SLUFA VU 24 - Bible en langue guiziga

¹ Bumbulvuŋ a wuɗ, sey a ɗuwula mi da Israyele na, Balaˀam a si na le muduba. Aru nga cino mingiɓi ngi Bumbulvuŋ manjikaŋ di, kaɓa naŋ maga zleˀe na mata. Amma a mbiɗi hiri kutum ngir ti wuzlaɓuh mikirɗak kirɗak.

² Balaˀam a ɗuva hiri taˀ na, a pura Israyeley mipaka slala vur sukwi vur sukwi. Dar ˀUf ngi Buymisemuŋ a sawa ar naŋ.

³ Joˀ a ɓa mi ngi zuwulavu ani: «Ya Balaˀam, mangal ngi Beˀor, ya mbur mapur kweŋ kweŋ,

⁴ Y'ani ɓa mingiɓi ɗu anihĩ: i mingiɓi nga ya mbur macina ɓi ngi Buymisemuŋ. masingila gwat Misi gidaŋ wãˀ mabigiy di. Asi da ya mira huruk huruk a mbuŋ naŋ na, a bigiy vu.

⁵ Kum mizli ngi Israyeley, kayya, guɗuk kumoyo, taŋ mezle haɗi! Kum mizli ngi Zakopoy, kayya, hay kumoyo, taŋ mezle haɗi

⁶ A puram kaɓa mekepel mazuɓu, kaɓa jarne misilaɓɓa a ˀaydidik, kaɓa alowehey Bumbulvuŋ minga taŋ le, kaɓa miterey a mi yam.

⁷ Taŋ kaɓa yam mavunoho tir miviɗiviɗi naŋ, a ɓul jiniy jiniy ng'ar guva. Buy taŋ madiɗa, a sa pa hirnga da Agaka, gidaŋ ngi zumabuy naŋ a sa ndih.

⁸ Buymisemuŋ mubo taŋ ti Ezipte na, naŋ ti gidaŋ haɗa kaɓa ngi mbana. Sukwi mekelemey mizlaka taŋ le na, a kiɗa taŋ pay kutum. A ngila taŋ tesleye, a slina taŋ gor njoŋ gor njoŋ ti luvuto.

⁹ A hurukom huruk huruk, a hinam kaɓa moboroy, naŋ misi kaɓa gwat miji vuhoy na, matika taŋˀay gu ngi slikiɗ i waka? Israyel, mbur muɗuwuw mi le na, a sa ɗuwulakaŋ mi, mbur minisuw le na, a sa nisakaŋ!»

¹⁰ Balak a zuɓ mevel fõh fõh ng'ar Balaˀama, a tuko haŋ tuk tuk, dar a ɓaŋ: «Luh luh! Yi so ti ka ɓa ki nisa mesene ɗuwoyo ma na, ka ki ɗuwula taŋ mi ti ɗuwul, ki ga ani sar makir!

¹¹ Da kine na, cuh, mi nga hirwuy ɗiki. Yi ɓi zleˀe, i sa ɗuvuw hirnga, amma Bumbulvuŋ a tukuw di le!»

Balaˀam miɓa ɓi ngi sukwi Israyel masa lum dudok tumbuŋ

¹² Balaˀam a mbiɗa da Balaka: «Yi ɓa le ɗaˀ ɗaˀ le da mizli ka mislino taŋ ng'avi ya na, i ɓa taŋ na:

¹³ Ko da Balak a vuliy dala waɗ ɓiri tapasl tapasl mindeŋ ndeŋ ar mugum naŋ na kwana, y'anta ziriɗa mi ngi Bumbulvuŋ muɗuviy di na ta. I ɓi di i ɓi Bumbulvuŋ miɓiy na tewle di si.

¹⁴ Yo wurenna, i mi le ng'avi mizli ɗuwoy. Amma so kwaɗay, i ɓuw ɓi ngi gwat Israyeley masa gaka tumbuŋ da sukwi ɗike.»

¹⁵ Dar Balaˀam a ɓa mi ngi zuwula vu ani: «Ya Balaˀam, mangal ngi Beˀor, ya mbur mapur kweŋ kweŋ, y'ani ɓa mingiɓi ɗu anihĩ:

¹⁶ I ɓi na: ya mbur macina ɓi ngi Buymisemuŋ, masina ɓi miyaŋ ngi Buymisemuŋ Mimadiɗa, yo masingila gwat misi gidaŋ wãˀ mabigiy di. Da i hin le simtraˀ ka muɓursla le a mbuŋ naŋ na, a bigiy vu.

¹⁷ I ra pura gwat masa ndilawa ɓula, amma anta sa gi dana dana ta. I ra singila, amma anta sa gi a haŋhaŋ ta. Bangay a bo le a wuzla ziri ngi Zakopoyo. Buy madiɗa a bo le asi Israyeleye. A ra kiɗa mizli Moˀapay ar li tinik ti ganday naŋ ngi buyoy, yo ara ngizla mizli ngir saray misi asi ruwuyo pay.

¹⁸ A sa tiɓa Seˀir, hirwuy Edom ngi mesene naŋhay na ma. Joˀ Israyeley a tiram bugawlahay.

¹⁹ Mbur mapa hirnga da mesene ngi Israyeley a bo le tivu Zakop, a sa ngizla mizli mindiram ar walahaya pay wãˀ.

Balaˀam miɓa ɓi ngi Israyeley masa ngizlaka mesene taŋhay

²⁰ A dirba nah, Balaˀam mupura Amalekey na, a ɓi ngi zuwulavu ani: «Amalekey i sukwi migidaŋ teˀe. Amma nga mbuŋ a sa tiri diŋ.»

²¹ A pura Keniheye, a ɓi na: «Kenihey, wurenna hirwuy kumo, a ro setette, kaɓa hay ngi ɗiyuw angi gidigil muwã.

²² Dambalaka hay kumoyo, vu a sa zuma taŋ, mizli Asirihey a sa jukum ng'ar beke ngbaŋ»

²³ Balaˀam a ɓi ma: «Kayya! Da Buymisemuŋ a ɓi le a gi gwat na, mbur masa ndir ti siifa ada makwa?

²⁴ Palalam ngi yamay ada soko ti Sipre, mizli ngi raˀahay, a gaka bonoy da Asiriheye, waɗ da dideˀ ngi Ebereye ma. Amma taŋ vuna kwana, a sa zizama ya.»

²⁵ A dirba Balaˀam miɓa mingiɓi hana, a zuɓ jiviɗ nga hirwuy naŋ. Balaka kwana a zuɓ jiviɗ naŋ ya.