SLUFA VU 23 - Bible en langue guiziga

¹ Balaˀam a ɓa Balaka: «Ndiriy li gi mikulihey tarnaˀ aka, yo wi vu ti gusoŋhoy tarnaˀ waɗ zlengerekey tarnaˀ.»

² Balak a ga kaɓa Balaˀam miɓaŋ di tuwa, dar taŋ cuw taŋ a gam mikuli ti sla pal waɗ zlengerek pal ar li gi mikuliheye tiɗeˀe.

³ Balaˀam a ɓa Balaka: «Cici gweˀ avu gwat ngi mikuli ɗik mazlum na, yi wuɗ i buˀ neˀ avu ka. Asinta, Bumbulvuŋ a sa ji ti ya hirnga kwani? da a ɓiy di i ɓi wana wana gar na, yi sa ɓuw di.» A jiɗ nga muwã manja widisey.

⁴ Buymisemuŋ a biga vu da Balaˀam akẽh, joˀ Balaˀam a ɓaŋ: «I ɓi le, a ɗiyaka li gi mikulihey mitarnaˀ na le, yo a gam mikuli le ti gusoŋ pal waɗ zlengerek pal ar li gi mikuliheye tiɗeˀe.»

⁵ Dar Bumbulvuŋ a ɓo mingiɓi naŋ ti balam Balaˀama, a ɓaŋ: «Mi ng'avi Balak a muŋ, ara ɓaŋ ɓi ya muɓuw di na.»

⁶ Balaˀam a mi ng'avi Balaka, ara lumaŋ deŋ a ciki gwat ngi mikuli naŋ mazlumo, waɗ buy Moˀapay misi aseˀe tuwa.

⁷ Balaˀam a ɓa ɓi ngi zuwula vu ani: «Balak, buy madiɗa ngi Moˀap a ziliy baɗ ti muwã Siri, tisi pas ngi mipriki. «A ɓiy na, sawa! nisa dideˀ ngi Zakopoyo, sawa, guco mi da dideˀ ngi Israyeleye!

⁸ Amma mburo, da Buymisemuŋ vuna a nisaŋ ta sina, yi sa nisaŋ mbri mbrike? Mburo, da Bumbulvuŋ a gucoŋ mi ta si na, yi sa gucoŋ mi mbri mbrike?

⁹ Ti ya mupuro mizli tayna ti hirnga gidigil muwã, ya misingilo taŋ tir li ɗigara, i pura na, taŋ a cifam baˀ pal. A sinaka vu taŋ le, taŋ pal avu sukwi ngi mizli mekelemeye.

¹⁰ Maslufa Israyeley mikweslekwesle na gu i waka? Dideˀ ngi Zakopoy zigiduw mitaˀ na, maɓi taŋ kini gu i waka? Zuwen ya mamuc kaɓa mizli macinam mi da Buymisemuŋ na ya, yo anja kiɗa mi ɗu a gi ka ngi mizli Israyele tayna ya!»

¹¹ Balak a ɓa Balaˀama: «Ki giy hana i gwat mike? I so ti ka nga nisa mesene ɗuwoy ma na, ka ki ɗuwula taŋ mi ti ɗuwul mbri mbrike?»

¹² Balaˀam a mbiɗaŋ di: «Da ya mira ɓi na, sey i ɓi di i ɓi Bumbulvuŋ maɓo di ti balam ɗu na ta kwa?»

Balaˀam muɗuwula mi da Israyeley sar mucuw naŋ

¹³ Balak a ɓaŋ ma: «Sawa asi ya ng'ar li mekelem a diga, kisa pura Israyeleye gar. Asi akaka na, ki pura taŋ cah ti cah. Ki sa nisiy taŋ a diga so.»

¹⁴ Balak aru ti Balaˀama sesẽŋ ar li ngi jiɗa li, gweˀ avu mesengel ngi muwã Pisga. A ɗiyi li gi mikuli tarnaˀ a diga ma, a gi mikuli ti gusoŋ pal waɗ zlengerek pal ar li gi mikuliheye tiɗeˀe.

