SLUFA VU 25 - Bible en langue guiziga

Israyeley muvulaka vu taŋ da kuli

¹ Israyeley a pam a Sitim. A zlaka a gam sulome lambaˀ ati ngwas Moˀapay,

² Ngwas moˀapay a sirkaka taŋ, a gam mikuli da kuli taŋhay, a zumam kuli, yo a huruk hurukam a mbuŋ kuli taŋhaya.

³ Wãˀ naŋ na, a jumom ngi gi kuli Baˀal ngi Peˀor, joˀ Bumbulvuŋ a zuɓ mevel fõh fõh ar taŋ.

⁴ Bumbulvuŋ a ɓa Moyise: «Ja buy ngi mizli gar, luwa taŋ law law ar pas a mbuŋ ɗu, ɓa mevel ɗu mufõh fõh ar kum na, a sa tisli.»

⁵ Moyis a ɓa migi kiitahay misi a wuzla Israyeleye: «Ko wa gar asi kumo, anja a kiɗa mizli naŋhay mihuruk hurukam a mbuŋ Baˀal ngi Peˀor na vagay vagay!»

⁶ Angi nah vuna si na, mbur Israyel a ndilo ti zuŋ Madiyan nga wuzla sukum naŋhaya. Naɓa Moyis ati jum ngi Israyeley gar, a roko tuwam avu miviŋ ngi guɗuk ngi zlir ti Buymisemuŋ. A puraka mbur ati ngwas tuwa le.

⁷ Akẽh na, masay Pinas, mangal ngi Elazar, dideˀ ngi Aroŋ, a slikiɗ baɗ a wuzla mizli, a zuɓ ziwit a haŋ.

⁸ A sipa mbur mici ti zuŋ madiyan ng'ar baburum tuwa, a cika taŋ ar kwacaya, gor njoŋ zlaɓ cuw taŋ. Dar bonoy mislikiɗ ngi kiɗa Israyeley tuwa, a tiˀi haŋhaŋ si.

⁹ Naɓa masay Pinas vuna a kiɗ mizli le durmuk kukur cuw nga mufaɗ si.

¹⁰ Bumbulvuŋ a ɓa Moyise:

¹¹ «Masay Pinas, mangal ngi Elazar, dideˀ ngi Aroŋ, ya mislikiɗ himaˀ ng'ar Israyeley na, a tisliy mevel le, a cici le kaŋ kaŋ avu taŋ ka ya vuna. Vurˀe, ko ti ya maɓi hirdam hirdam, yi Bumbulvuŋ taŋ pal tewle na kwana, i ngi ngizla taŋ pay ta na, mbele Pinas.

¹² Wurenna, ara ɓaŋ na, i jumomˀay ati naŋ ɓa zuy a gi.

¹³ I jumoˀay masa tiri ti taŋ masayay, naŋ ati dideˀ naŋhay hã ngi sete. Naŋ kine, a biga le, a jum le ati ya Buymisemuŋ naŋ tewle, a lum pula mungra ngi Israyeleye kahana, mbele naŋ.

¹⁴ Mbur Israyel mikiɗaka taŋ zlaɓ ati zuŋ Madiyan tuwa, a zilaka Zimri, i mangal ngi Salu, i buyɓi ngi muy ngi Simeyoŋhoy.

¹⁵ Zuŋ Madiyan na kwana, a zilaka Kosbi, cine i Sur, a wi dideˀ dideˀ mbeˀmbeˀ ar sukwi ngi Madiyanaya.

¹⁶ Akẽh na, Bumbulvuŋ a ɓa Moyise:

¹⁷ «Zlaka kiɗa vu ati Madiyanaya, ngizlaka taŋ pay!

¹⁸ Naŋ kine, ar ɓi ngi Peˀor ati ngi Kosbi na, taŋ i mesene kum misi ti werey. Kosbi i sukum taŋ mongoso, zuŋ ngi buy Madiyan, a kiɗaka vagay tapas hin ngi bonoy madiɗa migi a Peˀor.»

¹⁹ A dirba bonoy nah na,