SLUFA VU 11 - Bible en langue guiziga

Israyeley mumbulom mi a Tabera

¹ Ngi pas numuŋ ada na, Israyeley a zlaka tuwuy ti Bumbulvuŋ. Bumbulvuŋ micina na, a jaŋ mevel le. A slino vu, a wur mizli ati mivay ngi walahaya.

² Mizli a zlaka tumbulo Moyise ti tuwuy. Moyis a tumbulo Bumbulvuŋ ar deɗe taŋ, joˀ vu a mucu.

³ A caka slimiɗ da li nah Tabera, mbiɗeˀvra «vuhay», asi Bumbulvuŋ muwura Israyeley ati hay taŋhay na, a diga.

Israyeley mucufuɗam useˀe

⁴ Ngi pas mekelem ma na, mulakay ada a wuzla Israyeleye, a soko ti ruwuy wal wal, vreŋ ara ga taŋ haɗi. Israyeley vuna ti haŋ taŋ, a zlaka tuwuy, a ɓam: «I ra lumoko useˀ ngi zum na, ama ska?»

⁵ Gwat ndra mazumaka taŋ a Ezipte zleˀe na, kay, i ra wulkakaŋ. I zumam kilif ngataraŋ, tatiyak, diɗi, mukusum kwal, taami waɗ taami memeɗe.

⁶ Ani wurenna, gwat tayna anta mata, i ra micam ti may, i zumam i man tewle!

⁷ Mana, naŋ ka mengeleleŋ ngi yoloɓiri, yo naŋ babara wit wit kaɓa mukuturɓuy ngi lalaŋ.

⁸ Mizli a waham wah ar li hil naŋ, a yaˀaka ar ngurvuŋ malla a ɗugoko ar jijiŋ, a da ka ar misirgaɗ malla a dam di helelem mikefer kefer, naŋ wurzlaŋŋa kaɓa makala.

⁹ Ti duvuɗo, man a po ti muŋ jom ti wulngar ng'ar walahaya.

¹⁰ Israyeley a cifam truk truk, vur hay vur hay, a miviŋ ngi guɗuk taŋhaya. Moyis a cine taŋ matuwam ti Bumbulvuŋ na le, tuwuy taŋ a ja mevel le haɗi da Bumbulvuŋ. Ɓi nah a gira Moyise le haɗi.

¹¹ Joˀ a cufuɗa Bumbulvuŋ: ki wuɗ ki ga malambaˀ da gawla ɗike vurmike? Ki wuɗ ki giy mezle mata sukwa? Mizli ka muvuliy taŋ hana, jigin taŋ naŋ tuwaˀa, ki ɗuviy jijir ngi mizli hanayna hirasl ar ya vur mike?

¹² Muvula taŋ siifa i ya kwa? Miga hur taŋ i ya kwa? Miya taŋ i ya kwa? Ki ɓiy: Hila taŋ gumbuˀ gumbuˀ a didak, kaɓa ngwas mavul ɗuwa da zuŋ gaza, ɓa i ndil taŋ sesẽŋ angi hirwuy ka miɓa ɗaˀ le da dideˀ taŋhay na, ɓa hã ki ɓiy kanah na, vur mike?

¹³ I ra lumo useˀe ngi vul da zigiduw masipiy ti tuwuy hana amaka?

¹⁴ Bonoy mizli tayna magikiy di na, y'anta jijira pal ɗu gu mata, a finiy gidaŋ le.

¹⁵ Da ki wuɗo gi ti ya kahana na, zuwen ka mikiɗiy vagay, naɓa ki giy mezle le, yo i sa pura bonoy ya masa sa na mata.

¹⁶ Bumbulvuŋ a mbiɗa da Moyise: «Cikiliy mizli micawwa ngi wuzla Israyeleye kukur tarnaˀ, mizli ka misina taŋ le, i micawwahay gisiŋ gisiŋ, yo i buyɓihey a wuzla mizli. Aru ti taŋ nga mizlingre ngi guɗuk ngi zlir ti ya Buymisemuŋ. Ki cicam dedeŋ ati taŋ a diga.

¹⁷ I sa po sar, i sa ɓuw ɓi a diga. I sa hil ˀUf misi ar ka na cah, i sa pa taŋ di nga hur taŋ. Dar kisa waka mizli jom ati taŋ, i ka masa wa taŋ pal ɗik mata.

¹⁸ Ki sa ɓa mizli na: ‹Zuɓaka hiryi vur hin ngi tiprike, wam vu ngi sa zuma useˀe, asi Bumbulvuŋ a cine tuwuy kumo le, a si na le vreŋ ara gukum, hã ki ɓam zuwen ndra misi zleˀe a Ezipte. Vurˀe, Bumbulvuŋ a wuɗo vulukum useˀ ngi zumo so.

