SLUFA VU 18 - Bible en langue guiziga

¹ Dar Bumbulvuŋ a ɓa Aroŋ: «Da mizli a gam mungra le avu hay nga ya Buymisemuŋ na, buyɓi naŋ i ka ati ziri ɗik mizilehey waɗ mizli levihey. Amma da kum misa gam mungra le ar slra ngi gi mikuli na, buyɓi naŋ i ka pal ɗik ati ziri ɗikey.

² Sukum ɗik levihey, muy ngi cine ɗikeye, kisa pula taŋ, ki kiraham bummoˀ ng'avu hay ɗu. A sa junukuw, i mucuw ɗikey. Amma masa cicam a mbuŋ guɗuk misi beleler ngi jumoˀay anga na, i ka ati ziri ɗikey.

³ Sukum ɗik levihey a sa gam gawla ɗikey, a sa gaka slra ngir guɗuko gar. Amma anja a gumbaˀam ng'avu gwat ngi slrahay misi ar hay nga ya Buymisemuŋ ta, a gumbaˀam ng'avu li gi mikuli ta, naɓa ko mbur pal masa muc anta, ko taŋ, malla ko kum.

⁴ A sa jinukuw ar gwat ngi gihey gar waɗ ar slra ngi gihey ar guɗuk ngi zlir ti ya Buymisemuŋ gar ma. Ko mbur ngi vra masa jum ng'avu kum ngi gi slra anta.

⁵ Masa gaka slra ngir hay nga ya Buymisemuŋ ati ngir li gi mikuli i kum. Naŋ kine, y'anta sa slikiɗ mevel fõh fõh ar Israyeleye mata.

⁶ Puraka ɗi, i wuna sukum kum leviheye le a wuzla Israyeleye. Taŋ inga yahay, i vulukum taŋ le, ɓa a gaka slra ngir guɗuk ngi zlir ti ya Buymisemuŋ.

⁷ Amma ka Aroŋ ati ziri ɗik mizileheye, kisa gaka slra ngi kum masayaya ar li gi mikuli waɗ ar li mipal wãˀ, ti duba zana minjar ngi tika hiri na. Muvulukum slra nah i ya. Da mbur mekelem a gumbuˀ le ng'avi hay nga ya Buymisemuŋ na, kiɗaka vagay.»

Migir ngi masayay

⁸ Bumbulvuŋ a ɓa Aroŋ na: «Pura ɗi, gwat ngi vul Israyeley mavulikiy di gar na, i pula zayɓi naŋ asi haŋ ɗiki. I vuluw taŋ da ka, i mi ngi ɗiki, a sa ndir da ziri ɗikey ngi caˀa nga mbuŋ.

⁹ Mi nga ya, a sa zlumaka ar li gi mikuli. Gwat ngi vul mavulikiy di hĩˀĩ da ya na, mi ngi kum anga ani: hapa mavulaka gar, gwat ngi gi mikuli ngi puya mungra gar waɗ gwat ngi gi mikuli ngi ɗiya ɓi, Israyeley magikiy di gar na, i mikuli mihĩˀĩ da ya Buymisemuŋ, amma i vulukum di le, i mi ngi kum ati ziri ɗikey nga mbuŋ nga mbuŋ.

¹⁰ Ki sa zumaka ar li mipal wãˀ na. Amma masa zumaka na, sey ziley ati ziri mizilehey tewle, asi i ɗaf ngi sedege da ya.

¹¹ Gwat Israyeley mavulikiy di na, kisa lum cah anga ya. I vulukum di le hã ngi set da kum ati ziri ɗik mizilehey waɗ mongosohoy. Mizli ngi hay ɗikey gar micam ar dili ta na, a zumaka zuy.

¹² Gwat mudumbuŋ ngi migamay, Israyeley mavulikiy di na, i vuluw di ma: mal mimezle muɗuco wureˀ aruŋ, mbaazla si, alkamari, waɗ gwat micikiɗeffe mavulaka gar da ya Bumbulvuŋ.

¹³ Gwat mudumbuŋ ngi migamay ngi ruwuy taŋ, taŋ masa sikiy di da ya Bumbulvuŋ gar na, i ngi kumo ma. Mizli ngisi ruwuy micam ar dili ta gar na, a zumaka zuy.

¹⁴ Gwatay Israyeley majam taŋ mi ɗu gar na, i ngi kumoyo ma.

¹⁵ Ngi kiɗa mi naŋ wãˀ na, gwat modogom gar masoko di da ya Bumbulvuŋ, modogom ngi mizli ati ngi gwat misãmihey na, a sa ndiram da kumo ma. Amma modogom ngi mizli ati ngi gwat misãmi mitikahay le ngi zumo na, kisa mbiɗaka hirnga taŋ.