¹⁵ Balaˀam a ɓa buy Balaka: «Cici deŋ aka gweˀ avu gwat ngi mikuli ɗik mazlum na, y'ani ru nga diga ngi kutuko ɓi masa ɓikiy di.»

¹⁶ Bumbulvuŋ a biga vu da Balaˀama, a ɓaŋ mingiɓi naŋ, a ɓaŋ. «Mi ng'avi Balak a muŋ, ara ɓaŋ ɓi ya muɓuw di na.»

¹⁷ Balaˀam a mi ng'avi Balak a muŋ, ara luuma deŋ a ciki gwat ngi mikuli naŋ mazlum tuwa, waɗ buy Moˀapay misi aseˀe tuwa. Balak a cufuɗa Balaˀama: «Bumbulvuŋ a ɓi mbrike?»

¹⁸ Akẽh na, Balaˀam a ɓa ɓi ngi zuwulavu ani: «Balak, slikiɗ, cin ɗi! Mangal ngi Sipor, jika slimiɗi!

¹⁹ Buymisemuŋ i mbur ɓa a gi slir ta. I mbur titira ɓa a mbiɗa wuluk naŋ ta. Da a ɓa ɓi le na, a ga cummo si, da a ɓi le ngi gi gwat na, a ga gbaˀa.

²⁰ Ya, yi ngum le ngi ɗuwula mi da mizli tayna, asi Bumbulvuŋ a ɗuwula taŋ di le. Y'anta mbiɗa pal ta.

²¹ Bumbulvuŋ a pur malambaˀ loŋ neˀ le avu mizli ngi Israyeleye ta, a pur gwat mijeŋ ta neˀ le avu mizli ngi Zakopoyo ta. Naŋ i Buymisemuŋ taŋ, a hin a wuzla taŋ. A ra jakaŋ salalay kaɓa majaka da buy.

²² I naŋ mubo ti taŋ tir ruwuy Ezipte, ti gidaŋ naŋ mihaɗa kaɓa ngi mbana.

²³ Mihiziga njoloy anta asi Israyeleye ta, mupura daˀasay anta a hay Zakopo ta. Gwat Bumbulvuŋ maga gar na, a dubunaka kasl kasl ar pas naŋ si.

²⁴ Sukwi hana, a slikiɗ kaɓa gwat miji vu, a cici deŋ kaɓa mobor, a nguwa gwat naŋ mija le, a sa pumbus naŋ kwaɗay, a dirba nah, a sa hin.»

²⁵ Balak a ɓa Balaˀama: «Da ki nisa taŋ ta na, anja ki ɗuwula taŋ mi ta so.»

²⁶ Balaˀam a mbiɗaŋ di: «Gwat Bumbulvuŋ miɓiy di le gar na, i sa gi di i naŋ na, i ɓuw di le takwa?»

Balaˀam muɗuwula mi da Israyeley sar mimakir naŋ

²⁷ Balak a ɓaŋ ma: «Sawa, i ru ti ka ng'ar li mekelem ma. Asinta, Buymisemuŋ a sa ngum, ɓa ki nisiy sukwi tayna baɗ a diga.»

²⁸ Balak aru ti Balaˀama sesẽŋ nga mesengel ngi muwã Peˀor. Wuzlaɓuh mikirɗak kirɗaka, a pur kaɗaŋ kaɗaŋ a diga.

²⁹ Balaˀam a ɓaŋ: «Ɗiyiy li gi mikuli tarnaˀ aka, yo wi vu ti gusoŋhoy tarnaˀ waɗ zlengerekey tarnaˀ ma.»

³⁰ Balak a ga kaɓa Balaˀam miɓaŋ di tuwa. Dar a gi mikuli ti gusoŋ pal waɗ zlengerek pal ar li gi mikuliheye tiɗeˀe.