¹⁹ Ki sa zumam ngi hin pal malla cuw tew ta, ngi hin zlum, kuruˀ malla hin kukur cuw tew ta ma,

²⁰ kisa zumam useˀ hã kiya soŋ wãˀ, hã a gukum kisl kisl, ki vunaham di. Kahana gar na, i kuti asi kum mupulaka Bumbulvuŋ misi a wuzla kumo mbak, ki tuwam di, ki ɓam: I boko ti Ezipte vuna vur mike na?›»

²¹ Moyis a mbiɗaŋ di: «Mizli mugun hirnga ɗu hana, a gam gwat ngi mizli durmuk skat skat merkeɗ gu, ki ɓi ma na, kisa vula taŋ useˀ, hã kiya pal!

²² Ko da i kiɗaka taŋ tumuŋhoy, ˀaway waɗ sla ndraˀahaya gar kwana, a ja taŋ kwa? Ko da i jaka kilif ngir mubuliye gar kwana a ja taŋ kwa?»

²³ Bumbulvuŋ a mbiɗa da Moyise: «Gidaŋ ɗu naŋ muk ta kwa? Avi ka, mingiɓi ɗu na, da a gi gisiŋ malla a gi ta kwana, wurenna kisa puraŋ.»

Bumbulvuŋ muvula ˀUf naŋ da mizli micawwahay mizli ngir tarnaˀa

²⁴ Moyis a bo tir guɗuko, ara ɓa mingiɓi ngi Bumbulvuŋ tuwa da mizli. Joˀ a cikil mizli micawwa ngi wuzla Israyeley kukur tarnaˀ, yo a cica taŋ deŋ deŋ gun guɗuko.

²⁵ Akẽh Bumbulvuŋ a po sar ar musure ngi gazlavay, a ɓa Moyise. A hil ˀUf misi ar Moyise neˀ, a vula da mizli micawwahay mizli ngir tarnaˀ tuwa. ˀUf mici kulaˀ a hur taŋ si na, a zlaka a ɓam kaɓa mijiviɗey, amma a ɓam hã a zikam di nga mbuŋ ta ɓula.

²⁶ Mizli ada cuw, a ndiram zleˀe ar walahay guɗuko, i ti Eldat waɗ Medat. Slimiɗ t'ada a wuzla mizli ngir tarnaˀay vuna ngbaŋ, amma a bam nga ciki guɗuko ta. ˀUf a pisar ar taŋ, a zlaka a ɓam kaɓa mijiviɗey daˀ a walahay vuna si.

²⁷ Mangal gawla a kil nga ɓa ɓi naŋ da Moyise, a ɓaŋ: «Eldat ati Medat ara ɓam ka mijiviɗey ar walahay guɗuko!»

²⁸ Zozuwe, mangal ngi Nuno, i gawla ngi Moyis zle ti zuŋ, a ɓa Moyise na: «Moyis Kumani ɗu, ɓa taŋ ɓa a taˀakaŋ!»

²⁹ Moyis a mbiɗaŋ di: «Ki gi suloŋ ti ya kwa? Da a gi na, anja Bumbulvuŋ a vula ˀUf naŋ da Israyeleye gar, ɓa a tiram mijiviɗey gar kwana kuy!»

³⁰ A dirba nah, Moyis ati mizli micawwahay mizli ngir tarnaˀa, a mam ng'ar walahay a muŋ.

Israyeley muhumbiɗam tuɓurlay

³¹ Bumbulvuŋ a ˀufo himiɗ tir mubuliye, a kilo ti tuɓurlayay, a muslo taŋ ng'ar walahay guɗuko. A pam sar gun walahaya gar. Ki vi hiipas ar li ru, ɓa ki ra ndila mivay naŋ. Walahaya gun gar kanah, yo ɓis ɓis naŋ zle a ruwuyo, a gi gwat ngi metir pal.

³² Tapasa, mizli a vam hiipas ar li hil naŋ, jom ti duvuɗ naŋ waɗ li naŋ muwuno ma. Mbur mihil neˀkini na, naɓa naŋ ti kilo durmuk mbeˀ mbeˀ. Israyeley a njikaka taŋ ɓiy ɓiy ar walahaya, ɓa a muˀulom.

³³ A tikaka useˀ vuna ta, ara zumaka ti zum aruŋ sina, Bumbulvuŋ a ji mevel ar taŋ, a ca taŋ ar bonoy madiɗaŋ.

³⁴ A zilaka li nah: Kibrot-Taˀava, mbiɗeˀvra «Zivi ngi misi may gwatay», asi a dikaka mizli misi vreŋhey na a diga.

³⁵ Akẽh na, Israyeley a slikiɗam baɗ a Kibrot-Taˀavaŋ, ara pam a Haserot.