SLUFA VU 14 - Bible en langue guiziga

Mizli mungumam ci nga Kanaˀana ta

¹ Mizli Israyeley gar, a hinam kap ar li widi, ara tuwam.

² Israyeley gar, a zlaka ngila mi da Moyis ati Aroŋ, a ɓaka taŋ na: «Kay! Zuwen ndra mumicam zleˀe a Ezipte malla zuwen a wuzlaɓuh mikirɗak kirɗak hana ma!

³ Bumbulvuŋ vuna, aru ti ndra nga hirwuy misi kanah ngi gi mike? I sa ra micam ar vurum a diga, a sa tiɓaka ngwas ndrahay ati ziri ndraˀahaya. Zuwen ndra mamam nga Ezipte takwa?»

⁴ A ɓam ar wala taŋ: «Cukum buy mekelem, ɓa i mam nga Ezipte!»

⁵ Moyis ati Aroŋ a hurkom huruk huruk a ruwuy, a mbuŋ Israyele gar micikilama.

⁶ Zozuwe mangal ngi Nun, waɗ Kalep mangal ngi Yefune, t'ada cuw taŋ a wuzla mizli miram zleˀe nga pura hirwuy tuwaŋ. Joˀ a ngiraka zana taŋhaya ti mevel.

⁷ A ɓaka mizli Israyeleye gar: «Hirwuy ndra miram nga puro di na, i hirwuy mezle haɗa!

⁸ Ɗuwa ati mam ara ɓulom araŋ. Da Bumbulvuŋ a ngum le na, a sa ru ti ndra nga diga, a vula ndra di da ndra.

⁹ Na so na, anja ki slikiɗam ɓi avu Bumbulvuŋ ta ɓula: ki zluwunam ti mizli ngi hirwuy nah na ta. I sa ngizlaka taŋ pay kutumo si. Na zle, kuli taŋhay a pulaka taŋ le, Bumbulvuŋ naŋ da ati ndra, i zluwunam ti taŋ mata so!»

¹⁰ Mizli Israyel gar a ɓam ɓa a kuyupaka Zozuwe ati Kalepe ti ɗugur, amma dudok ngi Bumbulvuŋ a bugo vu gurjik da Israyeleye gar ar guɗuk ngi zlir ti Buymisemuŋ.

Moyis mucufuɗa Buymisemuŋ ɓa a pula mungra ngi mizli

¹¹ Bumbulvuŋ a ɓa Moyise na: «Mizli tayna a sa pulaka hiris ɗu hã ti vunaka? Gar ti gwat migam ɗaˀ tahay, ya miga taŋ a wuzla taŋ na kwana, a ngumam pulikiy mevel taŋ ta na si.

¹² I sa ngizla taŋ ti jiji matiɓi vu, yo gwat ya miwa taŋ di vu na, anta sa lumaka mata, i sa ɗuv sukwi mekelem taˀ mabo tivi ka, sukwi mifineˀ Israyeley ti haɗa wãˀ ti gidaŋ.»

¹³ Moyis a mbiɗa da Bumbulvuŋ: «Eziptehey a sinaka le, mubo ti sukwi Israyel ti ruwuy taŋ na, i gidaŋ ɗiki.

¹⁴ A slufaka ɓi nah le da mizli ngi ruwuy hana. Mizli Kanaˀanay a cinam na: ka Bumbulvuŋ, k'ada a wuzla sukwi ɗike, ki ra biga taŋ vu hiri ti hiri. Ki ra jigina taŋ ti musure ngi gazlavay ɓaˀ a mbuŋ taŋ, ki ra ru ti haŋ ɗik a mbuŋ taŋ, ti papasa, ka angi musure ngi gazlavay, ti duvuɗo, ka angi musure ngi vu.

¹⁵ Na wurenna ma na, ki wuɗo ngizla sukwi ɗike kuɗup ar li purla si na, sukwi ngi mizli misinaka gwat ka miga gar na, a sa ɓam:

¹⁶ «Bumbulvuŋ a ndila ci ti mizli hanayna nga ruwuy naŋ miɓa taŋ di ɗaˀ le tuwa ta, naŋ mingizla taŋ sunok sunok a wuzlaɓuh mikirɗak kirɗak na vurˀe.»

¹⁷ Wurenna so na, ambuh Bumbulvuŋ, i tumbuluw, biga gidaŋ ɗike. Na zle, ki ɓi na:

¹⁸ I ya Bumbulvuŋ maji mevel kutum ta, yo magi mezle haɗi teˀe, mungra waɗ cine mi ta na, i ɓusa ɓi nah gu ɓula, amma mbur migi gwat le na, i pula teˀ ta, mbur migi mungra le na, i kuta dideˀ naŋhaya ti bonoy, hã dideˀ dideˀ makir malla mufaɗa.

¹⁹ Bumbulvuŋ ɗu, ka tuwa ka mezle haɗi ma na, pula mungra ngi mizli ɗikey na ava, asi diga taŋ muboko ti Ezipte na, ki ra pula taŋ mungra taŋhaya na si.»

²⁰ Bumbulvuŋ a mbiɗaŋ di: «I pula taŋ mungra taŋ le kaɓa ka mucufuɗiy na.

²¹ Na, kaɓa ya misi ti siifa gisiŋ, yo kaɓa dudok nga ya Bumbulvuŋ manaha hirwuyo gar gisiŋ na,

²² Mizli gar mupuraka dudok ɗu ati gwat migam ɗaˀ tahay, ya miga taŋ a Ezipte, waɗ a wuzlaɓuh mikirɗak kirɗak na, gar ti nah kwana, a cam le a kwacay ɗu is mbeˀ mbeˀ na si, ti taŋ micinikiy mi ta na.