¹⁶ Ki sa mbiɗaka hirnga ngi ziri mizileheye, hirak ti taŋ misi kiya pal, cikili naŋ suloy zlum, dudok ngi suloy purla gar na, gram kuruˀu.

¹⁷ Amma modogom ngi slahay, ngi tumuŋhoy, ngi ˀawaya na, ki mbiɗaka hirnga taŋ ta. Taŋ hĩˀĩ inga yahay. Ki sa paka pumbus taŋ ar li gi mikuli, yo mal taŋhaya, kisa gikiy taŋ mikuli mizlam zlam, ɓa zĩˀĩ naŋ a sa tisliy mevel da ya Bumbulvuŋ.

¹⁸ Yo ma na, useˀ naŋ a sa ndir da kum. Ginew mibigaka le ti gi mezegwel, a gam di mikuli ngi luuma zuy le na, didak naŋ ati sar naŋ hazum ngi dirba, a sa ndiram da kumo ma.

¹⁹ Gwat Israyeley majam di mi ɗu gar na, i vulukum taŋ le gar. A sa ndir wãˀ da kum, da ka Aroŋ ati ziri ɗik mizilehey waɗ mongosohoyo, tisi jumoˀay makiɗ mi ta, ya mujum ati ka, waɗ ati dideˀ ɗikey na.»

²⁰ Bumbulvuŋ a ɓa Aroŋ ma: «Hirwuy ya masa vula da Israyeley na, k'anta sa lum mi ngi ɗik a diga ta, ko zlili ngi raˀa tekeɗe. Asi mi ngi ɗik ati zlili ɗik a wuzla Israyeley i ya.»

Migir ngi levihey

²¹ Bumbulvuŋ a ɓi ma: «Levihey magam slra ar guɗuk ngi zlir ti ya Buymisemuŋ na, migir ya masa vula taŋ di ani: i sa vula taŋ zlili, mbiɗeˀvra, mukuruˀ ngi gwat mavulaka asi ruwuy Israyel gar.

²² Naŋ kine, Israyeley mekelemeye, anta sa kiraham ng'avu guɗuk ngi zlir ti ya na mata, vur taŋ mazluɓam ɓi, a micam.

²³ Masa gam slra ar guɗuk ngi zlir ti ya i levihey. Da a gam malambaˀ le ar li nah na, ɓi nah avu taŋ. A sa tiri i ɓimujuwa avu taŋ hã ngi sete. Mizli leviheye, anta sa lumam hirwuyo kaɓa Israyel mekelemeye ta.

²⁴ Amma mukuruˀ ngi gwat Israyeley masa vulikiy di na, i sa vula taŋ di. Ya miɓa taŋ: kum anta sa lumam hirwuyo, kaɓa Israyel mekelemey na ta na, vurˀe.»

²⁵ Bumbulvuŋ a ɓa Moyise:

²⁶ Ki sa ɓa mizli leviheye na: «Mukuruˀngi gwat Israyeley masa rukum di na, yi vulukum di le ar deɗe ngi hirwuy, kumo kwana, kisa zuɓaka mukuruˀ naŋ ya, joˀ kisa vulikiy di.

²⁷ Gwat kum masa mavulikiy di na, a sa tiri i gwat mupurla ati ngi misi Israyel mekelemey masa hilam cah avu daw taŋhay, malla avu mbaazla si, ɓa a vulikiy di da ya na.

²⁸ Naŋ kine, kumo kwana, ki sikiy ti mi ngi kum aya. Ki sa hilam avu mukuruˀ ngi gwat kum masa tuɓoko di avu Israyel mekelemeye. Ki sa vulikiy mi nga ya a haŋ masay Aroŋ.

²⁹ Gwat masa vulukum di gar na, ki hilaka vay mimezle naŋ pay wãˀ, ko a ndir ta, joˀ ki vulikiy di da ya.

³⁰ Ki sa ɓa taŋ ma: Da kum mihilaka vay mimezle nah le na, kisa wam vu ti is naŋ da kum, kaɓa mizli Israyele mekelemey mawam vu ti is ngi daw taŋhay, ngi mbaazla si taŋhay, waɗ mal taŋhay na ya, a sa gi i gwat misi purla si.

³¹ Gwat tayna, kisa zumaka taŋ ko amaka gar ati mizli ngi hay kumoyo. Na zle, i wuruk ngi slra kum magaka ar guɗuk ngi zlir ti ya Buymisemuŋ na.

³² Da ki vulikiy vay mimezle le da ya na, naɓa kum mazumaka is naŋ na, ki gam di i mungra ta. Yo naɓa gwat Israyeley mavulikiy di na, kum anta sa puraka kaɓa i gwat mi ho gar ta, yo muco anta sa kuɗukum ta.»