁴ A wuzlaɓuh mikirɗa kirɗak ngi Sinaya, Bumbulvuŋ a ɓa Moyise na:

¹⁵ «Slufa sukwi ngi Levi vur wazlaray vur wazlaraya, vur muy vur muyo: kisa slufa mizli mizile ngi leviheye gar, zle avu zuŋ ngi kiya pal.»

¹⁶ Dar Moyis a slufa taŋ kaɓa Bumbulvuŋ miɓaŋ di ɗaˀ le tuwa.

¹⁷ Ziri mizile ngi levihey i ti: Gersoŋ, Kehat ati Merari.

¹⁸ Ziri mizile ngi Gersoŋhoyo cuw, i ti: Libini ati Simey, a zilaka sukwi ngi dideˀ taŋhaya ti slimiɗ taŋhay vuna tehhe.

¹⁹ Kehata, naŋ ti ziri mizilehey mufaɗa, i ti: Amram, Isar, Hebroŋ waɗ Uziyel. A zilaka sukwi taŋhaya ti slimiɗ taŋhay tehhe.

²⁰ Ziri mizile ngi Merariheye, taŋ cuw, i ti: Mali ati Musi. A zilaka muy taŋhaya ti slimiɗ taŋhay tehhe a muŋ. Mizli tayna gar na, a tohoko slimiɗe vur wazlaray vur wazlaray ar sukwi ngi Levi.

²¹ Gersoŋ i dideˀ ngi Gersoŋhoy. A wuɗukam sukwi taˀ taˀ cuw, sukwi ngi Libini ati ngi Simey.

²² Tapas hin ngi slufa vu na, mizli mizilehey, mazli zle avu ziri mizile ngi kiya pal palaya, a gam jom gar na, mizli durmuk tarnaˀ ti skat skat zlum.

²³ Sukwi ngi Gersoŋhoy a pam ti duba guɗuk ngi zlir ti Buymisemuŋ, tisi pas ngi pastaˀ naŋ.

²⁴ Buy taŋ i Eliyasaf, mangal ngi Layel.

²⁵ Sukwi ngi Gersoŋ, slra t'ada cah ar guɗuk ngi zlir ti Buymisemuŋ: i slra ngi hur guɗuk ati ngi vra naŋ, godo ngi sirit naŋ, zana minjar a mizlingre ngi guɗuko.

²⁶ Zana ngi zlavaɗay mugun gun wazlaray ngi hirnga guɗuk ati li gi mikuli, zana minjar a mizlingre waɗ zeweɗ mujuwam taŋ gwatay gar na, buyɓi naŋ i taŋ.

²⁷ Kehat i dideˀ ngi Kehatay. A wuɗukam sukwi taˀ taˀ mufaɗ: sukwi ngi Amram, ngi Isari, ngi Hebroŋ waɗ ngi Uziyel.

²⁸ Mizli mizilehey mizli avu ziri ngi kiya pal palay, hã nga mbuŋ, a gam jom gar na, mizli durmuk dangafaɗ ti skat skat merkeɗ, a gam slra ar li mipal.

²⁹ Muy ngi ziri ngi Kehataya, a pam ti ciki guɗuko, tir vay ruwuy naŋ.

³⁰ Buy ngi wazlaray taŋ i Elisafaŋ, mangal ngi Uziyel.

³¹ Mizli Kehataya, ɓi ngi akoti ngi jumoˀay, tabul, gwat ngi ɗuva lampehey, li gi mikulihey, gazlanga ngir guɗukoy magam taŋ slra ar li mipal, waɗ zana minjar njaray ati slra ngir guɗukoy gar na, majiginaka taŋ i taŋ.

³² Buy madiɗa ngi levihey i Elazar, mangal ngi masay Aroŋ. Mizli magam slra ar hay ngi Buymisemuŋ gar na, buy taŋ i naŋ.

³³ Merari i dideˀ ngi Merarihey. A wuɗukam sukwi taˀ taˀ cuw: Muy ngi Malihey ati ngi Musihey.

³⁴ Ar hin ngi slufa vu na, mizli mizilehey, zle avu ziri ngi kiya pal palaya, a gam jom gar na, mizli durmuk merkeɗ ti skat skat cuw.

³⁵ Buy taŋ i Suriyel, mangal ngi Abihayil. A pam ti ciki guɗuk ngi zlir ti Buymisemuŋ, tir vay muŋ naŋ.

