SLUFA VU 28 - Bible en langue guiziga

Jiviɗ ngi gi mikuli a. Mikuli vur hin gar

¹ Bumbulvuŋ a ɓa Moyise:

² «Ɓa mingiɓi ani da Israyeleye: Gwat ngi vul, mi nga ya na, jam lesl ɓa ki vulikiy di ar pas naŋ kaslsla, i gwat ngi zum mizlam zlam misi zĩˀĩ naŋ a tisliy mevel na.

³ Ki sa ɓa taŋ: «vur hin gar na, kisa soko ti ziri tumuŋ ngi vi pal palay cuw da ya Bumbulvuŋ, tumuŋ manja hereweɗ avu taŋ, a sa zlumaka taŋ zlam zlam wãˀ vur hin gar, anta mbak le ta.

⁴ Zuŋ tumuŋ mudumbuŋ a sa gikiy di mikuli ti mipriki, yo mucuw naŋ kwana ti li zuyyo,

⁵ waɗ hapa kilo makir fukaɗ fukaɗ ti mal mezle, ngi tutumbur litir pal ti reta.

⁶ I mikuli ngi zlum ti zlum vur hin gar, kaɓa magikiy di zleˀe a muwã Sinay. I mikuli misi zĩˀĩ naŋ a tisliy mevel da ya Bumbulvuŋ.

⁷ Zuŋ tumuŋ ngi vul ti miprike, ti mbaazla ngi pusl aseˀe, litir pal ti reta. A sa vulikiy da ya Bumbulvuŋ ar hay nga ya.

⁸ Zuŋ tumuŋ mucuw naŋ a sa vulikiy ti li zuyyo, ti gwat ngi gi sedege waɗ ti mbaazla aseˀe, misipurla kaɓa misi ngi mipriki tuwa ma. I mikuli mizlam zlam misi zĩˀĩ naŋ a tisliy mevel da ya Bumbulvuŋ»

b. Vur hin ngi Sabat

⁹ «Tapas Sabata, a sa vulikiy ziri tumuŋ ngi vi pal palay cuw, tumuŋ manja hereweɗ avu taŋ, hapa kilo merkeɗ, fukaɗ fukaɗ ti mal waɗ mbaazla ngi puslu.

¹⁰ Vur pas Sabat gar na, a sa jumoko mikuli mizlam zlam wãˀ hana, ng'avi mikuli kum magaka ti hin gar, waɗ mbaazla naŋ ngi puslo.»

c. Vur hin mudumbuŋ ngi kiya

¹¹ Ar hin mudumbuŋ ngi kiya gar na, kisa gam mikuli mizlam zlam wãˀ da ya Bumbulvuŋ. Ki sa gaka ti gusoŋhoy cuw, zlengerek pal, waɗ ziri tumuŋ ngi vi pal palay tarnaˀ, ginew manja hereweɗey gar taŋ.

¹² Vur ginew gar na, kisa vulam aseˀe hapa mufukuɗa ti mal: gusoŋ gar na, hapa mufukuɗa kilo ngoltir, zlengereke, hapa kilo merkeɗe.

¹³ Zuŋ tumuŋ gar na, hapa kilo makir. I mikuli mizlam zlam, misi zĩˀĩ naŋ a tisliy mevel da ya Bumbulvuŋ.

¹⁴ Mbaazla ngi puslo kwana: vur gusoŋ gar na, mbaazla litir makir ngi puslo, zlengereke, litir cuw, zuŋ tumuŋ, litir pal ti reta. Angi vi tiŋ na, mikuli kum masa gaka ar hin mudumbuŋ ngi kiya gar na i hana.

¹⁵ Yo ma na, kisa gam mikuli ti bazuway da ya Bumbulvuŋ ngi pula mungra kumoyo, kisa gaka nga mi mikuli mizlam zlam ti hin gar waɗ mbaazla pesl tuwa.

d. Vur muguzlum Pak

¹⁶ «Hin kuruˀ nga mufaɗ ngi kiya mudumbuŋ na, i muguzlum Pak ngi ɗuviy hirnga da ya Bumbulvuŋ.

¹⁷ Hin mukuruˀ nga zlum ngi kiya nah na, i ɗuva virzi ngi muguzlum. Ki sa zumam ɗaf manja ˀis ara hã hin tarnaˀ.

¹⁸ Hin mudumbuŋ ngi muguzlumo, kisa kusom ngi huruk huruk a mbuŋ ɗu. Ki sa gaka slra kum magaka muhõyyõ na mata.

¹⁹ Ki sa gam mikuli mizlam zlam wãˀ da ya Bumbulvuŋ: ti gusoŋhoy cuw, zlengerek pal, waɗ ziri tumuŋ ngi vi pal palay tarnaˀ, ginew manja hereweɗ avu taŋ.

²⁰ Ginew gar na, zlaɓ ti hapa mufukuɗa ti mal: gusoŋ gar na, hapa mufukuɗa kilo ngoltir. Zlengereke, hapa kilo merkeɗe.

²¹ Zuŋ tumuŋ ngi si mi tarnaˀhay tuwa gar na, hapa aseˀe kilo makir makir.

²² Yo ma na, kisa gam mikuli ngi pula mungra ti bazuwaya ma. A dirba nah, a sa gukum mezegwel a hirnga kumo ngi pula mungra.

²³ Mikuli tayna gar na, a sa gaka jom ng'avi mikuli mizlam zlam ti mipriki gar mbak le ta tuwa.

²⁴ Angi hin mitarnaˀhay ngi muguzlumo na, kisa vulikiy gwat ngi zum da ya Bumbulvuŋ, mikuli misi zĩˀĩ naŋ a tisliy mevel. Ki sa gaka jom ng'avi mikuli mizlam zlam ti hin gar, anta mbak le ta, waɗ mbaazla pesl tuwa.

²⁵ Angi hin mitarnaˀ naŋ ma na, kisa kusom ngi huruk huruk a mbuŋ ɗu ma. Ki sa gaka slra kum magaka hõyyõ na mata.

e. Vur muguzlum Paŋtekot

²⁶ «Tapas muguzlum Paŋtekot, kum masa soko ti gwat mutukuzo mudumbuŋ ngi sifi da ya Bumbulvuŋ na, kisa kusom ngi huruk huruk a mbuŋ ɗu kwaɗay, yo kisa gaka slra kum magaka hõyyõ na mata.

²⁷ Ki sa gam mikuli mizlam zlam: ti gusoŋ cuw, zlengerek pal waɗ ziri tumuŋ ngi vi pal palay tarnaˀ. Ziˀĩ taŋ mundum na, a sa tisliy mevele.

²⁸ Vur ginew gar na, hapa aseˀe mufukuɗa ti mal: gusoŋ gar na, hapa mufukuɗa kilo ngoltir, zlengereke, hapa kilo merkeɗe.

²⁹ Zuŋ tumuŋ ngi si mitarnaˀhay gar na, hapa kilo makir makir.

³⁰ Yo ma na, kisa gam mikuli ti bazuway, ɓa ngi gukum mezegwel a hirnga kumo ngi pula mungra.

³¹ Ki sa jumoko mikuli tayna gar ng'avi mikuli mizlam zlam wãˀ vur hin gar, waɗ gwat ngi vul aseˀe na, kisa gaka ti ginew manja hereweɗ avu taŋ waɗ mbaazla pesl tuwa.»