SLUFA VU 29 - Bible en langue guiziga

f. Vur hin ngi salalay

¹ «Hin mudumbuŋ ngi kiya mitarnaˀ naŋ na, kisa kusom ngi huruk huruk a mbuŋ ɗu. Ki sa gaka slra kum magaka hõyyõ na mata, asi i hin ngi ji salalay.

² Ki sa gam mikuli mizlam zlam da ya Bumbulvuŋ: ti gusoŋ pal, zlengerek pal waɗ ziri tumuŋ ngi vi pal palay tarnaˀ, ginew manja hereweɗey gar. Ziˀĩ taŋ mundum na, a sa tisliy mevel da ya Bumbulvuŋ.

³ Ginew gar na, zlaɓ ti hapa mufukuɗa ti mal: ngi gusoŋ, hapa mufukuɗa kilo ngoltir, ngi zlengereke, kilo merkeɗe,

⁴ ngi zuŋ tumuŋ asi mitarnaˀhay na gar, kilo makir makir.

⁵ Yo ma na, kisa gam mikuli ti bazuway vur mungra, ɓa a gukum mezegwel a hirnga kumo ngi zuɓa mungra.

⁶ Mikuli tayna gar, a sa jumoko taŋ jom ng'avi mikuli mizlam zlam vur hin gar na. A sa jumoko ng'avi mikuli ngi hin mudumbuŋ ngi kiya, jom ti hapa ati mbaazla naŋ ngi puslo. Ziˀĩ taŋ mundum na, a sa tisliy mevel da ya Bumbulvuŋ.»

g. Vur hin madiɗa ngi pula mungra

⁷ «Hin kuruˀ ngi kiya mitarnaˀ naŋ na, kisa kusom ngi huruk huruk a mbuŋ ɗu, ya Bumbulvuŋ, kisa gam dalyam, yo ki gaka slra kum magaka hõyyõ na ma ta.

⁸ Ki sa gam mikuli mizlam zlam da ya Bumbulvuŋ: ti gusoŋ pal, zlengerek pal waɗ ziri tumuŋ ngi vi pal palay tarnaˀ, i ginew manja hereweɗey gar. Ziˀĩ taŋ mundum na, a sa tisliy mevel.

⁹ Ginew gar na, zlaɓ ti hapa mufukuɗa ti mal: ngi gusoŋ, hapa mufukuɗa kilo ngoltir, ngi zlengereke, kilo merkeɗ,

¹⁰ ngi zuŋ tumuŋ gar na, kilo makir.

¹¹ Yo ma na, kisa gam mikuli ti bazuway ngi zuɓa mungra ngi hirnga kumo. Mikuli tayna gar na, a jumoko ati mikuli magaka tapasa ngi puya mungra. I hin madiɗa ngi zuɓa mungra. A sa jumoko ati mikuli mizlam zlam vur hin gar, waɗ hapa ati mbaazla naŋ ngi puslo.»

h. Vur muguzlum ngi guɗuk

¹² «Hin kuruˀ nga zlum ngi kiya mitarnaˀ naŋ na, kisa kusom ngi huruk huruk a mbuŋ ɗu, ya Bumbulvuŋ. Ki sa gaka slra kum magaka hõyyõ na mata. Ki sa gam hin tarnaˀ ar li gi muguzlumo ngi ɗuviy hirnga da ya Bumbulvuŋ.

¹³ Hin mudumbuŋ naŋ na, kisa gam mikuli zlam zlam da ya Bumbulvuŋ ti gusoŋ kuruˀ nga makir, zlengerek cuw, ziri tumuŋ ngi vi pal palay kuruˀ nga mufaɗ, i ginew manja hereweɗey gar. Ziˀĩ taŋ mundum na, a sa tisliy mevel da ya Bumbulvuŋ.

¹⁴ Ginew gar na, zlaɓ ti hapa mufukuɗa ti mal: ngi gusoŋ gar, hapa mufukuɗa kilo ngoltir, ngi zlengerek gar na, kilo merkeɗ,

¹⁵ ngi zuŋ tumuŋ, kilo makir.

¹⁶ Yo ma na, kisa gam mikuli ti bazuway ngi zuɓa mungra ngi hirnga kumo. Mikuli mizlam zlam wãˀ vur hin gar, hapa ati mbaazla ngi puslo, jom ng'ava ma.