³⁶ Mizli Merariheye, ɓi ngi mbalay misi ar guɗuk ngi huroˀo, ɓeɓelehey, ɓamtalay ati sar naŋhay waɗ gwat ngi slrahay ati slra ngi taŋ gar na, majiginaka taŋ i taŋ.

³⁷ Waɗ ma na, ɓi ngi ɓamtalay misi a wazlaray jom ti sar taŋhaya, dum mikaˀ kaˀhay, jom ti zeweɗeye gar na, i slra taŋ.

³⁸ Moyis ati Aroŋ waɗ ziri naŋ mizileheye, a pam a mi guɗuk ngi zlir ti Buymisemuŋ, tisi pas ngi miprik naŋ, mbiɗeˀvra, tivi mizlingre ngi guɗuko, tisi pas mabawa. Buyɓi ngi slra ngir hay ɗu i taŋ, a gaka ti slimiɗ ngi Israyeley gar. Da mbur i masay ta, a wuɗ le zleˀe ɓa a ga na, anja ani a kiɗaka le vagay.

³⁹ Mizli levihey, zileye, zle avu ziri ngi kiya pal palay, a gam jom gar na, mizli mizilehey durmuk kukur cuw nga cuw. Moyis ati Aroŋ a slufaka taŋ vur muy vur muy, kaɓa Bumbulvuŋ miɓa taŋ ɗaˀ le tuwa.

Mbiɗi hirnga ngi modogomoy

⁴⁰ Bumbulvuŋ a ɓa Moyise na: «Slufa ziri mizile, modogom ngi Israyeleye gar, zle avu ziri ngi kiya pal palay, hã nga mbuŋ, yo toho slimiɗ taŋhaya.

⁴¹ A dirba nah, piy leviheye sek pal da ya Bumbulvuŋ, ar deɗe ngi ziri mizile modogom ngi Israyeley. Naŋ kanah ma, ginew ngi leviheye, piy taŋ sek pal da ya, ar deɗe ngi modogom ngi ginew ngi Israyeley gar.»

⁴² Dar Moyis a slufa ziri mizile modogom ngi Israyeleye gar, kaɓa Bumbulvuŋ miɓaŋ ɓi nah ɗaˀ le tuwa.

⁴³ Mizli mizile modogomoy, zle avu ziri ngi kiya pal palay, hã nga mbuŋ, misi slimiɗ mutohohoy na, a gam jom gar na, mizli mizilehey, durmuk kukur cuw nga cuw ti skat skat cuw ti kukur tarnaˀ nga makir.

⁴⁴ Bumbulvuŋ a ɓa Moyise na:

⁴⁵ «Piy leviheye sek pal da ya Bumbulvuŋ, ar deɗe ngi ziri mizile modogom ngi Israyeley. Naŋ kanah ma, ginew ngi levihey, piy taŋ sek da ya, ngi mbiɗa hirnga ngi ginew modogom ngi Israyeley.

⁴⁶ Amma ziri mizile modogom ngi Israyeleye, a funaka ngi leviheye le ti mizli skat cuw ti kukur tarnaˀ nga makir, sey ngi mbiɗa hirnga taŋ.

⁴⁷ Vur hirnga ngi mbur gar na, ki ca cikili nah suloy zlum, suloy purla gar na, gram kuruˀ, i suloy magam di slra ar hay nga ya Buymisemuŋ.

⁴⁸ Ki vula dala naŋ da Aroŋ ati ziri naŋhay. Ziri mizile modogom ngi Israyeley mufunaka ngi leviheye le na, a sa mbiɗaka hirnga taŋ kahana so.»

⁴⁹ Akẽh na, modogomoy mimbiɗaka taŋ ti modogom ngi levihey ta tuwa, Moyis a tiɓa dala ngi mbiɗa hirnga taŋhaya.

⁵⁰ A tiɓi avu ziri mizile modogom ngi Israyeleye, suloy gabal ti skat makir ti suloy kukur merkeɗ nga zlum, i dala magam di slra ar hay ngy Buymisemuŋ.

⁵¹ Dar a vula dala nah da Aroŋ ati ziri naŋhay, kaɓa Bumbulvuŋ miɓaŋ ɓi nah ɗaˀ le zleˀe.