SLUFA VU 19 - Bible en langue guiziga

Fucu ngi sla mivirziŋŋe

¹ Bumbulvuŋ a ɓa Moyis ati Aroŋ na:

² «Ɓimuɗuva, ya ɓi micica na, ani: ɓa Israyeley a sukuw ti sla mivirziŋŋe, manja hereweɗ, mikakaŋ galalaŋ ɗaˀ ta.

³ Ki sa vulaka da masay Elazar. A sa bi di nga duba gala, a slaka ˀay naŋ mur naŋ.

⁴ Masay Elazar a sa ca muzuŋ haŋ njof ng'ar pumbuso, waɗ a kuca kwic kwic is tarnaˀ ngir tivi mizlingre ngi guɗuk ngi zlir ti ya.

⁵ Joˀ a sa zlumaka sla soŋ wãˀ mur naŋ: garak naŋ, useˀ naŋ, pumbus naŋ waɗ gwat ngi kwacayaya.

⁶ Masay a sa wuɗ dum ngi miter, mihaŋ ngi izop waɗ ngwic ngi tumuŋ, ngwic munduva migagaza ndezze. A sa pa taŋ cek ng'ar vu mazlumam di sla tuwa.

⁷ A dirba nah, masay a sa buna zana naŋhaya, a bun ceɗ ceɗ, a mi ng'ar walahay guɗuk a muŋ, amma a sa ndir ti dili hã pastaˀ.

⁸ Mbur muzluma sla vuna ya kwana, a sa buna zana naŋhay ati vu naŋ ya, a sa ndir ti dili hã pastaˀ.

⁹ Yo mbur masa hila fucu ngi sla na, i mbur manja dili, a sa pa ar li manja dili a duba gala. Israyeley a sa wam di vu ngi pi ar yam, ɓa a tiri yam ngi zuɓa hiryi. Nah i mikuli ngi pula mungra.

¹⁰ Mbur mihila fucu vuna kwana, a sa buna zana naŋhaya ceɗ ceɗ aya. A sa ndir ti dili hã pastaˀ. Israyeley ati mulakay misi asi ruwuy taŋhaya, a sa jaka ɓimujuwa hana ngi caˀa.»

Ɓimujuwa vur zuɓa dili

¹¹ Buymisemuŋ a ɓi ma: «Ko wa gar mija haŋ le avu vagay ngi mbur na, a ndir ti dili hã hin tarnaˀ.

¹² Hin mimakir naŋ ati mitarnaˀ naŋ na, sey a zuɓa dili naŋ ti yam. Amma da a zuɓa dili ar hin mimakir naŋ ati mitarnaˀ naŋ ta na, a sa ndir di.

¹³ Ko wa gar mija haŋ le avu vagay ngi mbur, da a zuɓa dili naŋ ta na, naɓa a co ti hiryi le ng'ar guɗuk nga ya Bumbulvuŋ. A sa ɓulaka mbur nah ti wuzla Israyeley avra, asi a kucakaŋ yam ngi zuɓa dili ta tuwa, a ndir ti dili.

¹⁴ «Ɓimujuwa mekeleme ani: Da mbur a muc le ar guɗuko na, mizli macam ng'avaŋ ati misi zleˀe ar guɗuko gar na, a ndiram ti dili hã hin tarnaˀ.

¹⁵ Da gwat misi mi naŋ baŋ ada akẽh, a gicaka mi naŋ ngiriɗ ngiriɗ kuy kuy ta na, naɓa gwat ngi raˀa, naŋ ti dili.

¹⁶ Vagay ngi mbur mikiɗa ti kiɗ malla mumuc ti muc ɓaˀ a ɓuh, tesl ngi mbur titira malla zivi, da mbur a ja haŋ le ava na, a ndir ti dili hã hin tarnaˀ.

¹⁷ Ɓa ngi zuɓa dili ngi mbur nah na, a wuɗam fucu ngi sla migam di mikuli zlam zlam ngi zuɓa mungra, a paka sek ar gandaf, a pam yam munuwa ar miviɗiviɗi naŋ sek nga hirnga naŋ.

¹⁸ Mbur manja dili, a wuɗ mihaŋ ngi izop. A ca yop ar yam tuwa, a kuca ng'ar guɗuk, mbur mumuca misi ara tuwa, ng'ar gwatay ati mizli misi ar guɗuko, malla a kuca da mbur mija haŋ avu tesl ngi mbur mikiɗa ti kiɗ malla mumuc ti muc tuwa, malla mija haŋ avu zivi tuwa.

¹⁹ Mbur manja dili a sa kuca da mbur misi dili hin mimakir naŋ ati mitarnaˀ naŋ, naɓa a zuɓaŋ dili naŋ le avra. Mbur misi dili tuwa, a sa buna zana naŋhaya, a bun, yo pastaˀ na, dili naŋ a zuɓ le avra.

²⁰ «Amma mbur mici le ar dili, da a zuɓa dili naŋ avra ta na, ɓulaka mbur misi kahana ti wuzla Israyeley avra, asi a co ti hiryi le ng'ar hay nga ya Bumbulvuŋ. Taŋ mukucakaŋ yam ngi zuɓa dili ta tuwa na, a ndir ti dili vurˀe.

²¹ «Israyeley a sa jaka ɓimujuwa hana ngi caˀa. Mbur mukucakaŋ yam ngi zuɓa mungra tuwa, sey a buna zana naŋhaya, yo mbur muwusa yam nah le na, a ndir ti dili hã pastaˀ.

²² Gwat gar, mbur misi dili mija haŋ le ava na, a ndir ti dili. Mbur mija haŋ le avu mbur misi dili na, naŋ kwana a ndir ti dili hã pastaˀ aya.»