SLUFA VU 20 - Bible en langue guiziga

Israyeley mitiraka Bumbulvuŋ a Meriba

¹ Ar kiya mudumbuŋ naŋ na, mizli Israyeley gar, a ndilam le a wuzlaɓuh mikirɗ kirɗak ngi Sin, a pam a Kades. Miriyam a muc a diga, a dikakaŋ.

² Jum ngi Israyeley a lumam yama ta, a kusom hoyo hoyo ng'ar Moyis ati Aroŋ.

³ Mizli Israyeley a jiginam mi avu Moyise, a ɓakaŋ: «Kay! Zuwen ndra mumicam zleˀe, kaɓa sukum ndrahay Bumbulvuŋ mikiɗa taŋ na ya!

⁴ Ndra mizli ngi Bumbulvuŋhoy ma na, ki so ti ndra nga wuzlaɓuh aka ngi gi mike? Ki wuɗ ɓa i micam aka ati ginew ndraˀahaya gar kwa?

⁵ Ki coho ti ndra mbak Ezipte le na, ng'ar li misi bonoy hana vur mike? Li zligi anta ma, urufoy anta kaˀ kaˀ ta ma, guva ngi gudubun anta ma, hunduruk anta ma, ko yam ngi si tekeɗe anta.»

⁶ Moyis ati Aroŋ a pulaka zigiduwo, a ram nga mizlingre guɗuk ngi zlir ti Buymisemuŋ. A hurkom huruk huruk a diga, joˀ dudok ngi Bumbulvuŋ a biga taŋ vu.

⁷ Bumbulvuŋ a ɓa Moyise:

⁸ «Zuɓa ganday ɗike, kusoko Israyeley ati sukum ɗik Aroŋ. Ki sa ɓaka mandazlay muwã a mbuŋ taŋ na, a sa vulukum yama. Ki sa bo taŋ ti yam col col tir mandazlay muwã, joˀ kisa vula yam da jum ngi Israyeley ati ginew taŋhaya gar.»

⁹ Moyis ara zuɓa ganday naŋ ar guɗuk ngi Bumbulvuŋ kaɓa naŋ muɗuvaŋ ɓi nah.

¹⁰ Moyis ati Aroŋ a cikilaka jum ngi mizli Israyeleye nga mbuŋ mandazlay muwã, a ɓaka taŋ: «Mizli mislikiɗa ɓihey, cinam so! I ndilaka ngi bukum ti yam col col tir mandazlay muwã hana ta kwa?»

¹¹ Moyis a zuɓa haŋ, a kiɗa mandazlay muwã ti ganday naŋ is cuw. Yam a bo col col haɗa, dar jum ngi Israyeley a sam waɗ ginew taŋhaya ma.

¹² Amma Bumbulvuŋ a ɓa Moyis ati Aroŋ: «Ki tiɓaka ɓi ɗu ta, yi Buymisemuŋ migisiŋ na, ki bigaka a mbuŋ Israyele ta. Vurˀe, masaram ti mizli hanayna, nga hirwuy ya muvula taŋ di na, i kum ta.»

¹³ Miviɗiviɗi ngi yam hana, a zilaka Meriba, mbiɗeˀvra, ‹tiri›, asi Israyeley a jiginam mi le avu Bumbulvuŋ ar li nah. Amma Bumbulvuŋ i Buymisemuŋ migisiŋ na, a biga taŋ di le a diga.

Buy madiɗa ngi Edom mungum pula Israyeley a cohom ta

¹⁴ Moyis a slin mizli zle a Kadese, ɓa ara ɓaka buy madiɗa ngi Edomo na: «Mingiɓi ngi sukum ɗik Israyeley ani: ki si na gwat mutuwaˀhay migam avu ndra na le gar.

¹⁵ Ti zlezle zleˀe, dideˀ ndrahay a ram le zleˀe nga hirwuy Ezipte, a zikam a diga haɗi. Amma Eziptehey a gam ndra bonoy le ati dideˀ ndraˀahaya.

¹⁶ I tilaka mi da Bumbulvuŋ, a cine widi ndra le. A slino ndra modro naŋ, ɓa a bo ti ndra ti Ezipte. Ndra ani wurenna a Kades, walahay madiɗa misi ar maakway ngi hirwuy ɗike.

¹⁷ Pula ndra jiviɗ, ɓa i ngiraka hirwuy ɗike! Ndr'anta sa bam baɗ ar li muhuvahay malla guva ngi gudubunoyo ta. Ndr'anta sa saka yam ngir vigiɗeye ta. I sa jam jiviɗ madiɗa tileɓ tileɓ tewle, ko mbur mangizli ti haŋ hazum malla ti gula anta, hã i bam kine tisi hirwuy ɗike.»

¹⁸ Amma buy madiɗa ngi Edomo, a mbiɗa taŋ di: «Kum anta sa ngiraka hirwuy ɗu ta, da ki zlam ɓi le na, i gam vurum!»

¹⁹ Israyeley a mbiɗakaŋ di: «I sa ram tileɓ tileɓ a jiviɗe si, ndra ati ginew ndraˀahaya, da i sam yam ɗike le na, i sa wurukukuw di. Gwat ndra mawuɗama, i cuh ti sar tewle.»

²⁰ Amma buy madiɗa a mbiɗa taŋ di: «Kum anta ki cohom ti ka ta si!» Edomoy a boko nga zlir ti Israyeley tuwa, ti migi vurumoy haɗi, mizli migidaŋhay.

²¹ Naŋ kine, Edomoy a tikaka Israyeleye ɓa a cohom tir hirwuy taŋ ta, dar Israyeley a zuɓam jiviɗ mekelem.

Muc ngi Aroŋ

²² Jum ngi mizli Israyeley gar, a cohom ti Kadese, a ram nga muwã Hor.

²³ Ar maakway ngi ruwuy Edomo, Bumbulvuŋ a ɓa Moyis ati Aroŋ a diga na:

²⁴ «Aroŋ a sa muc gweˀ nga luuma dideˀ naŋhay muduba. N'anta sa ci nga hirwuy ya muvula da Israyeley na ta. Asi a cinaka mingiɓi ɗu ar miviɗiviɗi ngi Meriba na ta.

²⁵ Ka Moyise, jiɗ ti Aroŋ ati mangal naŋ Elazara nga muwã Hor.

²⁶ Ki sa cuko zana ngi mikuli misi avu Aroŋ a hirnga muwã a diga, ki ka taŋ da mangal naŋ Elazar. Aroŋ a sa muc a diga.»

²⁷ Moyis a ga kaɓa Bumbulvuŋ muɗuvaŋ ɓi nah tuwa. A jiɗam makir taŋ nga muwã Horo, a mihiri ngi mizli gar.

²⁸ Moyis a cuko zana ngi Aroŋhoyo, a ka taŋ da Elazar. Aroŋ a muc a hirnga muwã a diga. A dirba nah, Moyis ati Elazar a poko sar baɗ a muwã.

²⁹ Jum ngi Israyeleye misinaka, Aroŋ a muc le na, dar a tuwaka vagay naŋ hin kukur makir.