²³ Vurˀe, hirwuy Kanaˀan, ya miɓa ɗaˀ le, i sa vula da dideˀ taŋhay tuwa na, hadam, ko mbur pal asi taŋ masa ci anga anta. Mizli mihirsikiy na, ko mbur pal asi taŋ masa pura anta.

²⁴ Amma sey gawla ɗu Kalepe, wuluk nga naŋ, naŋ pal, a ndir le ti teŋteŋ avu ya. Vurˀe, i sa ci di nga hirwuy naŋ mira puro di na, dideˀ naŋhay a sa tiɓaka hirwuy nah da taŋ.

²⁵ Amalekey ati Kanaˀanaya, wurenna, t'ada ar li micay vuna si. Kumo, mbiɗam duba zle tiprike, ɓa ki mam nga wuzlaɓuh mikirɗak kirɗaka, kini ngir tivu mubuliy lavaɗ.»

Bumbulvuŋ mukuta mizli naŋhay ti bonoy

²⁶ Bumbulvuŋ a ɓa Moyis ati Aroŋ ma:

²⁷ «I cine Israyeley matuwam ti ya na le, mizli hĩhĩy malambaˀ tayna, a sa pulaka tuwuy ti ya na ti vunaka?

²⁸ Ara ɓaka taŋ na: Kaɓa ya misi ti siifa gisiŋ na, hadam, i ya Bumbulvuŋ maɓi. I sa gi ti kum weˀe avu mingiɓi ya micina ti balam kum na.

²⁹ Kum mizli misi vi kukur cuw malla mufunaka le, kum cek muslufukum, toh toh slimiɗ kumoy ng'ar ɗerewol na, kisa micam gar a wuzlaɓuh mikirɗak kirɗak hana, vur kum mutuwam ti ya na.

³⁰ Hirwuy ya miɓa ɗaˀ le, i sa vulukum di ki pam anga na, hadam, kum anta kisa cam anga ta. Sey Kalep, mangal ngi Yefune waɗ Zozuwe, mangal ngi Nun, i taŋ pal taŋ masa cam.

³¹ Ki ɓam zleˀe kanaˀanay a sa jaka ziri kumoyo ng'ar beke. Na yi sa ru ti taŋ nga hirwuy, kum muwuɗam ta na, taŋ a sa sinakaŋ.

³² Amma kumo, kisa micam a wuzlaɓuh hana.

³³ Ziri kum mizilehey, a sa jiginaka gineweye vi kukur mufaɗ a wuzlaɓuh hana. Taŋ ar bonoy hã ki micam cek a wuzlaɓuh aka, vur kum migam teŋteŋ avu ya ta na.

³⁴ Ki gam hin kukur mufaɗ ar li pura hirwuy Kanaˀana. Na kisa gam vi kukur mufaɗ ngi wurka malambaˀ kumo, mbiɗeˀvra, hin pal a tiri vi pal, ɓa kisa sinaka tuwaˀ ngi kum mutuwam ti ya na.

³⁵ Ya Bumbulvuŋ, i ɓi le, kum i mizli malambaˀhay, ki jumomˀay ɓa ki cinikiy mi ta. Hadam, i sa gi ti kum kahana. Ki sa ngizlam pay a wuzlaɓuh. Ki sa micam aka.»

³⁶ Mizli Moyis mislina taŋ zleˀe nga pura hirwuy Kanaˀan tuwa, taŋ mumoko na, a ɓaka ɓi ngi hirwuyo tir malambaˀ, yo a paka mi da Israyeleye, ɓa a ram ti mi asi Moyise ta.

³⁷ Mizli misi moˀore tayna, miɓaka ɓi ngi hirwuyo tir malambaˀ na, a micam muc mugurjik daˀ a mbuŋ Bumbulvuŋ vuna si.

³⁸ A wuzla mizli mislina tayna, sey Zozuwe ati Kalep mindiram ti siifa.

Mizli micinam mi ta siima

³⁹ Moyis a slufa ɓi ngi Bumbulvuŋ hana cek da Israyeleye, joˀ mizli a ndurɓom hiri haɗa.

⁴⁰ Li naŋ muwun na, a bam cẽẽt, a jiɗam kini ngir ti ruwuy muwã. A ɓam: «Gisiŋ, i gam mungra le. Ani i ra jiɗam ng'ar li Bumbulvuŋ mibiga tuwa.»

⁴¹ Moyis a cufuɗa taŋ: «Ki gam hana i gwat mike? Bumbulvuŋ miɓi ɗaˀ na, ki cinakaŋ mi ta! Kum anta sa lumam bugawla gu ta.

⁴² Bumbulvuŋ naŋ anta avu kum ta si na, ki ram ɓa mesene kumoy, a kuɗukum lambaˀ ta.

⁴³ Amalekey ati Kanaˀanaya, t'ada a mbuŋ kumo, a sa nguzlukum pay ar li kiɗa vu, vur kum misipaka Bumbulvuŋ ta na, Bumbulvuŋ naŋ anta ati kumo ta.»

⁴⁴ Israyeley a puraka vu taŋ kaɓa misi gidaŋhay. A wuɗam ɓa a ram gbaˀ nga hirwuy muwã tuwa na si. Amma akoti ngi jumoˀay ngi Bumbulvuŋ waɗ Moyise, a kiraham avu walahay guɗuko ta.

⁴⁵ Amalekey ati Kanaˀanay misi a hirwuy muwã tuwa na, a poko sar, a kiɗaka taŋ, a ɓulaka taŋ hã sesẽŋ a Horma.