¹⁷ Hin mucuw naŋ: gusoŋ kuruˀ nga cuw, zlengerek cuw, ziri tumuŋ ngi vi pal palay kuruˀ nga mufaɗ, taŋ gar manja hereweɗey,

¹⁸ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ gwat ngi gi mikuleheye, kaɓa kum misirkam di.

¹⁹ Yo ma na: kisa gam mikuli ti bazuway ngi zuɓa mungra, mikuli mizlam zlam wãˀ vur hin gara, hapa ati mbaazla naŋ ngi puslo, jom ng'ava ma.

²⁰ Hin mimakar naŋ: gusoŋ kuruˀ ngaŋ kaˀ, zlengerek cuw, ziri tumuŋ ngi vi pal palay kuruˀ nga mufaɗ, taŋ gar manja hereweɗey,

²¹ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ ngi gwat ngi gi mikuliheye, kaɓa kum misirkam di.

²² Yo ma na kisa gam mikuli ti bazuway zlam zlam wãˀ ngi zuɓa mungra ngi hirnga kumo.

²³ Hin mumufaɗ naŋ: gusoŋ kuruˀ, zlengerek cuw, ziri tumuŋ ngi vi pal palay kuruˀ nga mufaɗ, taŋ gar manja hereweɗey,

²⁴ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ gwat ngi gi mikuliheye, kaɓa kum misirkam di.

²⁵ Yo ma na kisa gam mikuli ti bazuway zlam zlam wãˀ ngi zuɓa mungra ngi hirnga kumo.

²⁶ Hin muzlum naŋ: gusoŋ ngoltir, zlengerek cuw, ziri tumuŋ ngi vi pal palay kuruˀ nga mufaɗ, taŋ gar manja hereweɗey,

²⁷ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ ngi gwat ngi gi mikuleheye, kaɓa kum misirkam di.

²⁸ Yo ma na, kisa gam mikuli ti bazuway zlam zlam wãˀ ngi zuɓa mungra ngi hirnga kumo.

²⁹ Hin mimerkeɗ naŋ: gusoŋ dangafaɗ, zlengerek cuw, ziri tumuŋ ngi vi pal palay kuruˀ nga mufaɗ, taŋ gar manja hereweɗey,

³⁰ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ ngi gwat ngi gi mikuleheye, kaɓa kum misirkam di.

³¹ Yo ma na, kisa gam mikuli ti bazuway zlam zlam wãˀ ngi zuɓa mungra ngi hirnga kumo.

³² Hin mitarnaˀ naŋ: gusoŋ dangafaɗ, zlengerek cuw, ziri tumuŋ ngi vi pal palay kuruˀ nga mufaɗ, taŋ gar manja hereweɗey,

³³ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ ngi gwat ngi gi mikuleheye, kaɓa kum misirkam di.

³⁴ Yo ma na, kisa gam mikuli ti bazuway ngi zuɓa mungra ngi hirnga kumo, mikuli mizlam zlam wãˀ vur hin gara, waɗ mbaazla naŋ ngi puslo.

³⁵ Hin midangafaɗ naŋ na, i hin ngi kiɗa mi ngi muguzlum kum, ki gam slra kum magaka hõyyõ na mata.

³⁶ Ki sa gam mikuli mizlam zlam da ya Bumbulvuŋ, ti gusoŋ pal, zlengerek pal waɗ ziri tumuŋ ngi vi pal palay tarnaˀ, i ginew manja hereweɗey gar. Ziˀĩ taŋ mundum na, a sa tisliy mevel.

³⁷ yo hapa ati mbaazla ngi pusl asi gusoŋhoy, asi zlengerekey waɗ asi ziri tumuŋhoyo, weˀe avu taˀ ngi gwat ngi gi mikuliheye, kaɓa kum misirkam di.

³⁸ Yo ma na kisa gam mikuli ti bazuway zlam zlam wãˀ ngi zuɓa mungra ngi hirnga kumo.

³⁹ «Mikuli kum masa gikiy taŋ da ya Bumbulvuŋ ar hin naŋhay kasl kasl na, i taŋ. Ki sa gaka taŋ jom ng'avi mikuli kum ngi jimihey, ngi mongoy kum, ngi zlum ti zlum, ng'avu sedege ti hapa, ti mbaazla ngi pusl, waɗ mikuli ngi luuma zuyo.»